Galatians 2

Umbundu Bible (Embimbiliya - Bíblia Sagrada em Umbundu)

← Chapter 1 Jump to: Chapter 3 →

1Eci pa pita ekui lianyamo kanyamo akuãla nda lamana vali ko Yerusalãi kumue la Barnaba. La Tito le nda ile laye.

2Nda ililileko omo ca situluilua. Nda va lomboluila ondaka yiwa nda kala loku sapuila vakualofeka. Puãi nda lomboluila lika asongui va kemala si kũlĩhisa nda hẽ eci ñasi loku linga, pamue eci nda linga ale, oco muẽle ci tava, ele nda yoloka ño olivova.

3Tito wa kala lame ka vo pangisile oku tetiwa evamba, ndaño eye u Helasi.

4Ocili, kua kala vakuetu vamue vakuesanda va liyombekelamo oku lavulula okupanduluka tu kuete vu Kristu Yesu. Ovo va seteka oku tu lingisa vali apika.

5Puãi tua likala, ka tua tavele ndaño naito kondaka yavo. Cimosi lika tua livela cokuti, nda ocili condaka yiwa ci tumala vovitima viene.

6Ku vana va sokelua okuti va kemala sia tambuileko ekuatiso limue. Ocili, kokuange okukemala hacimueko. Suku kamela omunu.

7Puãi eci va mola okuti nda kundikiwa oku kundila ondaka yiwa vakualofeka ka va seviwile evamba, ndeci Petulu a kundikiwa oku kundila ondaka yiwa vakuevamba,—

8momo U wa eca unene waye ku Petulu okuti o kundila vakuevamba, haeye wa nyihavo unene waye okuti ñundila vakualofeka,—

9leci va limbuka okuti ocali ca nyihiwa, oco Tiago la Kefa kuenda Yoano, vana va kũlĩhiwa ndolongunji viekongelo, ame la Barnaba va tu kuata leka liondio oku kolisa ongongela yetu. Va tava okuti etu tuenda ku vakualofeka lovo va enda ku vakuevamba.

10Cimosi lika va tu kisika cokuti, tu ivaloka olosuke. Eci nda kalale lutima woku ci linga.

11Puãi, eci Kefa eya ka Antiokea, ame ndo vetela evelo vovaso momo wa pia.

12Momo, osimbu vamue va tunda ku Tiago ka veyile handi, eye Kefa wa lia lia la vakualofeka, puãi, eci veya, wa liwekapo, kuenje wa litepa lavo omo wa kuatela vakuevamba usumba.

13Kuenje va Yudea vakuavo lavovo va limbika ndeye, okuti ndaño Barnaba wa lueyisiwavo lelimbi liavo.

14Puãi, eci nda limbuka okuti eci va lingainga ca patãla ocili condaka yiwa, oco nda popia la Kefa kovaso omanu vosi, siti, Nda ove, u Yudea, o lingainga ndeci ci lingainga ukualofeka, ku lingainga ndu Yudea, o pangisa ndati vakualofeka oku linga nda va Yudea?

15Etu, tu va Yudea koku citiwa; tuakuakandu ndaño handavakualofekako,

16puãi tua kũlĩha okuti omunu ka tendiwa ndukuesunga loku pokola kovihandeleko te loku kolela Yesu Kristu, kuenje tua kolela Kristu Yesu ha tu tendiwa nda vakuesunga loku kolela Kristu, haloku pokola kovihandelekoko, momo lomue o tendiwa ndukuesunga loku pokola kovihandeleko.

17Nda ci moleha okuti poku vanjiliya oku tendiwa la Kristu nda vakuesunga, etu muẽle letuvo tu linga vakuakandu, oco hẽ, ca lomboloka okuti Kristu o linga oñuatisi yekandu? Oco hacoko.

18Puãi, nda nunga vali evi nda tungulula ale, oco ndi limolehisa okuti ndukuesino.

19Momo ame, lovihandeleko, nda fa kovihandeleko si moli omuenyo ku Suku.

20Nda valeliwa kekulusu kumue la Kristu. Hameko vali ñasi lomuenyo, te Kristu eye o kasi lomuenyo vokati kange, kuenje omuenyo ñasi lawo vetimba ñasi lawo omo nda kolela Omõla a Suku u wa sola haeye wa liecela oku mopela.

21Ame si nyehula ocali ca Suku, momo nda esunga li tunda kovihandeleko oco Kristu wa fa ño olivova.

← Chapter 1 Jump to: Chapter 3 →