Song of Solomon 1

Sukuma 2019

Jump to: Chapter 2 →

1Lyīmbo lya mīmbo ga ng'wa Solomoni.

2Ni anibbipage wei, anibbipe na nomo gwakwe ng'wenekīlī; ū būtogwa wako būsoga no kūtinda divai.

3Ū ng'waso gwa maguta gako gwawiza no, ī lina lyako lībange gītī maguta ga ng'waso gwawiza gitagwa hanhū. H'ī chene bakūtogilwe a banikī.

4Nisolage ūnijane, nīyo tūjage wangū! Ū ntemi ni aningījage mu chumba shakwe. Tūkūkūyegela no, hangī tūkūsangabala; ū būtogwa wako tūkūbūkumīlīja kūtinda divai. Abo bakūtogilwe batūngīlīgije no!

5Bing'we bashīke ba Yelusalemu, ū nene nalī ng'wiza nūūlū īkī nalī ng'wilabūzu, nalī ng'wilabūzu gītī maheema ga Kedaali; gītī matundubaali ga ng'wa Solomoni.

6Mutanilolage ng'ūnikumya kūlwa wilabūzu wane, nalī ng'wilabūzu kūlwa līīmi dūhū. Basīza bane baalī baanipelanīla, būnihadīkīja kūyūlīma mu migūnda ya mizabibu; ū mīlī gwane nūgūlekanīja.

7Bebe ūyo nakūtogilwe, niwīlage ūko ūkajagūdīīmīla a madaale gako, nū kūko ūkajagūtūūgīja ūlū lyaseba ī līīmi; nibūlī nikale nakūpīndīīlaga madaale ga mitugo ja biyo gītī nakundīkīgije a miso?

8Bebe nkīma ng'wiza kūtinda bakīma bose, ūlū ūtadeebile kūūbījaga dūhū ī migweshi ya magūlū ga ng'holo, ūje ūkakīgīle nang'ho a baana ba mbūlī bako bbihī na maheema ga badīīmi.

9Ntogwa wane, nakakwikolanījaga na falasa īkūdutaga magogoteni ga ng'wa Falao.

10Ī sīīlī jako ūlū janungeelaga jikagabeelejaga no a matama gako; nū ngufu gwa zahabu gūkabeelelaga kīngī nasho ūlū wagūzwaalaga ū mu nhingo yako

11Ī gete tūkūkūbeegeja sīīlī ja zahabu jitobanīgije mo na feza.

12Ū ntemi aho alī ha meeza yakwe, a malaashi gane gakasambaaja ū ng'waso gwago.

13Ū Ntogwa wane ū kūlī nene abange gītī ibungī lya būbbani līlaalīkījiwe ha gatī gatī ya mbeele jane.

14Nīyo ū kūlī nene ū Ntogwa wane alī gītī ibbipi lya bonji wa kūfuma kū migūnda ya mizabibu ya Engedi.

15Ee Ntogwa wane, ūlī nsoga no! Ūlī nsoga shido Ntogwa wane! A miso gako masoga no, gabange gītī ng'hūūlū.

16Ntogwa wane ūlī wawiza no! Ū bebe ūkaniyejaga kīngī nasho! Ū būlīīlī wise būbange gītī maswa managana, būfuuku kīngī nasho.

17Ī migamba ya numba yise ya mikoola, Ī selele ja mibanga.

Jump to: Chapter 2 →