Galatians 3

Umbundu Bible (Embimbiliya - Bíblia Sagrada em Umbundu)

← Chapter 2 Jump to: Chapter 4 →

1Ene a va Galatia, waveke. Helie wo lianguli? Yesu Kristu, u wa valeliwa kekulusu ka lekisiwile hẽ kokuene kovaso omanu vosi?

2Cimosi lika ndu puli, ceci, Espiritu hẽ, wa li tambuli lovilinga viovihandeleko ale, ele wa li tambuli poku yeva lekolelo?

3Wa wului hẽ ndomo okuti wa fetikili le Espiritu puãi cilo vu molusula letimba?

4Ohali yakahandangala he, wa yi tali ño ocali? Ame nda tatãla okuti wa yi tali ocali.

5U ecaeca kokuene Espiritu kuenje o lingainga ovikomo pokati kene o tẽla oku ci linga hẽ omo vu pokola kovihandeleko ale, ele ciyilila omo vu kolela ondaka yiwa?

6Ci kasi ndomo ca kaile la Avirahama okuti wa kolela Suku kuenje co tendelua esunga.

7Oco limbuki okuti vakuekolelo ovo omãla va Avirahama.

8Ovisonehua via limbuka ale okuti Suku o tenda vakualofeka nda vakuesunga nda va kuete ekolelo. Via sapula ale ondaka yiwa ku Avirahama, viti, Olofeka viosi vi sumũlũhila kokuove.

9Oco vakuekolelo va sumũlũhila kukuekolelo Avirahama.

10Momo vosi va tiamela kovilinga viovihandeleko va siñaliwa. Momo ca sonehiwa okuti wosi ka pokola kovina viosi via sonehiwa velivulu liovihandeleko loku vi lingainga o siñaliwa.

11Ci moleha ciwa okuti Suku ka tendi omunu ndukuesunga mekonda lioku pokola kovihandeleko, momo ukuesunga o muila omuenyo kekolelo,

12puãi ovihandeleko ka vi tundi kekolelo. Ndeci ca sonehiwa haico ci kasi okuti u wosi o vi lingainga o mola lavio omuenyo.

13Kristu wa tu yovola kesiñalo liovihandeleko. Wa tu siñaliwila, momo ca sonehiwa okuti, u wa nyoñamisua kuti wa siñaliwa.

14Wa ci lingila okuti esumũlũho lina lia kala la Avirahama liyavo la Yesu Kristu ku vakualofeka ha tu tambula ohuminyo ye Espiritu lekolelo.

15A vamanji, mopia ndeci ci popia popia omanu. Ocisila cimue ca lisilua lolombangi, lomue o tẽla oku ci nyõla ndaño oku ci vokiya.

16Ocili, olohuminyo via popiwa ku Avirahama lo kombuto yaye. Ka via popele viti, Lo kolombuto, okuti via lua, puãi via tukula yimuamue, viti, Lo kombuto yove, ca lomboloka Kristu

17Eci ñasi loku popia, ceci, Ovihandeleko ka vi nyõli ocisila ca lisilua ale la Suku konyima yanyamo ovita vikuãla kakui atatu, okuti ohuminyo yaco ka yi kolelua vali.

18Momo nda ocipiñalo ciyilila ovihandeleko ca lomboloka okuti ka ciyilila ohuminyo. Puãi Suku wa ceca ku Avirahama lohuminyo.

19Oco, ovihandeleko hẽ, vieyilila nye? Via vokiyiwilako olohõle toke ombuto ya tukuiwa vohuminyo yeya. Via eciwa lovangelo peka lia kapitiya.

20Kaliye, nda kuli kapitiya, ca lomboloka okuti humosiko lika wa kalako, puãi Suku umosi.

21Oco he, ca lomboloka okuti ovihandeleko vi patãla olohuminyo via Suku? Lakamue, momo nda kua kaile ocihandeleko ci tẽla oku muisa ocili omuenyo, nda kocihandeleko kua tunda esunga.

22Puãi ovisonehua vi lombolola okuti cosi ci kasi vokayike kakandu, okuti eci ca likuminyiwa kuava va kolela Yesu Kristu ceciwa ocili kokuavo.

23Puãi, osimbu ekolelo ka lieyile tua laviwa lovihandeleko, kuenje tua yikiwa loku lavoka ekolelo lia laika oku tukuluka.

24Oco ovihandeleko via kala ukuakutupindisa oku tu tuala ku Kristu ha tu tendiwa nda vakuesunga mekonda liekolelo lietu.

25Puãi cilo ekolelo lieya kuenje ka tu sukila vali ondavululi yi tu lava.

26Momo, poku kolela Kristu Yesu, vosi wa lingi omãla va Suku.

27Momo ene vosi wa papatisilui vu Kristu, wa wali Kristu.

28Momo ka kuli u Yudea pamue u Helasi, ka kuli upika pamue omãmãle, ka kuli ulume pamue ukãi, momo ene vosi wamuamue vu Kristu Yesu.

29Nda vu va Kristu nda vumbuto ya Avirahama, wakapiñala kohuminyo.

← Chapter 2 Jump to: Chapter 4 →