Jeremiah 42

Tsonga Xitsonga (Bibele) 1929

← Chapter 41 Jump to: Chapter 43 →

1Tindhuna hinkwato ta mavandla, ti ri na Yohanani, n'wana Kariyaka, na Yezaniya n'wana Hoxaya, ni tiko hinkwaro lavatsongo ni lavakulu, va tshinelela, va ku eka muprofeta Yeremiya:

2“Amukela xikhongelo xa hina, u hi khongelela eka Yehovha, Xikwembu xa wena, hina ni masalela lawa hinkwawo, hikuva hambi hi tele, hi sele hi nga ri vangani hilaha mahlo ya wena ma hi vonaka hakona;

3leswaku Yehovha, Xikwembu xa wena, a hi kombisa ndlela leyi hi fanelaka ku famba ha yona, ni lexi hi fanelaka ku xi endla.”

4Kutani muprofeta Yeremiya a va byela, a ku: “Ndzi swi twile; vonani, ndzi ta mi khongelela eka Yehovha, Xikwembu xa n'wina, hi marito ya n'wina; ndzi ta mi byela rito rin'wana ni rin'wana leri Yehovha a nga ta hlamula rona, ndzi nga ka ndzi nga mi fihleri nchumu.

5Va hlamula, va ku eka Yeremiya: Yehovha a ve yena mbhoni ya ntiyiso, loyi a dzunekaka, loko hina hi nga endli hinkwaswo hi rito leri a nga ta ri rhumela eka hina.

6Hambi swi ri swo saseka, hambi swi bihile; hi ta yingisa rito ra Yehovha, Xikwembu xa hina, lexi hi ku rhumeleke eka xona, xi ta hi katekisa loko hi va hi yingisile rito ra Yehovha, Xikwembu xa hina.”

7Masiku ya khume loko ma hundzile, rito ra Yehovha ri fika eka Yeremiya.

8Kutani a vitana Yohanani, n'wana Kariyaka, ni tindhuna hinkwato ta mavandla lawa ingi a ri na wona, ni tiko hinkwaro, lavatsongo ni lavakulu,

9a ku eka vona: “Ku vula Yehovha, Xikwembu xa Israele, loyi mi ndzi rhumeke eka yena, u ri:

10Loko mi tlhela mi aka etikweni leri, ndzi ta mi andzisa, ndzi nga ka ndzi nga mi lovisi; ndzi ta mi byala, ndzi nga ka ndzi nga mi yimbuli, hikuva ndzi tlherile eku biheni loku ndzi mi endleke kona.

11Mi nga chavi hosi ya Babilona, leyi mi yi chavaka; mi nga yi chavi, ku vula Yehovha hikuva ndzi na n'wina, ku mi hanyisa ni ku mi lamulela emandleni ya yena.

12Ndzi ta humesa ku tsetselela embilwini ya yena hikwalaho ka n'wina, u ta mi tlherisela etikweni ra n'wina.

13Loko mi ku: ‘E-e, hi nga ka hi nga aki etikweni leri,’ swi ri leswaku mi nga ka mi nga yingisi rito ya Yehovha, Xikwembu xa n'wina;

14mi ku: ‘E-e, kambe hi ta ya etikweni ra Egipta laha hi nga tiki vona matlhari, laha hi nga tiki yingisa mpfumawulo wa mhalamhala, laha hi nga tiki twa ndlala, hi ta aka kona,’

15loko mi endlisa sweswo, yingisani rito ra Yehovha, n'wina masalela ya Yuda! Ku vula Yehovha, Xikwembu xa Israele: Loko mi phikelela ku ya eEgipta, mi ya luvela kona,

16matlhari lawa mi ma balekelaka ma ta ya mi kuma kona etikweni ra Egipta ni ndlala leyi mi yi chavaka, yi ta mi namarhela eEgipta, mi fela kona.

17Vanhu hinkwavo lava phikelelaka ku ya eEgipta ni ku aka kona, va ta fa hi matlhari, ni ndlala, ni ntungu, a ku nga ha poni munhu emahlweni ka ku biha kuloku ndzi nga ta va humesela kona.

18Hikuva, ku vula Yehovha wa mavandla, Xikwembu xa Israele, a ku: Kukotisa loko ndzi chulurile vukari bya mina, ni ku leva ka mina, ehenhla ka vaaki va Yerusalema, ndzi ta chulula ku leva ka mina ehenhla ka n'wina loko mi yile eEgipta, mi ta endliwa xisandzu, ni ku chaviwa, ni ndzhukano ni ku sandziwa kutani mi nga ka mi nga tlheli mi vona xivandla lexi.

19Yehovha u mi byerile, n'wina masalela ya Yuda, u ri: ‘Mi nga yi eEgipta,’ mi titivela leswaku ndza mi alela kona namuntlha.

20Hikuva ma tixisa emimoyeni ya n'wina, kasi mi ndzi rhumile eka Yehovha Xikwembu xa n'wina, leswaku ndzi mi khongelela eka Yehovha, Xikwembu xa hina, kutani hinkwaswo leswi Yehovha, Xikwembu xa hina, a nga ta hi byela, u ta hi tivisa swona, hi ta swi endla.

21Kunene ndzi mi tivisile swona namuntlha kambe a mi yingisi rito ra Yehovha, Xikwembu xa n'wina, ni hinkwaswo leswi a ndzi rhumeleke swona eka n'wina.

22Sweswi-ke, swi tiveni leswaku mi ta fa hi matlhari, ni ndlala ni ntungu, exivandleni lexi mi tirhandzelaka ku ya aka eka xona.”

← Chapter 41 Jump to: Chapter 43 →