Jeremiah 29

Tsonga Xitsonga (Bibele) 1929

← Chapter 28 Jump to: Chapter 30 →

1Hi lawa marito ya tsalwa leri muprofeta Yeremiya a ri rhumeleke a ri Yerusalema, eka vakulukumba lava seleke eku bohiweni, ni ka vaprista, ni ka vaprofeta, ni ka tiko hinkwaro, lava Nebukadnetsara a nga va khoma eYerusalema, a va yisa Babilona.

2Hi loko hosi Yekoniya, ni nkosikazi, ni tindhuna, ni vakulukumba va Yuda ni va Yerusalema, ni vavatli ni vafuri va humile Yerusalema.

3Papila a ri vekiwile emavokweni ya Elasa, n'wana Xafani, na Gemariya, n'wana Hilkiya, lava Sedekiyasi, hosi ya Yuda, a nga va rhuma eBabilona eka Nebukadnetsara hosi ya Babilona, ri ku:

4“Ku vula Yehovha wa mavandla Xikwembu xa Israele, eka lava bohiweke hinkwavo, lava ndzi va rhurhiseke Yerusalema, ndzi va yiseke Babilona, a ku:

5Akani tindlu mi tiakela kona; rimani masimu, mi tidyela swakudya swa wona,

6tekani vasati mi veleka vana va xinuna ni va xisati, mi tekisa vana va n'wina vasati; mi lavela vanhwana va n'wina vanuna, va veleka vana va xinuna ni va xisati; mi andza kona, mi nga tsongahali.

7Ma nga lavela muti lowo ndzi mi yiseke eku bohiweni eka wona ku tsaka, mi wu khongelela eka Yehovha, hikuva eku rhuleni ka wona, mi ta va ni ku rhula, na n'wina.

8“Hikuva ku vula Yehovha wa mavandla, Xikwembu xa Israele, a ku: Mi nga tshuki mi kanganyisiwa hi vaprofeta va n'wina lava nga exikarhi ka n'wina, ni vangoma va n'wina, mi nga tshuki mi yingisela valorhi va n'wina lava mi lavaka milorho eka vona;

9hikuva va mi profetela mavunwa hi vito ra mina; kasi a ndzi va rhumanga, ku vula Yehovha.

10“Hikuva ku vula Yehovha, a ku: Malembe ya 70, kutakuloko ma herile ka Babilona, ndzi ta mi tsundzuka, ndzi mi endlela hi marito ya mina yo lulama, ndzi mi tlherisela exivandleni lexi.

11Hikuva mina ndzi tiva mianakanyo ya mina leyi ndzi yi anakanyaka ematshan'weni ya n'wina, ku vula Yehovha, hikuva i mianakanyo yo rhula yi nga ri ya ku biha, ndzi ta mi nyika ku hetelela ka ku saseka ni ku tshemba.

12Mi ta vitana eka mina, mi va mi ndzi khongela, mina ndzi mi yingisa.

13Mi ta ndzi lava, mi va mi ndzi kuma, hikuva mi ta ndzi lava hi timbilu hinkwato ta n'wina.

14Ndzi ta kumiwa hi n'wina, ku vula Yehovha ndzi ta tlherisela ka n'wina e vabohiwa va n'wina, ndzi mi hlengeleta ematikweni hinkwawo ni le matlhelweni hinkwawo laha ndzi mi hangalaseke kona, ku vula Yehovha; ndzi ta mi vuyisela exivandleni lexi ndzi mi hangalaseke mi ri ka xona.

15Kambe mi ri: ‘Yehovha u hi humesele vaprofeta le Babilona!’

16“Vonani, ku vula Yehovha hikwalaho ka hosi leyi tshameke exiluvelweni xa Davhida, ni hikwalaho ka tiko hinkwaro leri akeke emutini lowu, va nga varikwenu lava nga yangiki eku bohiweni na n'wina;

17ku vula Yehovha wa mavandla, a ku: ‘Vonani ndzi rhumela matlhari, ni ndlala, ni ntungu exikarhi ka vona; ndzi ta va humesa kukota makuwa lama pfundzeke, lama nga riki na ku dyiwa hikuva ma bihile,

18ndzi ta va phalalela hi matlhari ni ndlala ni ntungu ndzi va nyiketa ku xanisiwa eku fumeni hinkwako ka misava, ni le ku rhukaniweni, ni le ku onhakeni, ni ku va xihlamariso ni xisandzu ematikweni hinkwawo lawa ndzi nga ta va hlongola exikarhi ka wona.

19Hikuva a va yingisanga rito ra mina, ku vula Yehovha, loko ndzi ri karhi ndzi va rhumela malandza ya mina vaprofeta, ndzi va rhuma wa ha ri mixo, kambe a va yingisanga, ku vula Yehovha.’

20Kambe yingiselani rito ra Yehovha n'wina mi nga eku bohiweni hinkwenu lava ndzi mi humeseke Yerusalema, ndzi mi yisa Babilona!

21“ ‘Yehovha wa mavandla, Xikwembu xa Israele, u vula hikwalaho ka Akabu, n'wana Kolaya, ni ka Sedekiyasi n'wana Maaseya, lava mi profetelaka mavunwa hi vito ra mina, a ku: Vonani ndzi ta va nyiketa emavokweni ya Nebukadnetsara, hosi ya Babilona, a ta va dlaya emahlweni ka n'wina.

22Ku ta tekiwa rito ra ndzhukano eka vona hinkwavo lava bohiweke va Yuda lava nge Babilona, va ta ku: “Yehovha a a ku endle kukota Sedekiyasi, ni kukota Akabu, lava hosi ya Babilona yi va hiseke hi ndzilo.”

23Hikuva va endlile manyala exikarhi ka Israele va oswanile ni vasati va vamakwavo, va vurile marito yo hemba hi vito ra mina, leswi ndzi nga va lerisangiki swona. Kambe ndzi tiva leswo, ndzi mbhoni ya swona, ku vula Yehovha.’ ”

24U ta byela Xemaya wa Nehelami, u ku:

25“Ku vula Yehovha wa mavandla, Xikwembu xa Israele, kungakuloko u rhumela tsalwa hi vito ra wena eka tiko hinkwaro leri nge Yerusalema, ni ka Sofoniya, n'wana Maaseya muprofeta, ni ka vaprista hinkwavo, u ku:

26‘Yehovha u ku vekile muprista ematshan'weni ya muprista Yehoyada leswaku u va mukamberi endlwini ya Yehovha eka munhu un'wana ni un'wana la hlanyaka, la tiendlaka muprofeta leswaku u n'wi pfalela, u n'wi nghenisa ni le khotsweni.

27“ ‘Kambe sweswi a ku holovelanga ha yini Yeremiya wa Anatoto la profetaka exikarhi ka n'wina?

28Hikwalaho a hi rhumeleke timhaka eBabilona, a ku: “Ka ha ta va nkarhi wo leha; tiakelani tindlu mi tshama kona, rimani masimu mi tidyela swakudya swa wona.” ’ ”

29Muprista Sofoniya a hlaya tsalwa lero etindleveni ta muprofeta Yeremiya.

30Kutani rito ra Yehovha ri ta eka Yeremiya, ri ku: U rhumela timhaka eka lava nga eku bohiweni hinkwavo u ku:

31“Ku vula Yehovha hikwalaho ka Xemaya wa Nehelami, a ku: ‘Leswi Xemaya a mi profeteke kasi a ndzi n'wi rhumanga, kutani a mi tshembise mavunwa;

32hikwalaho ku vula Yehovha: Vona, ndzi ta holovela Xemaya wa Nehelami ni rixaka ra yena. A ku nga ha vi na munhu wa yena la akaka exikarhi ka tiko leri, a ta vona vunene lebyi ndzi nga ta endlela tiko ra mina, ku vula Yehovha; hikuva u vurile marito ya ku pfukela Yehovha.’ ”

← Chapter 28 Jump to: Chapter 30 →