Song of Solomon 6

Sukuma 2019

← Chapter 5 Jump to: Chapter 7 →

1Bebe nkīma nsoga kūtinda bakīma bose, ū Ntogwa wako ng'wenūyo wajaga halī? Watūngīīlaga halī ū ntogwa wako tūdimane nang'ho tūje tūkūnkoobaga?

2Ū Ntogwa wane watulumenhaga kū ngūnda gwakwe, galīko mandī wafuulīīla mbīyū ja shisanjo sha ng'waso gwawiza; alīdīīma na mitugo jakwe, kūnū ūyoba na bonji mu ngūnda.

3Ū nene nalī wakwe ū ntogwa wane, nū wei ū Ntogwa wane alī wane nene; a madaale gakwe akagadīīmīlaga mu bonji.

4Ntogwa wane ūlī nsoga no, ūbange gītī nzengo gwa Tiliza, ūlī ng'wiza gītī Yelusalemu; ūlī wa makanji gītī mabità ga bashilikale babūkīje mbembeela ja būlūgū.

5Hūngījaga kūngī a miso gako, ūlū wanilola galīnihūūganya, Ī nzwīlī jako jishibile chiza no, jūhelwa gītī madaale ga mbūli jikwikaga kūfuma Gileadi.

6A mino gako gabange gīt'idaale lya ng'holo jilīfuma koojiwa, ījo būlī yene ībyalile mabasa, ndūhū mo īyo īchīlilwe ng'wana.

7A matama gako masheeku gabūmbile chiza, ū mu sheela gaali gītī ibudika lya ikomamanga.

8Na ng'hana ī chene balīho bagole makumi atandatū, na bakīma bangī bangī dūhū makumi anaane, a banhya nabo batī na būbalile;

9alīyo ū ng'hūūlū yane al'iyene, ū ng'wenūyo atī na shisembo; myalwa ūmò wike ū kūlī nina, nīyo nganja no ū kūlī myaji wakwe. A banhya aho bamona būng'haya afuuhilwe; a bagole na a bakīma ba ntemi a bangī būyūnkumīlīja.

10“Ū nkīma w'ihanga gīt'ikīngo lya dilū, na ng'wiseku gītī ng'weji, hangī ng'weku gītī līīmi ng'wenūyū ni nani? Nguno alī na makanji gītī mabità ga bashilikale babūūkije mbembeela ja būlūgū!”

11Naalī naajile ū kū ngūnda gwa mitī ya shisuumo, kūjūlola īsho shikūzwaga mu malago; kūlola ūlū yandije kūsonga ī mizabibu, na a makomamanga ūlū gandije ū kūlaba.

12Alīyo nahayilimanīla ī ng'holò yane yayūtininhīla, nikūmvwa kūbiza mu magogoteni ga hikūlū lya banhū bane.

13Bebe shokaga, shokaga; bebe Nshulami, ka shokaga; ni washoka twize tūkwiloleele! Nibūlī mulītogwa kūng'wiloleela ū Nshulami ng'wenūyū, gītī kwiloleela mbina ya Mahanaimu?

← Chapter 5 Jump to: Chapter 7 →