Song of Solomon 7

Sukuma 2019

← Chapter 6 Jump to: Chapter 8 →

1Bebe nshīke wa ban'ikūlū, ī mhambala jako jibeelelile no ū mu shilatū; a matango gako gabūmbile gūbilingwa mu būgaliili būsoga no, nīmo gwa makono ga ng'wa koolī ngoogo.

2A ka būshimu ka ha nkundi gwako katūūlile chiza mu būgaliili gītī shikombe sha malīngīīla, Īsho shitamalaga divai īlī na shisanjo shawiza. Ī nda yako ībūmbilwe chiza chiza, ībange gītī ng'hunde ya ngano Īpīndīlījiwe masaki ga bonji.

3Ī mbeele jako jibange gītī baana ba laala babīlī, gītī laala ja mabasa.

4Ī nhingo yako niiza no, Ībange gītī numba ndīhu ya mapembe ga mhūlī. A miso gako gatūūlile chiza gīt'ūmo galī malambo ga Heshiboni hihī na mita gwa Basi-labimu. Ī nindo yako nayo īsabūkile chiza gītī numba ndīhu ya Lebanoni, īyo yilolile na Damasiko.

5Ū ntwe gwako gūkūbeelelile no gītī lūgūlū lwa Kalimeli, ī nzwīlī ja kū ntwe gwako jibange gītī shinga ja langi ya nzulunge, ū wiza wajo būkanendejaga ū ntemi.

6Ntogwa wane, ū būzalabanu wako nū būyegi wako wiza no!

7Ū mīlī gwako neepaleepa gītī ntī gwa nhende, ī mbeele jako gītī mikūngo ya shisuumo shaago.

8Nose nakiwīla gīkī, “Ī gete nagūlinhe ū ntende gwenūyū nakashidime ī shisuumo shaago.” Ī mbeele jako ni jibizage gītī mikūngo ya mizabibu; ū ng'waso gwa myūyī yako gūbize gītī ng'waso gwa shisuumo shinonu,

9ū nomo gwako nago gūbize gītī divai nonu kūtinda mbika jose ja divai. Ī divai ni īselage īng'widīkīle ū Ntogwa wane, ni īhūūmage chiza chiza yingīle mu milomo yabo abo balaalile babize na būdūla wa kūyomba.

10Ū nene nalī wakwe ū Ntogwa wane, nū wei ī ng'hūmbū jakwe jilī kūlī nene.

11Nzūgū ntogwa wane; tūjage kū malaale tūkūjūlaala kwenūko mu kaya ja banhū.

12Ntondo twipuune dilū makīngo tūje ū kū migūnda ya mizabibu, tūkīlole ī mizabibu ūlū yandije ū kūlaba, tūbone ūlū botaamukile ū būlabo, na a makomamanga tūgabone ūlū gaalabile. Nakūja nakakwinhīle kwenūko ū būtogwa bone.

13Ī haha ī dūdai jasambaagije ng'waso gwawiza no pye a hose, na a ha milyango yise shilīho shisuumo shinonu sha būlī mbika; shilīho ī shipya nī sha kale, naashikeja kūlwa nguno yako bebe Ntogwa wane.

← Chapter 6 Jump to: Chapter 8 →