Hosea 11

Umbundu Bible (Embimbiliya - Bíblia Sagrada em Umbundu)

← Chapter 10 Jump to: Chapter 12 →

1Eci Isareli a kala omõla ndo sola kuenje ndo tukula siti, Omõlãnge, tunde ndo wupa ke Egito.

2Puãi ndaño ame nda tongeka oku va kovonga haimo vamamako oku litepa lame. Va lumbaile va Baale kuenda va timĩhãile insensu oviteka.

3Haimo lumue, ame, ame muẽle nda longisa Efarimi oku enda, ame nda vambayata peka; puãi ka va kũlĩhĩle okuti ame nda va sakula.

4Nda va koka lovikolo viomunu okuti ovikolo viocisola, kuenje kokuavo nda kala ndu o leluisa okanga kolosingo viavo. Nda va petamela kuenje nda va ĩha okulia.

5Va tiukila kofeka ye Egito kuenje Asuria o linga Soma yavo, momo va likala oku pongolokela kokuange.

6Osipata yi kundula vovaimbo avo, yi nyõla ovikundiko violombundi viavo kuenje yi va lila vovikolo viavo,

7Omanu vange va likapela utima woku litepa lame; oco va kapiwa okanga kuenje lomue o va yupa.

8A Efarimi, ndi litepa ndati love! Hu eca ndati, a Isareli! Nẽla ndati oku ku kundula ndeci nda linga la Adimah! Nẽla ndati oku linga love ndeci nda linga la Cevoyi! Utima wange ka u tava, ohenda yange yi tumbuluka loku omboka.

9Si lingi vali eci onyeño yange ya simile oku linga. Si nyõli vali Efarimi. Momo ame ndi Suku, ame simunuko, haime ndi kola pokati kene kuenje siya oku nyõla.

10Va kuama Yehova kuenje eye o koma ndohosi. Ocili muẽle o koma, kuenje omãla vaye tunda kutakelo, veya loku luluma.

11Va tunda ke Egito, veya lonjanga ndoku pãlãla kuolonjila, pamue kuolopomba vi tunda vofeka ya Asuria, kuenje ndi va tiula vali volonjo viavo. Oco ca popia Yehova.

12Efarimi, ame wa ñualĩsa luhembi, lepata lia Isareli lia ñualisa lelimbi. Yuda puãi, lopo wa kũlĩhĩwa la Suku haeye wa sunguluka ku U o kola.

← Chapter 10 Jump to: Chapter 12 →