Matthew 27

Umbundu Bible (Embimbiliya - Bíblia Sagrada em Umbundu)

← Chapter 26 Jump to: Chapter 28 →

1Eci kua ca omele oco ovitunda vinene viosi lakulu vofeka va tumbika ongombo yoku u wipa.

2Kuenje vo kuta, vo wambatela kukolo, yu vo weca ku nguluvulu Pilato.

3Oco Yuda, una wo pakula, eci a mola okuti Yesu wa pisiwa, wa livela kuenje wa tiula olopalata viaco akui atatu kovitunda vinene lakulu.

4Wa linga hati, Nda linga ekandu omo nda pakula osonde ya pua eko. Puãi va popia vati, Ci tu linga nye? Eci cove, hacetuko.

5Kuenje olopalata viaco wa vi imba vonembele yu wa tunda, wa enda, wa liponda.

6Oco ovitunda vinene via yelula olopalata viaco kuenje viti, Ka ci tava oku vi kapa vombango momo ondando yosonde.

7Oco via limba onumbi, kuenje via landa usenge wukuakutunga olombia ho lingi ayambo akombe.

8Oco usenge waco wa tukuiwa Usengewosonde toke ketaili lilo.

9Oco ca lingiwa eci ca popia uprofeto Yeremiya hati, Kuenje va yelula akui atatu kolopalata, haivio ondando yu wa tukuiwila ondando la vamue va Isareli,

10kuenje va landa lavio usenge wukuakutunga olombia, ndeci Ñala a sapuila.

11Yesu wa talama kovaso a nguluvulu kuenje nguluvulu wo pula hati, Ove usoma ya va Yudea ale? Yesu wo kumbulula hati, Ove, ove wa ci popia.

12Puãi, eci a pindikiwa lovitunda vinene lakulu, lacimue a kumbulula.

13Oco Pilato wa pula hati, Ku yevite ndeci va ku pindikila ovina via lua?

14Puãi ko kumbuluile cimue, oco nguluvulu wa komoha ca lua.

15Kua kala ocituwa okuti ko Pascoa nguluvulu o kutuluila owiñi omandekua yimue va yongola.

16Oloneke viaco va kala lomandekua yimue ya kemala, onduko yaye Baraba.

17Oco eci va liongolola, Pilato wa popia lavo hati, Vu yongola okuti ndu kutuluili elie? Baraba ale, ele Yesu wa tukuiwa Kristu?

18Momo wa limbuka okuti vo pakuila ño onya.

19Kuenda vali, osimbu a tumala komangu yekanga ukãi waye wa tumile kokuaye hati, Ku ka linge cimue omunu una ukuesunga, momo etaili nda tala ohali vonjoi ndo lotela.

20Puãi ovitunda vinene lakulu va tutuminya owiñi okuti va pinga oku kutulula Baraba loku ipaya Yesu.

21Nguluvulu wa popia lavo hati, Po kavali kavo vu yongola okuti ndu kutuluilipo elie? Kuenje vati, Baraba.

22Pilato wa popia lavo hati, Nda oco, Yesu wa tukuiwa Kristu, ndu linga nye? Vosi va linga vati, A valeliwe kekulusu.

23Oco nguluvulu wa popia hati, Puãi nye? Caco cĩvi a linga, ce? Lopo va vilikiya enene vati, A valeliwe kekulusu.

24Oco, eci Pilato a limbuka okuti ka tẽla cimue, puãi ca laika oku wengula ema, oco wa nyañula ovava, wa pusila ovaka kovaso owiñi, kuenje hati, Ame nda lipua osonde yomunu u ukuesunga. Eci cene, hacangeko.

25Kuenje omanu vosi va kumbulula vati, Osonde yaye yi tu wile etu lomãla vetu.

26Oco wa va kutuluila Baraba. Wa tipuisa Yesu kuenje wo weca oku valeliwa kekulusu.

27Oco asualali a nguluvulu va tuala Yesu vombonge kuenje vo wongoluila owiñi wavo vosi.

28Oco vo lula uwalo kuenje vo walisa onanga yohusu.

29Va pata ekolowa liolosongo yu vo li walisa. Va kapa oluneva peka liaye liondio. Oku kekamela kolongolo kovaso aye vo fuanguila vati, A Hosi, a Kuku, a Soma ya va Yudea.

30Vo siyila, kuenje oku nyeha oluneva vo veta laluo kutue.

31Oco eci vo fuanguila, vo lula onanga yohusu kuenje vo walisa uwalo waye. Noke vo wambata ha vo valelisa kekulusu.

32Eci va tunda va sanga omunu umue u Kurene onduko yaye Simone, vo wambatisa ekulusu lia Yesu.

33Eci va pitila kusenge wa tukuiwa Gongota, ca lomboloka usenge wekõlokõlo,

34vo wiha ovinyu via tengiwa londulu. Puãi eci a vi maha ka tavele oku nyua.

35Eci vo valela kekulusu, oco va lianjela pokati kavo uwalo waye oku u limbaila ocela.

36Eci va mala va tumalako oku u lava.

37Kilu liutue waye va kapako ocisonehua ceko liaye, citi, U YESU, SOMA YA VA YUDEA.

38Oco ovingumba vivali via valelua kumue laye kakulusu, cimue kondio, cikuavo kepĩli.

39Ava va vinjukako, oku lipuka ovitue, vo popia etonãi,

40kuenje vati, Okuakunyõla onembele, kuenje o yi tunga vali koloneke vitatu, lipopela ove muẽle. Nda vumõla a Suku, loka kekulusu.

41Haicovo ovitunda vinene la vakuavisonehua lakulu vo fuanguila vati,

42Wa popela vakuavo, ka tẽla oku lipopela eye muẽle. Eye Soma ya va Isareli! A tuluke kekulusu oco tu tava kokuaye.

43Eye wa kolela Suku. Kaliye Suku o popele, nda Suku u yongola! Momo wa popele hati, Ndimõla a Suku.

44Kuenje ovingumba via valelua kakulusu kumue laye vio savulavo.

45Tunde kola yepandu toke kola yecea kua kala owelema kofeka yosi.

46Kuenje eci ca soka ndola yecea Yesu wa vilikiya londaka yinene hati, Eli, Eli, lama sabakatani? Ca lomboloka hati, A Suku yange, a Suku yange, wa njandulukila nye?

47Kuenje vamue va kalako, eci va ci yeva, va linga vati, U o kasi loku kovonga Eliya.

48Ndopo umue wa yoloka, wa nyañula onjavi, wa yi yukisa indangele, wa yi kapa koluneva, kuenje wo nyuisa.

49Vakuavo vati, Ci kale. Tu tali nda hẽ eliya iya oku u popela.

50Kuenje Yesu, oku vilikiya vali londaka ya lua, wa tula omuenyo.

51Kuenje tala, ongumbo yonembele ya toka tunde kilu toke posi, kuenje osi ya luluma lovawe a toka.

52Olosonje laviovo via yuluka, kuenje ovivimbi via lua violosandu via pekelele via pinduka.

53Oku tunda volosonje kovaso yepinduko liaye va iñila vimbo li kola, kuenje va tukulukila komanu va lua.

54Eci kesongo lava va kala laye oku lava Yesu va mola osi ya luluma lovina via lingiwa, oco va yokoka ca lua vati, Ocili u Omõla a Suku.

55Kua kalavo akãi va lua, vana va sindikila Yesu loku u vumba tunde ko Galilea. Va talela kupãla.

56Pokati kavo pa kala Maria u Magadala, la Maria ina ya Tiago la Yosefe, kuenda ina yomãla va Sebedeo.

57Eci ca linga oñolosi kueya ohuasi, u Arimateya, onduko yaye Yosefe haeye oñame ya Yesu.

58Eye wa enda ku Pilato kuenje wa pinga ocivimbi caco. Oco Pilato wa tuma oku ci eca kokuaye.

59Kuenje Yosefe wa nyañula ocivimbi, wa ci muña vonanga yovalatanya yi yela,

60kuenje wa ci langeka veleva liaye liokaliye lia songiwa vesenje. Noke wa tiñuluila ewe linene kuvelo weleva kuenje wa tundako.

61Maria u Magadala wa kalako, la Maria ukuavo. Va tumalela kovaso yeleva.

62Hẽla yaco, hailio eteke liokovaso yeliangiliyo, ovitunda vinene la va Fariseo va liongoluila ku Pilato,

63kuenje vati, A Kuku, tua ivaluka okuti ondimbiki eyi, eci a kala lomuenyo, wa lingile hati, Kovaso yoloneke vitatu minduka.

64Oco handeleka okuti eleva li kolisiwa toke keteke liatatu sanga olondonge viaye viya, viu yombololamo, kuenje vi popia lomanu viti, Wa pinduka ku vakuavilangu, kuenje elimbi lia sulako li piãla, okuti liatete li sule.

65Pilato wa popia lavo hati, Vu kasi lolondavululi. Kuendi, ka kolisi ciwa eleva ndeci wa kũlĩhi.

66Oco va enda, kuenje va kolisa eleva poku sitika ewe liaco loku kapako olondavululi.

← Chapter 26 Jump to: Chapter 28 →

Recommended Reading

Commentary Matthew Commentaries → Devotional Matthew Devotional Guide → Get This Bible Umbundu Bible (Embimbiliya - Bíblia Sagrada em Umbundu) Study Bible →