Song of Solomon 5

Sukuma 2019

← Chapter 4 Jump to: Chapter 6 →

1Bebe nke wane, naashikile ū mu ngūnda gwane ng'wanong'wise; nī ngazu naabingile, pyī nī shisanjo shane. Na a malela gane naagaliile, nūbūng'wa nū būūkī, nī divai yane nīng'wa, pye na a mabeelè. Bing'we banwani bichane, lyagi; batogwa, ng'wagi ūmo mutogelilwe.

2Ū nene nakasangwa naalaala, alīyo ī ng'holò yalī nzūgūlū matū. Kwimanīla nigwa ū Ntogwa wane watūla hoodi ha nyango. Ūhaya, “Ng'hūūlū yane, bebe ūyo ūtī na shisembo, nilugūlīlage Ntogwa wane. Ng'wanong'wise, ū ntwe gwane gwanaganyiagwa lūme, ī nzwīlī jane jadotaga minzi g'iswaalala lya būjikū.”

3Hama īkī namalaga kwikūngagūla Ī shizwalo, nazwalīle hangī? Nī mhambala jane nasosohale hangī alīyo namalaga kūjooja?

4Hūna ū Ntogwa wane ūgaganīja kūsheepya nkono h'ipūndū lyalī a ha nyango; yūnsaatwa no ī ng'holò yane.

5Nūbūūka gīkī nanugūlīle ū Ntogwa wane, kūnū gakūtoonaga ngazu a makono gane; ī nzwaala jane jūlīlobya lūyīlo lwa ngazu ī lilugalīlo lya nyango.

6Nūlugūla gīkī ingīle ū Ntogwa wane, alīyo nūsanga atīho, wamalaga kūja! Aho nasanga wajaga yūchongomeela Ī ng'holò yane. Nūfuma nalilalangīja nakūnkoobaga, alīyo natampandīkile; nūgema nū kūng'hīlīka, nahene atiidīkile.

7Balang'hani ba mu nzego baabītaga būlī kwene ū mu būlang'hani wabo; aho banibona būnitūla būnichūbagūla; a balang'hani ba ndugu benabo būnizuuja nī shizwalo shane.

8Bing'we bashīke ba Yelusalemu, nalīng'wilahīja ī ya kūng'wīla ū Ntogwa wane ūlū ng'ūmpandīka. Ng'wīlagi gīkī ū nene ū kūūnū bonilabūlile ū būtogwa.

9Bebe nkīma nsoga kūtinda bakīma bose, Ī gete ū Ntogwa wako ng'wenūyo abalebije kī a bangī nose ūlītwilahīja gīko?

10Ū Ntogwa wane ng'wiseku, nū mīlī gwakwe ngīlīng'hanu; ū wei nūūlū akabiza ng'wibità lya banhū shihūmbī ikūmi akūmanīka dūhū.

11Ū ntwe gwakwe gūbange zahabu Ī niiza kūheeba; ī nzwīlī jakwe ndīhu japi jigi, gītī nzooya ja ng'hūngūūlū.

12A miso gakwe gabange gītī ng'hūūlū joogaga mu mabeelè, hūna jihela chiza chiza ha ngegu ja myongo ya minzī gakūselaga.

13A matama gakwe gabange ngūnda gwa mitī ya shisuumo sha shisanjo sha ng'waso gwawiza, Ū nomo gwakwe gūbange bonji būkūtoonaga būnasa bo ngazu.

14A makono gakwe gabange zahabu jisulilwe gītī myīsī ya malīngīīla, hūna gūūtonwa mo mawe ga kilisolito. Ū mīlī gwakwe ntelezu gītī ipembe lya mhūlī līguusilwe mu būgaliili lyūsheeka, hūna lyūtūūlīlwa būlenji bo mawe ga safilo.

15Ī milūndī yakwe ībange gītī ng'hīngī ja mawe ga alabasto jikīndīkile ha madaamījo ga zahabu niiza no no no; ī lihanga lyakwe isoga no, gītī kūbeelela kwa Lebanoni kūlwa wiza bo mibanga yamo.

16Ū nomo gwakwe gūkitaga mihayo minonu no. Ū būgima wa yose ū wei ng'wiza no. Bīng'we bashīke ba Yelusalemu, ū ng'wenūyū h'ū Ntogwa wane; hū ng'wene ū nwani ng'wichane.

← Chapter 4 Jump to: Chapter 6 →