Jeremiah 21

Tsonga Xitsonga (Bibele) 1929

← Chapter 20 Jump to: Chapter 22 →

1Rito leri nga ta eka Yeremiya, ri huma eka Yehovha eminkarhini ya hosi Sedekiyasi loko a rhumela ha yena Paxahuru, n'wana Malikiya, na Sofoniya n'wana Maaseya, muprista, va ku:

2“Wa nga hi vutisela eka Yehovha hikuva Nebukadnetsara, hosi ya Babilona, wa hi hlasela; kumbe Yehovha a nga hi endlela rin'wana ra masingita ya yena, leswaku loyi a suka eka hina.”

3Kutani Yeremiya a va byela, a ku: “Hlamulani Sedekiyasi, mi ku: ‘Yehovha, Xikwembu xa Israele u vula a ku: “Vonani, ndzi ta susa emavokweni ya n'wina matlhari ya nyimpi,

4lawa mi lwaka ha wona ni hosi ya Babilona, ni Vakalediya lava mi siveleleke ehandle ka rirhangu, ndzi va hlengeleta emutini wolowo.

5Kutani mina hi xiviri, ndzi ta lwa na n'wina hi voko leri tlakukeke, ni voko ro nonon'hwa, hi ku hlunama, ni ku kariha, ni ku leva lokukulukumba.

6Ndzi ta ba vaaki va muti lowo, vanhu ni tihomu, va ko va fa hi ntungu lowukulu.

7Endzhaku ka sweswo, ku vula Yehovha, ndzi ta nyika Sedekiyasi, hosi ya Yuda, ni malandza ya yena, ni tiko, ni lava siyiweke emutini lowo hi ntungu, ni matlhari, ni ndlala, ndzi ta va nyiketa emavokweni ya Nebukadnetsara, hosi ya Babilona, ni le mavokweni ya lava nga vavalala eka vona, ni le mavokweni ya lava lavaka vutomi bya vona, kutani u ta va ba hi vukari bya matlhari, a nga ka a nga va tweri vusiwana, a nga ka a nga va tsetseleri a nga ka a nga vi na nsovo.” ’

8“U ta byela tiko leri, u ku: ‘Ku vula Yehovha, “Vonani ndzi veka ndlela ya vutomi ni ndlela ya rifu emahlweni ka n'wina.

9La nga ta sala emutini lowo u ta fa hi matlhari, kumbe hi ndlala, kumbe hi ntungu; kambe la humaka ku ya tinyiketa eka Vakalediya lava mi siveleleke, u ta hanya; vutomi bya yena ku ta va lexi a xi phangaka.

10Hikuva ndzi yimisele muti lowo, mombo wa mina hi ku biha, ku nga ri hi vunene, ku vula Yehovha; wu ta nyiketiwa emavokweni ya hosi ya Babilona leswaku yi wu hisa hi ndzilo.” ’

11“Ni ka yindlu ya hosi ya Yuda, u ku: ‘Yingiselani rito ra Yehovha,

12n'wina yindlu ya Davhida! Yehovha u ri: “Avanyisani hi ku lulama ka ha ri mixo; mi lamulela xisiwana emavokweni ya loyi a n'wi xanisaka, leswaku vukari bya mina byi nga pfurhi kukotisa ndzilo, kutani wu hisa ku nga ri na loyi a wu timhaka hikwalaho ka vumbabva bya ku endla ka n'wina.” ’

13“Vona, ndzi ni mhaka na wena, muti lowu tshameke enkoveni, eribyeni ra mananga, ku vula Yehovha ndzi ni mhaka na n'wina lava nge: ‘Hi nga hlasela hi mani, kumbe i mani la nga nghenaka etindlwini ta hina?’

14Ndzi ta mi ba hi ku ringana mitirho ya n'wina, ku vula Yehovha; ndzi ta pfurhisa ndzilo exihlahleni xa n'wina leswaku wu heta matlhelo hinkwawo.”

← Chapter 20 Jump to: Chapter 22 →