Galatians 6

Umbundu Bible (Embimbiliya - Bíblia Sagrada em Umbundu)

← Chapter 5 Jump to:

1A vamanji, nda umue wa kuatiwa lokulueya kumue, ene wakue Espiritu u tiuli lutima womboka loku lunguka sanga lovevo o yonjiwa.

2Ovilemo viene liambatisiko, oco vu tẽlisi ocihandeleko ca Kristu.

3Momo omunu nda wa soka hati, Ame nda piãla, puãi ka piãlele, wa likemba eye muẽle.

4Omunu omunu a kũlĩhise upange waye, oco a lipandiye eye muẽle, oku lipandiyila ukuavo hacoko.

5Momo omunu omunu ambata ocitele caye muẽle.

6U wa longisiwa ondaka, ovina viosi viwa a tepeleko u o longisa.

7Ko ka kembiwi, Suku ka tombiwa, momo, eci omunu a kũla haico a lombola.

8Momo u o kũlila etimba liaye o lombola okuvola kuetimba; u o kũlila Espiritu o lombola omuenyo ko pui we Espiritu.

9Ka tu ka kavi oku linga eci ciwa, momo kotembo yaco tu lombola nda ka tua leñelele.

10Olonjanja viosi, eci ku moleha evelo, tu lingi eci ciwa komanu vosi, cinene ku vakuetu vakuetavo.

11Tali ovisonehua vinene ndu soneheli lavio leka liange muẽle.

12Ava va yongola oku posoka ketimba ovo va yongola oku u pangisi oku tetiwa evamba okuti ka va ka kangisiwile ekulusu lia Kristu.

13Momo ndaño vakuevamba ovo muẽle ka va lavi ovihandeleko, puãi va yongola okuti ene vu tetiwa evamba okuti ovo va lipandiyila atimba ene.

14Oku lipanda ku kale ocipãla lame, te oku lipandela ekulusu lia Ñala yetu Yesu Kristu. Omo nda lipandela ekulusu oco kokuange oluali lua fa, lua valeliwa kekulusu, lamevo koluali nda fa, nda valeliwa kekulusu.

15Evamba hacimueko, uyamba hacimueko, ocilulikilo cokaliye oco lika cimue.

16Ombembua lohenda vi kale la vosi va endaenda loseteko eyi, vi kalevo la Isareli wa Suku.

17Tunde opo lomue ka ka sakalaise vali, momo ñasi lolondimbukiso via Yesu vetimba liange.

18A vamanji, ocali ca Ñala yetu Yesu Kristu ci kale lovitima viene. Amene.

← Chapter 5 Jump to: