Matthew 19

Umbundu Bible (Embimbiliya - Bíblia Sagrada em Umbundu)

← Chapter 18 Jump to: Chapter 20 →

1Oco, eci Yesu a mala olondaka evi, wa tunda vo Galilea kuenje weya vofeka ya Yudea kesinya lia Yordão.

2Owiñi wa lua wo kuama kuenje oko a va sakuila.

3Va Fariseo vamue veya kokuaye. Vo seteka vati, Ci tava okuti ulume o nyalela ukãi waye evelo limue?

4Eye wa kumbulula hati, Ka wa tangeli okuti kefetikilo usovoli wa va lulika ulume lukãi?

5Kuenda wamisako vali hati, Oco ulume o sia isiaye la inaye, o likakatela lukãi waye, kuenje kavali kavo va linga etimba limuamue.

6Oco ka va lingi vali omanu vavali, puãi va linga omunu umosi. Oco eci ca tokekisa Suku omunu ka ka ci tepise.

7Vo pula vali vati, Nda oco, nye Mose a handelekela okuti nda kuli oku tundisa ukãi, tete o wiha ukanda woku nyala?

8Eye wa kumbulula hati, Omo ovitima viene via tĩla oco Mose a tavela okuti vu nyala akãi vene, puãi, tunde kefetikilo ka ca kaile ndoco.

9Kuenje mopia lene siti, Wosi o nyala ukãi waye, nda halondaka yoku pekelisako, kuenje o kuela ukãi ukuavo, o linga ukahonga. Lu o kuela ukãi wa nyaliwa layevo o linga ukahonga.

10Olondonge via popia laye viti, Nda ci kasi ndoco pokati kulume lukãi waye hise nda omanu ka va likuela.

11Puãi Yesu wa va kumbulula hati, Havosiko va tẽla oku tẽlisa ondaka eyi, te ava va ihiwa utima waco.

12Momo kuli ava va kasi ndava va vetiwa tunde vovaimo a vainavo, kuli ava va vetiwa lomanu, kulivo ava va lilingisa ndava va vetiwa mekonda liusoma wokilu. Wosi o tẽla oku kolela ondaka eyi a yi kolele.

13Kuenje vo nenela otumala okuti o tu kapa ovaka loku tu likutilila. Olondonge via lemela ava va tu nena.

14Puãi Yesu hati, Omãla va kale, ko ka va tutuiyi oku iya kokuange, momo Usoma wokilu wava va lisoka lavo.

15Oco wa va kapa ovaka aye kuenje wa tundako.

16Oco umue weya kokuaye wo pula hati, Olongisi, nye ciwa ndinga okuti mola omuenyo ko pui?

17Kuenje Yesu wo kumbulula hati, Nye wa mulila eci ciwa? Kuli umosi lika uwa. Puãi, nda o yongola oku iñila vomuenyo, pokola kovihandeleko.

18Wa pula Yesu hati, Vi pi? Kuenje Yesu hati, Ku ka ipe. Ku ka pekelise. Ku ka ive. Ku ka popie uvangi vuhembi.

19Sumba so la nyoho. Sola u o lisungue love ndeci o lisole ove muẽle.

20Umalehe wa popia laye hati, Ovina evi viosi ndi vi lingainga ale. Pa ñambela vali nye?

21Yesu wo kumbulula hati, Nda o yongola oku lipua ocili, kuende, ka landise cosi o kasi laco, ci avela olosuke kuenje o kala lukuasi kilu, oco wiye o ñuame.

22Puãi, eci umalehe a yeva ondaka eyi, oco wa enda loku nyumala momo wa kala lovikuata via lua.

23Kuenje Yesu wa popia lolondonge viaye hati, Mopia lene siti, Ocili ohuasi oku iñila vusoma wokilu, ci tĩla.

24Mopia lene vali siti, Ongamelo oku pita venyulu lionguya hise, ohuasi oku iñila vusoma wa Suku upange.

25Eci olondonge via ci yeva via komoha ca lua, kuenje viti, Elie nga o tẽla oku popeliwa?

26Oku va vanja Yesu wa popia lavo hati, Eci ka ci tẽliwa lomanu, puãi la Suku ovina viosi vi tẽliwa.

27Oco Petulu wa kumbulula, hati, Tala, tua sia ovina viosi ha tu ku kuama, oco hẽ, tu mola nye?

28Yesu wa popia lavo hati, Mopia lene siti, Voluali luokaliye, eci Mõlomanu a tumala komangu yulamba waye, ene wa ñuami vu tumala kolomangu ekui la vivali oku tetuluila ekui liapata kapata avali a Isareli.

29Vosi va sia olonjo, pamue vamanjavo, pamue vamukãi wavo, pamue vaisiavo, pamue vainavo, pamue omãla, pamue ovapia, mekonda lionduko yange, va mola eci ca velapo kuenje va piñala omuenyo ko pui.

30Puãi va lua va kasi kovaso va kala konyima, kuenje va lua va kasi konyima va kala kovaso.

← Chapter 18 Jump to: Chapter 20 →

Recommended Reading

Commentary Matthew Commentaries → Devotional Matthew Devotional Guide → Get This Bible Umbundu Bible (Embimbiliya - Bíblia Sagrada em Umbundu) Study Bible →