Jeremiah 34

Tsonga Xitsonga (Bibele) 1929

← Chapter 33 Jump to: Chapter 35 →

1Rito ri hume eka Yehovha ri ta eka Yeremiya, loko Nebukadnetsara, hosi ya Babilona ni mavandla ya yena hinkwawo, ni ku fuma hinkwako ka matiko lama fumiwaka hi voko ra yena, ni matiko hinkwawo, va lwa na Yerusalema, ni miti hinkwayo ya matlhelo ya kona, ri ku:

2“Yehovha, Xikwembu xa Israele u vula a ku: U ya byela Sedekiyasi, hosi ya Yuda, u ku eka yena: ‘Ku vula Yehovha: Vona, ndzi nyiketa muti lowo emavokweni ya hosi ya Babilona, u ta wu hisa hi ndzilo.

3Kutani wena, u nga ka u nga poni emavokweni ya yena, u ta khomiwa u nyiketiwa emavokweni ya yena; mahlo ya wena ma ta vona mahlo ya hosi ya Babilona, nomu wa yena, wu ta vulavula ni nomu wa wena, kutani u ta ya eBabilona.’

4“Hambiswiritano, yingisa rito ra Yehovha, wena, Sedekiyasi, hosi ya Yuda! Yehovha u vula hikwalaho ka wena, a ku: ‘U nga ka u nga fi hi tlhari;

5u ta fa eku rhuleni; ni leswi nga hiseriwa vatata wa wena, tihosi to rhanga, leti ngi ti ri kona emahlweni ka wena, u ta hiseriwa sweswo, na wena; va ta ku rila, va ku: “Yo hosi!” ’ Hikuva mina ndzi vurisa sweswo, ku vula Yehovha.”

6Muprofeta Yeremiya a byela Sedekiyasi, hosi ya Yuda, marito walawo hinkwawo eYerusalema.

7Hi loko mavandla ya hosi ya Babilona ma ri karhi ma lwa na Yerusalema, ni miti hinkwayo ya Yuda leyi seleke: A lwa na Lakixi, na Azeka, hikuva a yi ri miti ya makhokholo leyi nga sala exikarhi ka miti ya Yuda.

8Rito ri hume eka Yehovha, ri ta eka Yeremiya, loko hosi Sedekiyasi a endle ntwanano ni tiko hinkwaro leri nge Yerusalema, leswaku va vula mfanelo yoleyo:

9un'wana ni un'wana a tshunxa nandza wa yena wa xinuna kumbe wa xisati, va nga Vaheveru va xinuna ni va xisati, leswaku va tifambela, leswaku ku nga tshuki ku va ni Muyuda la fuwaka makwavo.

10Kutani ku pfumela vakulukumba hinkwavo, ni tiko hinkwaro ku nghena entwananweni wa ku tshunxa un'wana ni un'wana nandza wa yena wa xinuna ni wa xisati va tifambela, va nga ha fuyiwi; va pfumela sweswo, va va tshiketa va tifambela.

11Kambe ndzhaku va hundzuka, va tlhela va vitana malandza ya xinuna ni ya xisati, lawa va nga ma tshunxa, va tlhela va ma endla makhumbi va ri vavanuna ni vavasati.

12Kutani rito ra Yehovha ri ta eka Yeremiya, ri ku:

13“Ku vula Yehovha Xikwembu xa Israele: A ndzi endlile ntwanano ni vatata wa n'wina, hi nkarhi lowu ndzi va humeseke etikweni ra Egipta, endlwini ya vukhumbi, ndzi ku:

14‘Eku heleni ka malembe ya ntlhanu na mambirhi ma nga tshiketa un'wana ni un'wana makwavo wa Muheveru la tixaviseke eka n'wina; a ta ku tirhela hi malembe ya ntlhanu na rin'we, kutani u ta n'wi tshika a famba,’ kambe vatata wa n'wina a va ndzi yingisanga, a va rhiyanga tindleve.

15N'wina kutani, a mi hundzukile, a mi endla swo lulama emahlweni ka mina, hi ku vula timfanelo ta ku tshunxeka ka un'wana ni un'wana eka makwavo; a mi endlile ntwanano emahlweni ka mina, endlwini leyi vito ra mina ri vuriwaka ehenhla ka yona.

16Kambe mi tlherile, mi hundzuka, mi nyamisa vito ra mina, mi tlherisa un'wana ni un'wana nandza wa yena wa xinuna ni wa xisati, va ri lava ingi mi va tshikile va tifambela hi ku rhandza ka vona, mi tlhele mi va vitana leswaku mi va fuwa, va ri vavanuna ni vavasati.

17“Hikwalaho, ku vula Yehovha, a ku: N'wina a mi ndzi yingisanga ku vula mfanelo ya un'wana ni un'wana ku tshunxa makwavo ni xaka ra yena, vonani, mina ndza mi byela mfanelo, ku vula Yehovha: Ndzi tshunxa fumu, ni ntungu, ni ndlala; ndzi mi nyiketa ku xanisiwa eku fumeni hinkwako ka misava.

18Ndzi ta nyiketa vanhu lava tshoveke ntwanano lowu va wu endleke emahlweni ka mina hi rhole leri va tshamaka va ri xeka hi le xikarhi,

19va hundza exikarhi ka vuhlahlano bya rona, va nga vakulukumba va Yuda, ni vakulukumba va Yerusalema, ni tindhuna, ni vaprista, ni vanhu hinkwavo va tiko, lava hundzeke exikarhi ka mihlahlano ya rhole.

20Ndzi ta va nyiketa emavokweni ya lava nga valala eka vona, ni le mavokweni ya lava lavaka vutomi bya vona, ni mitsumbu ya vona swi ta va swakudya swa makoti ya le henhla, ni swa swivandzana swa misava.

21Na yena Sedekiyasi, hosi ya Yuda, ni tihosana ta yena, ndzi ta va nyiketa emavokweni ya lava lavaka vutomi bya vona, ni le mavokweni ya mavandla ya hosi ya Babilona lama mi sukeleke.

22Vonani, ndza lerisa, ku vula Yehovha, va ta tlhelela eka muti lowo, va ta lwa na wona, va wu phanga, va wu hisa hi ndzilo; ni miti ya Yuda ndzi yi endla mananga, laha ku nga akiwiki kona.”

← Chapter 33 Jump to: Chapter 35 →