Jeremiah 28

Tsonga Xitsonga (Bibele) 1929

← Chapter 27 Jump to: Chapter 29 →

1Hi lembe rolero, eku sunguleni ka ku fuma ka Sedekiyasi, hosi ya Yuda, hi lembe ra vumune, hi n'hweti ya vuntlhanu, Hananiya, n'wana Azuri, muprofeta wa Gibiyoni, a ndzi byela timhaka emahlweni ka vaprista ni ka tiko hinkwaro endlwini ya Yehovha, a ku:

2“Ku vula Yehovha wa mavandla, Xikwembu xa Israele, a ku: Ndzi ta tshova joko ra hosi ya Babilona.

3Malembe mambirhi, loko ma hundzile, ndzi ta vuyisa exivandleni xa yindlu ya Yehovha, swibya leswi hinkwaswo leswi Nebukadnetsara, hosi ya Babilona, a swi tekeke exivandleni lexi, a famba na swona Babilona.

4Loko a ri Yekoniya, n'wana Yoyakimi, hosi ya Yuda, ni Vayuda hinkwavo va le vukhumbini lava yeke Babilona, ndzi ta va vuyisa exivandleni lexi, ku vula Yehovha, hikuva ndzi ta tshova joko ra hosi ya Babilona.”

5Kutani muprofeta Yeremiya a hlamula Hananiya muprofeta, emahlweni ka vaprista ni le mahlweni ka tiko hinkwaro lava yimeke endlwini ya Yehovha.

6Muprofeta Yeremiya a ku: “A swi ve tano! Yehovha a a endle sweswo! Yehovha a a tiyise marito ya wena lawa u ma profeteke hikwalaho ka swibya leswi nga ta tlheriseriwa exivandleni lexi, swa yindlu ya Yehovha, ni hinkwavo lava yeke eku bohiweni eBabilona!

7Ntsena, yingisa rito leri ndzi ku byelaka rona etindleveni ta wena ni le tindleveni ta tiko hinkwaro.

8Vaprofeta va vile kona emahlweni ka mina ni le mahlweni ka wena, enkarhini wa khale va profetile ematikweni yo tala ni le ku fumeni lokukulu, leswaku tinyimpi ni makhombo, ni ntungu swi ta va kona.

9Loko a ri muprofeta la profetaka swa ku rhula, loko rito ra muprofeta yeloyi ri endlakala, muprofeta yeloyi u ta tiviwa ha swona leswaku u rhumiwile hi Yehovha kunene.”

10Kutani muprofeta Hananiya a teka joko enhan'wini ya muprofeta Yeremiya a ri tshova.

11Kutani Hananiya a vulavula emahlweni ka tiko hinkwaro, a ku: “Ku vula Yehovha, ndzi ta tshova sweswo joko ra Nebukadnetsara, hosi ya Babilona, enhan'wini ya tiko hinkwaro, malembe mambirhi loko ma herile,” kutani muprofeta Yeremiya a famba hi ndlela ya yena.

12Kutani rito ra Yehovha ri ta eka Yeremiya, muprofeta Hananiya a va a tshovile joko enhan'wini ya muprofeta Yeremiya, ri ku:

13“Famba, u byela Hananiya, u ku: ‘U tshovile joko ra ntsandze, kambe u endlile joko ra nsimbhi ematshan'weni ya rona.

14Hikuva ku vula Yehovha wa mavandla, Xikwembu xa Israele: Ndzi veka joko ra nsimbhi enhan'wini ya matiko lawa hinkwawo, ma ta tirhela Nebukadnetsara, hosi ya Babilona ma ta hamba ma n'wi tirhela; ndzi n'wi hile ni swiharhi swa nhova.’ ”

15Kutani muprofeta Yeremiya a byela Hananiya muprofeta, a ku: “Yingisa-ke, Hananiya! Yehovha a nga ku rhumanga, kambe u tshembisile tiko leri mavunwa.

16“Hikwalaho, Yehovha u vula, a ku: ‘Vona, ndza ku hlangula emisaveni; u ta fa nan'waka, hikuva u vurile marito ya ku pfukela Yehovha.’ ”

17Kutani Hananiya muprofeta a fa hi lembe rolero, hi n'hweti ya ntlhanu na timbirhi.

← Chapter 27 Jump to: Chapter 29 →