Song of Solomon 4

Sukuma 2019

← Chapter 3 Jump to: Chapter 5 →

1Ee Ntogwa wane, ūlī nsoga no! Ūlī nsoga shido Ntogwa wane! A miso gako ū mu sheela gawiiza no gītī miso ga ng'hūūlū. Ī nzwīlī jako jishibile chiza no, jūhelwa gītī madaale ga mbūli jikwikaga kūfuma mu lūgūlū lwa Gileadi.

2A mino gako gabange gīt'idaale lya ng'holo jaamala kūbbutīlwa booya, jifumile koojiwa; būlī yene ībyalile mabasa, ndūhū mo īyo īchīlilwe ng'wana.

3Ū nomo gwako nsoga no, nī langi yaza ībeelelile ho chiza no, a matama gako gabūmbile chiza masheeku, ū mu sheela gaali gītī ibudika lya ikomamanga.

4Ī nhingo yako niiza no, Ībange gītī numba ndīhu: ya ng'wa Daūdi, ūmo jikatūūlagwa mūda shihūmbī, jose mūda ja bashilikale ba būlūgū.

5Ī mbeele jako būbīlī wajo jibange gītī baana ba laala babīlī, gītī baana ba laala ba mabasa bakūdīīmīlaga mu mbūga ja bonji.

6Līlī bbihī kūfuma ī līīmi, nī giiti shisambaale; nakūja ū kū lūgūlū lwa ngazu, nakashike nū kū lūgūlū lwa būbbani.

7Ee ntogwa wane, ūlī nsoga no ūtī na shisembo nūūlū shido.

8Nke wane twīngage ī Lebanoni, nzūgū kūnū tūsaame ī Lebanoni. Ikaga ū mu lūgūlū lwa Amana, wīnge ū kū magūlya ga Senili, ū kū neno ya ngūlū ja Helimoni; Īngaga ū kū mapilinga ga shimba, na mahooyelo ga sūbī.

9Bebe nke wane, ng'wanong'wise, wīminije no ī ng'holò yane; a kalolele kako nū ngufu gwa mu nhingo yako shikūniminyaga.

10Nke wane, ū būtogwa wako būkīlanīgije ng'wanong'wise! Ū būtogwa wako wiza no kūtinda divai, nū ng'waso gwa maguta gako gwawiza no, kūtinda ng'waso gwa malashi gose gose.

11Ū nomo gwako nke wane gūkazeema zeemaga būūkī gītī būūkī bo malela, ū lūlīmi lwako lūkasūlūlūchaga mabeelè na būūkī; ū ng'waso gwa shizwalo shako gūbange gītī gwa lūgūlū lwa Lebanoni.

12Nke wane, ng'wanong'wise, ūbange gītī ngūnda gūlugalīliwe, ūlī lwinzī lūgītīīlilwe, lūzwīlo lūlang'hanilwe.

13Ū mu gatī gūlīmo ngūnda gwa makomamanga, na būlī ntī gwa shisuumo shinonu; Īlīmo na mitī ya hina na nalido.

14Ī nalido jilī hamò na safuloni na mitī ya chayī, na midalasi, na mitī ya būbbani wa būlī mbika, na ngazu; na mitī yīngī ya būnasa bo ng'waso gwawiza, hamò na ngakà.

15Ūlī lūzwīlo lwa mu ngūnda, lwinzī lwa minzī ga kūmanūsela gakūhūūmaga kūfuma Lebanoni.

16Ee nyaga gwa sukuma, mishaga; nzūgū nū bebe nyaga gwa dakama. Gūfuulīlījage ū ngūnda gwane, ū ng'waso gwamo gūsambaale hose pye. Ū Ntogwa wane ni izage ū mu ngūnda gwakwe alyī ī shisuumo shaamo abūlūmbe ū būnonu washo.

← Chapter 3 Jump to: Chapter 5 →