Hosea 10

Umbundu Bible (Embimbiliya - Bíblia Sagrada em Umbundu)

← Chapter 9 Jump to: Chapter 11 →

1Isareli uyuva wa salala, wimaima epako liawo. Ndokulua kuepako liaye haico a luisa ovotala aye. Ndeci ofeka yaye yamamako haico wa posuisa olongunji viaye vi kola.

2Utima wavo we yuka uhembi, oco va yambuiwila ongole yavo. Yehova o nyõla ovotala avo kuenda o teya olongunji viavo vi kola.

3Cilo ka va kambi oku popia vati, Ka tu kuete osoma momo ka tu kuete usumba wa Yehova, kuenje Soma o tu kuatisa ndati?

4Va popia ño olondaka viaño. Va lisila ovisila viesanda. Oco oku tetulula kuavo kua soka ndovimbuandu violunjuanjua vi tunda tunda vovipanga viovepia.

5Olonungi via Samaria vi lulumĩla onãle ya Betawene. Omanu vaco va yi lilila kuenda ovitunda vi yi liyeyela. Vi lilila omo ulamba wayo wa tunda.

6Onãle, oyo muẽle, yi tualiwa ka Asuria ha yi lingi ombanjaile ku Soma yinene. Efarimi o kutisua osõi. Isareli layevo o kutisua osõi mekonda liociteka caye.

7Osoma ya Samaria yi taka ndokacinjula kilu liovava.

8Olonumbuko via Avene, havio ekandu lia Isareli, vi nyõlẽha. Kovotala avio ku tundila olosongo lososo. Va popia lolomunda, vati, Tu tuviki, kuenda loviwulu, vati, Tu kupukili.

9A Isareli, tunde koloneke via Givea wa linga ekandu. Wamamako lalio. Ovita he, ka vi va sangi vo Givea?

10Ame ñatukila omanu vange va huka oku va yambula. Vakualofeka va vongolokela eci va yambuiwila akandu avo avali.

11Efarimi wa kaile onãle ya pokuisua hayo ya solele oku sasa, kuenje nda popela osingo yaye ya posoka. Cilo puãi Efarimi ndu kapa okanga. Yuda layevo o lima losialuwa, Yakoba o lisosomuĩla ovimu.

12Likulĩlĩ esunga, lomboli ocisola ka ci pongoloka. Sosololi ocisoso; momo otembo yeya yoku sanda Yehova okuti iya, o vu lokisila epopelo ndombela.

13Wa limi esanda kuenje wonguli evĩho, haene wa li epako liuhembi. Momo wa koleli akalu ovita lolohoka viene vialua.

14Oco pokati komanu vene pa yevala onjuvungo yovita, kuenje olombonge viene viosi vi nyõlẽha, ndeci Salamane a nyõla Betevele keteke liovita. Olonjali viakãi via nyanyõhaila kumosi lomãla.

15Oco muẽle, ci lingiwa lene, apata lia Isareli, mekonda lievĩho liene liakahandangala. Osoma ya Isareli yi nyõlẽhẽla pe vekungukungu.

← Chapter 9 Jump to: Chapter 11 →