Jeremiah 20

Tsonga Xitsonga (Bibele) 1929

← Chapter 19 Jump to: Chapter 21 →

1Kutani Paxahuru, n'wana Imere, muprista ni mulanguteri lonkulu wa yindlu ya Yehovha, a twa Yeremiya loko a profeta timhaka teto;

2kavaloko Paxahuru a ba muprofeta Yeremiya, kutani a n'wi nghenisa ekhotsweni ra le nyangweni leyi tlakukeke ya Benjamini, endlwini ya Yehovha.

3Kambe nimixo Paxahuru a humesa Yeremiya ekhotsweni; kutani Yeremiya a ku eka yena: “Yehovha a nga ka a nga ha tshami a ku vita hi vito ra Paxahuru (ku rhula hinkwako); kambe u ta ku thya Magoro-Misabibi (ku chava hinkwako).

4Hikuva Yehovha u te: ‘Waswivo, ndzi ta ku endla ku chava, ku ri ka wena, ni ka maxaka ya wena hinkwawo, va ta wa hi fumu ra lava nga valala va vona, kutani u ta vona sweswo hi mahlo; kambe ndzi ta nyiketa va Yuda hinkwavo emavokweni ya hosi ya Babilona, leswaku a va yisa evukhumbini eBabilona, kutani a va dlaya hi fumu.

5Kambe ndzi ta nyiketa vukosi hinkwabyo bya muti lowu, ni mitirho hinkwayo ya wona, ni malondzoko hinkwawo lama tiyeke ya wona, ni vukosi hinkwabyo bya tihosi ta Yuda, ndzi byi nyiketa emavokweni ya valala va vona, va ta swi tlakula, va famba na swona, va swi yisa eBabilona.

6Loko u ri wena Paxahuru, ni lava akeke endlwini ya wena hinkwavo, mi ta ya evukhumbini; u ta ya Babilona, u ya fela kona, u yimberiwa kona, ni maxaka ya wena hinkwawo lawa u nga karhi u ma profetelaka vunwa.’ ”

7Oho Yehovha, u tshama u ndzi khorwisa, kutani ndzi khorwile; u tshama u ndzi sindzisa hi matimba, kutani u ndzi hlurile; ndzi endliwa xihlekiso siku rin'wana ni rin'wana, va ndzi hleka hinkwavo.

8Hikuva hi masiku loko ndzi vulavula, ndzi tlakusa rito, ndzi huwelela eka vanhu ku nonon'hwa ni ku onha; hikwalaho rito ra Yehovha ri ndzi hundzukele ku holoveriwa ni xisandzu siku rin'wana ni rin'wana.

9Kambe loko ndzi nga ku: “A ndzi nga ha tshami ndzi n'wi vula, ni loko ku ri ku vulavula hi vito ra yena,” eka mina swi fana ni ndzilo lowu hisaka embilwini ya mina, lowu nghenisiweke emarhambyini ya mina; kutani ndzi endla hi matimba ku wu hlayisa, kambe ndza tsandzeka.

10Hikuva ndzi twile ku hleva ka lavo tala; ku chavisa ku ndzi rhendzele hi matlhelo hinkwawo: “N'wi hleveni, hi ta n'wi hehla.” Hinkwavo lava ngi ndzi twanana na vona, lava langutelaka ku khunguvanyeka ka mina, va ri: “Ingi a nga kanganyisiwa, kutani hi n'wi hlula leswaku hi tirihisela eka yena!”

11Kambe Yehovha u le ka mina kukotisa nhenha leya matimba; hikwalaho, lava ndzi xanisaka va ta khunguvanyeka, kutani va nga ka va nga hluri nchumu; va ta khomisiwa tingana ngopfu hikuva a va tlharihanga; ti ta va tingana leti nga heriki, leti nga riki na ku rivariwa.

12Yehovha wa tinyimpi u ringa la lulameke, u languta swisuti ni timbilu; ndzi ta vona ku tirihisela ka wena eka vona, hikuva ndzi ku tivisile timhaka ta mina.

13Yimbelelani eka Yehovha, mi dzunisa Yehovha! Hikuva u lwele vutomi bya xisiwana emavokweni ya lavo biha.

14A ku rhukaniwe siku leri ndzi velekiweke ha rona! Siku leri manana a ndzi velekeke ha rona ri nga tshuki ri katekisiwa!

15A ku rhukaniwe munhu la nga tivisa tatana, a ku: “U velekeriwe n'wana wa wanuna,” a va a n'wi tsakisa ngopfu.

16Munhu yeloyi a a kotise miti leyi Yehovha a yi mbundzuxeke, a nga yi tsetseleri; a a yingise mikosi ka hari mixo, ni mukhosi ninhlekanhi.

17A va ndzi dlayanga ha yini, loko ndza ha ri ekhwirini, leswaku manana a ta va sirha ra mina, a va a tikile hilaha ku nga heriki xana?

18A ndzi humela yini ekhwirini, leswaku ndzi ta vona ku karhala ni ku vaviseka, ni leswaku masiku ya mina ma hela hi tingana xana?

← Chapter 19 Jump to: Chapter 21 →