Song of Solomon 8

Sukuma 2019

← Chapter 7 Jump to:

1Ūlū ni ūlī sīza wane wa kwilekela lūbeele halī mayū, ni yalī hambū hambū! Nguno ū mu gīko nūūlū kūkūsangīla hanhū hūna nūkūbbipa, ni ndūhū munhū wa kūnidalaha.

2Ni nakūtonga kūja mu numba ya ng'wa mayū ūyo wanilanga, nūkakwinha divai ītūgije shisanjo, h'a minzī ga makomamanga gane!

3Ū nkono gwakwe gwa lūmoso gūlī ha sīlīlī ya ntwe gwane, ū gwa būlyo gūnikumbatīlile.

4Bing'we bashīke ba Yelusalemu, nalīng'wilahīja, ū būtogwa yaya ū kūbūsaja nūūlū kūbūkomya, kūshisha būmishe boi wenekīlī.

5Nani ng'wenūyo alīfuma kū mabbaala, kūnū ansendamīlīle Ntogwa wakwe? Ū bebe nakakūbūūcha ū mu mbeho ya ntī gwa shisuumo, ipandī īlo noko akakūtūngīla nda, h'aho akakūbyalīla aho akalung'wa būsūngū.

6Nīītage ū nene nabize lūmeng'ho lwa ha ng'holò yako, gītī lūmeng'ho ha nkono gwako; nguno ū būtogwa būlī na nguzu gītī lūfu; ū wilu būlī na lūgūūmī gītī kūlimu. Būkabbiishaga gītī moto gūkūbakaga, gītī moto gwa būpī gūkūligimaga.

7A minzī h'ūmo gakwīlīle gatīko kūgūjimya ū moto gwa būtogwa, nūūlū ihūūma lya minzī lītūdūla ū kūbūpyagūla. Ū munhū nūūlū akafunya pyī ī sabo ja mu kaya yakwe gīkī apandīke būtogwa, akūgelela kūsekwa dūhū.

8A bise tūlī na ng'wanong'wise ng'wanikī ndo, ataalī nūūlū kūzwa ndutu, ī gīsī lūūlū, tūkūng'wītīla mhayo kī ūlū biza balūnja?

9Ūlū ni ndugu, a higūlya yakwe ni twazenga numba ndīhu ya chūma sha shaba. Ūlū ni nyango ni twagwambīla būgong'ho wa mitī ya mibanga.

10Ū nene nalī ndugu, ī mbeele jane jilī gītī h'ī numba ī ndīhu; ū kūlī we nalī gītī ng'wenhi wa kwifuula.

11Ū Solomoni walī na ngūnda gwa mizabibu ipandī lya Baali-hamoni, ū ngūnda gwakwe gwa mizabibu akagūgoodisha kū balang'hani, gīkī būlī ng'wene ayenha shihūmbī sha feza kūlwa matwajo gaamo.

12Alīyo ū ngūnda gwane gwa mizabibu, ū gwene gwane nene ng'wenekīlī. Ū bebe Solomoni shilī shako ī shihūmbī sha feza, a balang'hani ba matwajo bakūsola a magana ay'abīlī.

13Bebe ūyo ūkikalaga mu migūnda hamò na binhya biyo ba kūkūgunanha, natogilwe kūliigwa ī lilaka lyako.

14Angūhaga ntogwa wane, bizaga gītī laala nūūlū ngulyati ya ngūlūgūlū kū ngūlū ījo jinaagīlilwe shisanjo sha ng'waso gwawiza.

← Chapter 7 Jump to: