Hosea 13

Umbundu Bible (Embimbiliya - Bíblia Sagrada em Umbundu)

← Chapter 12 Jump to: Chapter 14 →

1Ale, eci Efarimi a popaele, omanu va luluma. Wa kemãlẽle vi Isareli. Puãi wa linga ekandu poku fendela Baale kuenje wa fa.

2Cilo va kasi loku amamako kakandu. Va litungila oviteka viutale wa yanguluiwa, loviteka vimue va vi tunga lopalata. Upange waco wosi wolomesele. Va popia vati, Vi lumbila! Omanu va sipula olonãle!

3Oco va linga ndombundu yomẽle, pamue ndowume u takata lombili, pamue ndovisaikiti viocimbandi via ambatiwa locipepe, pamue ndowisi u tunda velungu.

4Ame muẽle Yehova Suku yene tunde wa kaili ve Egito. Ka wa kũlĩhĩli Suku yikuavo te ame. Ka kuli upopeli ukuavo te ame.

5Ame ndo kũlĩhĩli vekalasoko, haimo vofeka yekango.

6Puãi eci va lia cocili kuenje ve kuta oco ovitima viavo via tumba kuenje va njivala.

7Oco kokuavo ñala ndohosi. Ndi va lavekela konẽle yonjila ndongue.

8Ndi vondumũhĩla ndombinji ya nyẽhĩwa omãla vayo. Mapulula onete yavo. Ndi va takĩla ndohosi pamue oku va soyoala ndocinyama ca tema covusenge.

9A Isareli, hu nyõla. Helie o ku kuatisa?

10Cilo hẽ, Soma yove o kasi pi nda o ku popela? Olombuale viove vi kasi pi nda vi ku yakela? vina wa tukola eci wa pinga, huti, Nyĩhe osoma kuenda olombuale.

11Nda ku ĩhĩle olosoma lonyeño yange, kuenje nda vi upa locikumbiti cange.

12Evĩho lia Efarimi lia kutiwa, lekandu liaye lia solekiwa.

13Olongembia ndeci viukãi o kasi loku cita vio kuata. Eye puãi oñaña ya huka. Momo otembo ya pitila puãi ka yiya konjila yoku citiwa.

14Ame nga, ndi va yovola kunene wonjembo? Kokufa ndi va yovola? A Kufa, olohali viove vi kasi pi? A Njembo, ekundu liove li kasi pi? Vutima wange ka mũli oku pongoloka.

15Ndaño o kũla ciwa ndoloneva, haimo ofela ya Yehova yi tunda kekango li kasi kutundilo, yiya. Ono yaye layovo yi kukuta letumu liaye li takata. Ofela yaco yi nyõla ukuasi wovikuata viaye viosi via posoka.

16Samaria o yambuiwila ongole yaye momo wa ñualẽlapo Suku yaye. Va pondiwa losipata, lotumãla tuavo tu sasuĩwa. Kuenje akãi vavo olomisi va toliwa pokati.

← Chapter 12 Jump to: Chapter 14 →