Galatians 5

Umbundu Bible (Embimbiliya - Bíblia Sagrada em Umbundu)

← Chapter 4 Jump to: Chapter 6 →

1Kristu wa tu yovola ha tu lingi muẽle omãla vamãle. Oco talami ndi, ko ka likueki vali lomi yupika.

2Ame ndi Paulu ndu sapuili siti, Nda vu tetiwa evamba, Kristu lacimue u kuatisi.

3Ame ndimbangi yoku sapuila wosi o tetiwa evamba okuti wa likuta koku pokola kovihandeleko viosi.

4Ene wa soki oku tendiwa nda vakuesunga mekonda lioku pokola kovihandeleko wa litepi la Kristu, wa konyohi kocali ca Suku.

5Momo etu, omo tu kasi le Espiritu, tu talamela lekolelo elavoko liesunga.

6Momo, ku Kristu Yesu, evamba hacimueko, uyamba hacimueko, puãi ekolelo li talavaya locisola olio cimue.

7Wa kaili loku enda ciwa, cilo helie wo tateki okuti ko pokoli vali kocili?

8Etateko eli ka lia tundile ku-u wo kovongi.

9Etumbisa litito li tumbisa ombolo yosi.

10Omo nda kolela Ñala, oco nda kolelavo okuti ko tavi kondaka yimue ya litepa londaka yange. Puãi u o kasi loku vu sakalaisa o yambuiwa, nda helie, nda helie.

11Ame puãi, a vamanji, nda lopo ndongisa oku tetiwa evamba oco hẽ, ñasi loku kangisiwila nye? Nda oco, ocipundukua cekulusu ca imuha.

12Nda livela okuti ava va kasi loku vu sakalaisa nda va livetavo ovo muẽle.

13Momo ene akuetu wa kovongiwili oku linga omãla vamãle. Cinene ceci, umãmãle waco ka u ko wihi onjila yoku sanjuisa ño etimba, puãi livumbi pokati locisola.

14Momo ovihandeleko viosi vi likongela londaka yimuamue, yeyi, Sola u o lisungue love ndomo o lisole ove muẽle.

15Puãi, nda vu lilumana kuenda vu lilia pokati, lunguki sanga vu linyõla pokati.

16Puãi ondaka yange yeyi, Endaendi le Espiritu oco ko lingi ocipango cetimba.

17Momo ocipango cetimba ci yaka le Espiritu, locipango ce Espiritu ci yaka letimba. Momo vi linyãle pokati, oco, oku linga ovina wa pangi ka ci tava.

18Nda vu songuiwa le Espiritu ka vu tiamela kovihandeleko.

19Ovilinga vietimba vi moleha, vievi: ukahonga, evĩho, ohumba,

20oku fendela oviteka, owanga, asuvu, ema, onya, olonyeño, ocipululu, olonamalala, olonepele,

21oku livela, ovoholua, ayele, lovina via lisoka lavio. Ndu lungili ndeci ndo lunguli ale okuti, ava va lingainga ovina evi ka va piñala usoma wa Suku.

22Puãi epako lie Espiritu lieli: ocisola, esanju, ombembua, epandi, unu, esunga, ekolelo,

23umbombe, esuluviko; ka kuli ocihandeleko ci patãla ovina evi.

24Puãi, ava va tiamela ku Kristu Yesu, etimba va li valela kekulusu, kumue lovipango loloñeyi vialio.

25Nda tu mola omuenyo le Espiritu tu endaendivo le Espiritu.

26Ka tu ka lingi vakuakulipanda, ka tu ka lisanumuli pokati, ka tu ka liveli viamãle.

← Chapter 4 Jump to: Chapter 6 →