Galatians 4

Umbundu Bible (Embimbiliya - Bíblia Sagrada em Umbundu)

← Chapter 3 Jump to: Chapter 5 →

1Eci mopia ceci, Osimbu kapiñala a kasi handi umalehe, ka velelepo okuti upika o sule, ndaño eye muẽle ya cosi.

2Puãi o pokola kakulu vaye lo ku vakalei toke eteke lio sokiyila isiaye.

3Haico etu. Eci tua kala omãla tua kala apika vaspiritu año oluali.

4Eci otembo ya tẽla oco Suku wa tuma Omõlaye wa citiwa lukãi, haeye wa citiwa kotembo yovihandeleko.

5Wo tuma oku yovola ava va tiamela kovihandeleko ha tu moli omangu yomãla vaye.

6Kuenje, omo vumãla, oco Suku wa tuma Espiritu li'Omõlaye vovitima vietu, ha li vilikiya liti, Aba, a Tate.

7Oco, omo Suku a linga ndoco, kupikako vali puãi vumõla, kuenje nda vumõla vu kapiñala ka Suku.

8Osimbu, cina ka wa kũlĩhili Suku, wa kaili apika vovina viaño evi halosukuko.

9Puãi cilo omo wa kũlĩhi Suku,— pamue ca velapo vali, omo wa kũlĩhiwi la Suku,— vu tiukila vali ndati kaspiritu año oluali, hao ka a kuatisa omunu? Nye vu yonguila oku linga vali apika vao?

10Wa fetiki oku sumbila oloneke, lolosãi, lovovo, lanyamo.

11Ñuete ohele lene sanga upange wange pokati kene wa lingiwa ño olivova.

12Ene akuetu, ndu vetiyi siti, Kali ndeci ame ñasi, momo ame ñasivo ndene. Ka wa ndingili cĩvi.

13Wa kũlĩhi okuti onjanja ya tete ndo sapuili ondaka yiwa, ca kala omo nda vetiwa lokuvela kuetimba.

14Kuenje, ndaño eci ca kala vetimba liange co tatamisi, haimo ka wa membuili pamue oku nyehula, puãi wa nambuli ndungelo wa Suku, nda Kristu Yesu.

15Ca pita ndati lesanju liaco wa kaili lalio? Momo ndu wimbili uvangi okuti, nda ca tavele, nda wa tofuili ovaso ene loku a nyiha.

16Oco hẽ, nda linga unyali wene omo ndo sapuili eci cocili?

17Va seteka ca lua oku vu koka puãi halesungako. Va likala oku vu tambula okuti vu livondela oku tambuiwa.

18Ciwa muẽle oku linalisa lombili lovina viwa olonjanja viosi, eci ame ñasi lene lika, hacoko.

19Atumãla tuange, ndu kueteli vali olongembia ndevi vioku cita, kuenje ñala lavio toke Kristu o lulikiwa vokati kene.

20Nda livela nda cilo nda kaile lene. Nda livela nda ca tavele oku pongolola ondaka yange, momo ñasi lohele lene.

21Ene vu yongola oku tiamela kovihandeleko, sapuiliko. Ko yevite hẽ, ovihandeleko?

22Momo ca sonehiwa okuti Avirahama wa kala lomãla valume vavali, ukuavo wupika, ukuavo wondombua.

23U wa citiwa lupika wa citiwa lika letimba, puãi u wa citiwa londombua wa citiwa lohuminyo.

24Eci ñasi loku sapula ca linga ndocisetahãi. Akãi vaco ovisetahãi viovisila vivali. Ukuavo wa tunda komunda Sinai, haeye wa cita omãla vupika, eye Hagare.

25Kaliye Hagare eye ocisetahãi comunda Sinai ya Arabia, kuenje wa lisoka nda Yerusalãi ya cilo, omo o kasi vupika lomãla vaye.

26Puãi Yerusalãi yokilu hopikako, kuenje eye inetu vosi.

27Momo ca sonehiwa hati, Asiũle kua citile, imba. Ove kua kuatele olongembia vioku cita, imba ovisungo, kaluka. Momo omãla vocimbumba va lua, okuti omãla vondombua ya kueliwa va sule.

28Kaliye, akuetu, etu, etu tumãla vohuminyo nda Isake.

29Puãi, ndeci ca kaile kotembo yaco okuti una wa citiwa letimba wa kangisa u wa citiwa le Espiritu, haico ci kasi etaili.

30Puãi ovisonehua hẽ, via popia ndati? Via popia viti, Tundisa upika lomõlaye, momo omõla upika ka lingi kapiñala kove kumue lomõla ondombua.

31Oco a vamanji, etu, etu hatumãla vupikako, puãi tumãla vondombua.

← Chapter 3 Jump to: Chapter 5 →