Nehemiah 12

Sukuma 2019

← Chapter 11 Jump to: Chapter 13 →

1Aba h'a bagabīji na a Balawī abo bakiza na Zelubabeli ng'witūnja o ng'wa Salatieli hamò na Yeshua, Selaya, Yelemia, Ezila,

2Amalia, Maluki, Hatushi,

3Shekania, Lehumu, Melemosi,

4Ido, Ginesoni, Abiya.

5Mijamini, Maadia, Biliga,

6Shemiya, Yoalibu,

7Salū, Amoki, Hilikia, Yedaya. Ū mu shikū ja ng'wa Yeshua, a banhū benaba baalī bataale ba bagabīji, pyī nū mu ndūgū jabo.

8A Balawī baalī, Yeshua, Binui, Kadimieli, Shelebia, Yuda, na Matania; ū ng'wenūyo hamò na a baana ba ng'wawe walī na nīmo gwa kūgolanya mīmbo ga ng'wikanza lya kūfunya būlūmbi.

9Bakibukia na Uno baalī bichabo, ū ng'wikanza lya libilinga bīmīīlaga lwande bilolelaga nabo.

10Ū Yeshua walī amyalile Yoakimu, ū Yoakimu ūmyala Eliashibu, ū Eliashibu ūmyala Yoada.

11Ū Yoada ūbiza ise o ng'wa Yonasani, ū Yonasani ise o ng'wa Yadua.

12Ū mu shikū ja ng'wa Yoakimu, a batongeeji ba kaya ja bagabīji baalī, Melaya kaya ya ng'wa Selaya; Hania ya ng'wa Yelemia;

13Meshulamu ya ng'wa Ezila; Yohanani ya ng'wa Amalia.

14Ī ya ng'wa Maluki Yonasani; ī ya ng'wa Shekania Yosefu;

15ya ng'wa Halimu Adina; ya ng'wa Melemosi Helikai.

16Zakalia ya ng'wa Ido; Meshulamu ya ng'wa Ginesoni;

17Zikili ya ng'wa Abiya; Pilitai ya ng'wa Miniamini na ya ng'wa Maadia.

18Ī ya ng'wa Biliga Shamua; ya ng'wa Shemaya Yehonasani;

19ya ng'wa Yoalibu Matenai; ya ng'wa Yadaya Uzi.

20Kalai ya ng'wa Salū; Ebeli ya ng'wa Amoki;

21Hashabia ya ng'wa Hilikia; ī ya ng'wa Yedaya Nesaneli.

22A bataale ba kaya ja Balawī ū mu shikū ja ng'wa Eliyashibu, Yoada, Yohanani, na Yadua, na a ba kaya ja bagabīji, bakandīkwa ng'wikanza lya būsugi bo ng'wa Dalio muna Būajemi.

23A bataale ba kaya ja bakūlūgenji ū mu lūganda lwa ng'wa Lawī, kwiza kūshika ng'wikanza lya ng'wa Yohanani ng'witūnja o ng'wa Eliyashibu, baalī bandīkwa ū mu shitabo sha koolecha ī mihayo ya shikū ījo jabīta.

24A batongeeji ba Balawī baalī Hashabia, Shelebia, Yeshua ng'witūnja o ng'wa Kadimieli, na a baana ba ng'wabo abo bīmīīlaga bilolelile ng'wikanza lya kūkumīlīja na kūfunya būlūmbi, būl'igelè līkwīmbaga mu kwiyinhīlīja nī lichalyo, ūmo walī wahelela Daūdi munhū o ng'wa Mulungu.

25A balang'hanni ba mibita abo bashilang'hanaga ī chumba sha kūbīkīla shikolo īsho shalī ha mibita baalī Matania, Bakibukia, Obadia, Meshulamu, Talimoni na Akubu.

26Ū nīmo gwabo bagwīta mu shikū ja ng'wa Yoakimu, ng'witūnja o ng'wa Yeshua, ng'witūnja o ng'wa Yozadaki na mu shikū ja ng'wa Nehemia, ūyo walī nsugi wa sī, na Ezila ū ngabīji na nangi wa shilagīlo.

27Hūna aho lyashika ī likanza lya ndugu ya Yelusalemu kwejiwa, a Balawī bakakoowa hose hose ūko baalī, benhwa Yelusalemu kūlwa kūlūyegela ū lūshikū lwa kwejiwa kwa ndugu; batūle nzege na ndono, na malimba ng'wikanza lya kwīmba mīmbo ga būyegi na kūlūmba.

28A bīmbi nabo benhwa kūfuma hose pyī ū mu mapandī ayo gaalī hihī hihī na Yelusalemu, na kūfuma kū magūngūli ga bana Netofa;

29Na kūfuma Beti-giligali, na mhandī ja Geba na Azimaveti; nguno a bīmbi baalī bibeegeja ngali jabo kwīpīndīlīja ī Yelusalemu.

30Hūna lūūlū a bagabīji na a Balawī aho bamala ū kwiyeeja a boi, būbeeja na a banhū, nī mibita nī ndugu.

31Hanuma ya henaho a basugi ba Yuda nūbawīla kūlinha higūlya ya ndugu, nūlagīja magele abīlī mataale ga bīmbi gandya kwīmba na kūkumīlīja kūnū gajile galī a higūlya ya ndugu. Ī līmò lyūjīlīīla kū būlyo, kūlola kū mita gwa mapalala.

32Ū Hoshaya ūja nalyo ī ligelè lyenīlo, hamò na nusu ya basugi ba Yuda;

33ū ng'wibita lyenīlo būja na ba Azalia, Ezila, Meshulamu,

34Yuda, Benjamini, Shemaya, na Yelemia.

35Baalīmo na bagabīji na mhembe jabo, nū Zakalia ū ng'witūnja o ng'wa Yonasani, ng'witūnja o ng'wa Shemaya, ng'witūnja o ng'wa Matania, ng'witūnja o ng'wa Mikaya, ng'witūnja o ng'wa Zakuli, ng'witūnja o ng'wa Asafu.

36Baalīmo na a baana ba ng'wawe, ba Shemaya, Azaleli, Milalai, Gilalai, Nesaneli, Yuda, na Hanaani; na shikolo shabo sha kwīmbīla īsho shalī shahayiwa na Daūdi ū munhū o ng'wa Mulungu. Ū ntongeeji walyo ī ligelè lyenīlo walī Ezila, ū nangi.

37Aho bashika a ha mita gwa ha lūzwīlo lwa minzī, būlūmbūlīla bajile kū būtongi, būūkashika kū mita gwa malinhīlo ga kū nzengo go ng'wa Daūdi; būlinha a ha ndugu, būja kūshisha bīkīlanhya ī numba ya ng'wa Daūdi, būūkashika kū mita gwa kū minzī ūyo gūlī kīya.

38A bīmbi a bangī būlola kū lwandī lwa nkono gwa lūmoso, būshimīza balī a higūlya ya ndugu; nane nūbalondeela, nī nusu ya banhū ī yīngī. Kūshisha kwīkīlanhya ī numba ī ndīhu ī ya bapembi ba moto, kūjīlīīla kū ndugu ngalī,

39kūjūbīta higūlya ya mita gwa Efulaimu; na kū mita gwa kale, na gwa ndīlo, na kū numba ndīhu ya Hananeli, na numba ndīhu y'igana, būkashika kū mita gwa ng'holo. Aho bashika ha mita gwa balang'hani bīma.

40Hūna a magelè būbīlī wago ayo gīmbaga mīmbo ga kūkumīlīja gingīla mu numba ya ng'wa Mulungu; nū nene ningīla, na nusu ya batongeeji,

41hamò na a bagabīji, ba Eliakimu, Maaseya, Mijamini, Mikaya, Elioenai, Zakalia, na Hanania; nī mhembe jabo,

42na ba Maaseya, Shemaya, Eleazali, Uzi, Yehohanani, Malikīya, Elamu, na Ezeli. A bīmbi aho balīmba batongeelagwa na Yezilahia.

43Ū lūshikū lwenūlo bakafunya shitambò shitaale, hangī nīyo baalī bayega kīngī nasho, nguno ū Mulungu walī wabīītīla mhayo gwa kūbinha kūyega. Na a bakīma baalī na būyegi no pye na a baana, nīyo ī lilaka lya būyegi wa bana Yelusalemu lyashikaga kūle no.

44Ū lūshikū lwenūlo būtūūlwa ho banhū ba kūyūlang'hana ī chumba sha kūbīka shikolo īsho shilayūsolelejiwa, a matwajo ga kwandya, nī zaka. Shiyūbilingīlwa ng'wenūmo īsho shafumaga mu malaale ga mu mizengo, īsho shihelilwe mu shilagīlo kūlwa nguno ya bagabīji na Balawī. Nguno a banhū ba Yuda bakayejiwa na a bagabīji, hamò na a Balawī abo batūmamaga.

45Ū nīmo go ng'wa Mulungu wabo, nū gwa kūtūūla wela bagwītaga gīt'ūmo bīītīlaga a bīmbi, na a balang'hani ba mibita; kūlenganīla nū mumo walī walagīīlīla ū Daūdi nū ng'witūnja wakwe ū Solomoni.

46Nguno ū mu shikū ja ng'wa Daūdi na Asafu, baalīho a batongeeji ba mīmbo, na a ba mīmbo ga kūngongola Mulungu na ga kūnūmba.

47Hūna lūūlū ū mu shikū ja ng'wa Zelubabeli na Nehemia, pye a Baisilaeli bafunyaga shakwinha kūlwa bīmbi na balang'hani ba ha mibita. Ī linong'ho īlo lyalī kūlwa nguno ya Balawī balītūūlaga ha mhelo, hama a Balawī nabo batūūla ha mhelo inong'ho lya kūja kū bagabīji.

← Chapter 11 Jump to: Chapter 13 →