Galatians 1

Umbundu Bible (Embimbiliya - Bíblia Sagrada em Umbundu)

Jump to: Chapter 2 →

1Ame ndi Paulu ndupostolo. Sia noliwile lomunu. Sia tumbikiwile lomunu. Ndupostolo omo nda noliwa la Yesu Kristu kuenda la Suku Isia, u wo pindula kuava va fa.

2Ame la vakuetu vosi va kasi lame tu sonehela akongelo o ko Galatia.

3Kokuene ku kale ocali lombembua vi tunda ku Suku Isia kuenda ku Ñala yetu Yesu Kristu,

4u wa liecela akandu etu ha tu popela kotembo yilo yĩvi, ndeci ca panga Suku Isietu.

5Kokuaye ku kale ulamba oloneke vi enda ño-o hũ, ka vi pui. Amene.

6Nda komoha oku limbuka ndomo wa yanduluki lombili u wo kovongi locali ca Kristu loku tiamela kondaka yiwa yimue yiñi.

7Ocili, ka kuli ondaka yiwa yikuavo, puãi kuli ava vo sakalaisi, kuenje va yongola oku pengisa ondaka yiwa ya Kristu.

8Puãi ndaño etu, ndaño ungelo wa tunda kilu, nda tu longisa ondaka yiwa yi patãla yina tuo longisi, u wa yi popia a siñaliwe.

9Ndeci tua popia ale haico mopia vali, siti, Umue, nda o longisa ondaka yi patãla yina wa tambuli, a siñaliwe.

10Ame hẽ, ñasi loku sanda oku panduiwa lomanu, ele oku panduiwa la Suku? Nda likapa hẽ koku sanjuisa omanu? Nda nda likapa koku sanjuisa omanu siukuenje wa Kristuko.

11Oco ndu sapuili, a vamanji, okuti ondaka yiwa ndo kundili hayomunuko.

12Momo sia yi tambuile komunu, ndaño oku yi lilongisa, sia yi lilongisile komunu, puãi Yesu Kristu wa yi situluila.

13Momo wa yevi ale omuenyo wange ndomo wa kala eci nda kala vetavo lia va Yudea. Nda kangisa ca piãla ekongelo lia Suku, nda setekele muẽle oku li nyõla.

14Ombili yovisila violosekulu vietu nda kaile layo ya luile enene, okuti kovina viefendelo lia va Yudea nda pitahãla vakuosue wange va lua vombuto yetu.

15Puãi, eci Una wa nola loku liñapela osimbu sia citiwile handi, kuenje noke haeye wa ñovonga locali caye,—

16eci co sunguluka oku situluila Omõlaye okuti ndu lombolola ku vakualofeka, oco sia vanguile lomunu.

17Ndaño oku enda ko Yerusalãi kuava va kala ale ovapostolo, okuti ovo va livanga osimbu ame sia kaile upostolo, sia ileko. Puãi nda ile ka Arabia kuenje noke nda tiukila vali ko Damasko.

18Eci pa pita anyamo atatu nda lamana ko Yerusalãi oku pasula Kefa. Nda kala laye ekui lioloneke koloneke vitãlo.

19Upostolo ukuavo sio muile te Tiago, manja a Ñala.

20Ovina evi ñasi loku u soneheli ndeti viocili muẽle, si kembi, Suku eye ombangi.

21Noke nda enda kolofeka via Suria la Kilikia.

22Lopo haimo sia kũlĩhiwile kocipala lakongelo a Kristu a kala vo Yudea.

23Ovo va yeva lika ndomo omanu va popia popia, vati, Una wa tu kangaisaile cilo o kasi loku longisa etavo a setekele oku nyõla.

24Kuenje va ñemanyaila Suku.

Jump to: Chapter 2 →