Matthew 11

Umbundu Bible (Embimbiliya - Bíblia Sagrada em Umbundu)

← Chapter 10 Jump to: Chapter 12 →

1Eci Yesu a mala oku usika olondonge viaye ekui la vivali, oco wa tundako, wa enda oku longisa loku kunda vovaimbo avo.

2Yoano wa kala vokayike. Eci a yeva evi Kristu a kala loku linga, oco wa tuma olondonge viaye

3oku u pula, okuti, Ove una o kasi loku iya ale, ale tu lavoka umue wiñi?

4Kuenje Yesu wa va kumbulula hati, Kuendi, ka sapuili Yoano ovina vu yevite levi vu lete okuti,

5olomeke vi letuluka, lovilema vi enda, vakuavilundu va yelisiwa, lovisitatui vi yeva, ava va fa va pinduka, lolosuke vi kundilua ondaka yiwa.

6Kuenje u ka sangi kokuange eci cu tatamisa wa sumũlũha.

7Eci va enda oco Yesu wa fetika oku vangula lowiñi omuenyo wa Yoano, hati, Wa ililili nye vekalasoko? oku tala oluneva lua lituñunya lofela ale?

8Nda hacoko wa lilili nye? oku tala omunu wa wala uwalo u yuyuma ale? Ava va wala uwalo u yuyuma va kasi volonjo violosoma.

9Puãi wa ililili nye? oku tala uprofeto ale? Ocili ndu sapuili, siti, Una wa endeleli wa velapo, uprofeto o sule.

10Eye, eye una ovisonehua via lombolola, viti. Tala, ndi tuma omunga yange okuti o pita kovaso yove oku ku pelela onjila yove.

11Mopia lene siti, Ocili, pokati kava va citiwa lakãi ka pa la tukuluka u wa velapo okuti Yoano Upapatisi o sule; puãi u o sule vusoma wokilu unene, Yoano o sule.

12Tunde koloneke via Yoano Upapatisi toke cilo usoma wokilu wa kagisua, kuenje lopo vakuakukangisa vo kuata.

13Momo ovaprofeto vosi lovihandeleko via imba owanji toke ku Yoano.

14Kuenje, nda vu tava oku ci kolela, Yoano eye muẽle Eliya una iya.

15U o kasi lovatui a yevelele.

16Ocitumbulukila cilo ndi ci sokisa le? Ca soka ndomãla va tumala vovila kuenje va vilikiya vakuavo vati,

17Tuo sikili olombendo kuenje ka wa cĩlili. Tua lila kuenje ka wa liteteleli.

18Momo Yoano weya, ka lia lia, ka nyua nyua, kuenje vati, O kuete ondele.

19Mõlomanu weya, o lia lia, kuenda o nyua nyua, kuenje vati, U, ocisapanu, oholua, haeye ekamba lia vakuakutambula elisimu kuenda vakuakandu. Haimo Ndunge o tendiwa ndukuesunga mekonda liovilinga viaye.

20Oco a fetika oku popia ovaimbo omu mua lingilua ovilimbu viaye via lua omo ka a likekembelele akandu avo,

21hati, A Horaseni! Ngongo yove! A Betesaita! Ngongo yove! Momo ovilimbu via lingiwa kokuene nda via lingiwilile vo Turo lo vo Sidono, nda va likekembele osimbu, loku wala ovikeleyi kuenda oku tumala vetiko.

22Puãi mopia lene siti, Keteke liekanga eyambulo lia Turo la Sidono li sule, liene li velapo.

23Kuenje ove, a Kafarinau, o kemalisilua kilu? Ndati, o lokila vonjembo. Momo ovonene a lingiwa kokuove nda a lingiwilile vo Sodomo nda lia kaile toke etaili.

24Mopia love siti, Keteke liekanga eyambulo lia Sodomo li sule, liove li velapo.

25Eteke liaco Yesu wa tuala hati, A Tate, a Cime cilu losi, hu sivaya omo wa sitikila ovina evi kolonoño la vakualondunge kuenje wa vi situluila komãla.

26A Tate, hu sivaya muẽle omo wa ci panga ndoco.

27Ovina viosi via ñundikiwa la Tate. Lomue wa kũlĩha Omõla te Isia, haico lomue wa kũlĩha Isia te Omõla, kuenda undeti Omõlaco a panga oku u situluila Isia.

28Enjui kokuange, vosi wa sovoloki kuenda wa lemiwi kuenje ndu kavuluisi.

29Likapi okanga yange kuenda lilongisi kokuange, momo ndonjuka, haime nda liketisa vutima, oco vu sanga ekavuluko vovitima viene,

30momo okanga yange ya sunguluka, locitele cange ca leluka.

← Chapter 10 Jump to: Chapter 12 →