2 Kings 16

Waray

← Chapter 15 Jump to: Chapter 17 →

1Dida han ika-17 ka tuig nga pagkahadi han Israel ni Peka nga anak ni Remalias, nahimo nga hadi han Juda hi Acas nga anak ni Jotam.

2Baynte an iya panuigon han pagtikang han iya pagkahadi, ngan naghadi hiya ha Jerusalem hin 16 ka tuig. Waray hiya magsunod han maupay nga susbaranan ni Hadi David nga iya ginikanan; ginbuhat lugod niya an diri nakakalipay han Ginoo nga iya Dyos,

3ngan ginsunod niya an susbaranan han mga hadi han Israel. Gin-unong ngani niya hin paghalaran ngadto han mga diyosdiyos an iya kalugaringon nga anak nga lalake, ngan ginsubad niya an magraot nga binuhatan han mga tawo nga gintabog han Ginoo tikang han tuna samtang nasulong an mga Israelita.

4Naghalad hin mga hayop nga tutuboron ngan nagsunog hin insyenso hi Acas didto han pagano nga mga dapit hin pagsingba, ha kapungtoran, ngan ha sirong han kada marampag nga kahoy.

5Ginsulong ngan ginpalibotan an Jerusalem nira Hadi Rasin han Siria ug Hadi Peka han Israel, kundi waray hira makapirde kan Acas. (

6Hito ngahaw nga panahon nabawi han hadi han Edumea an syudad han Elat, ngan ginpaiwas an mga taga-Juda nga nag-uokoy didto. Nag-ukoy ha Elat an mga Edomitanhon, ngan aadto pa hira didto ngada yana.)

7Nagsugo hi Acas hin mga tawo ngadto kan Tiglatpiliser nga emperador han Asiria, dara ini nga mensahe: “Ako an imo matinumanon nga surugoon. Kadi ngan talwasa ako ha mga hadi han Siria ug han Israel, nga nakikiaway ha akon.”

8Ginkuha ni Acas ha Templo ngan ha hirimosan han palasyo an salapi ug bulawan ngan ginpadara ini nga regalo.

9Ha pagbaton han hangyo ni Acas, ginsulong ni Tiglatpiliser ngan han iya kasondalohan an Damasco, nakuha nira an syudad, ginpatay nira hi Hadi Rasin, ngan gindara ha Kir nga mga priso an mga tawo.

10Han pagkadto ha Damasco ni Hadi Acas hin pagtapo kan Emperador Tiglatpiliser, hinkit-an niya didto an altar, ngan ginpadara niya kan Urias nga padi in tama nga surubdan.

11Sanglit nagtindog hi Urias hin altar sugad han surubdan, ngan ginhuman niya san-o umuli hi Acas.

12Pagbalik ni Acas tikang ha Damasco, hinkit-an niya nga human na an altar,

13sanglit nagtubod hiya hin hayop ug naghalad hiya hin mga pagkaon, ngan nag-ipis hin bino ngan han dugo hin pagkigdait nga halad ha altar.

14Nakada ha butnga han bag-o nga altar ngan han Templo an bronse nga altar nga iginhalad ngadto han Ginoo, sanglit ginbalhin ini ni Acas ngadto ha amihanan nga ligid han iya bag-o nga altar.

15Niyan, ginsugo niya hi Urias: “Gamita ini nga akon dako nga altar para han tinubod nga mga halad ha aga ngan han pagkaon nga mga halad ha gab-i, han tinubod nga mga halad ngan han pagkaon nga mga halad han hadi ngan han mga tawo, ngan han bino nga mga halad han mga tawo. Ipisa ngada ha altar an dugo han ngatanan nga mga hayop nga iginhahalad. Kundi ilain para ha akon an bronse nga altar kay gagamiton ko para hin pagdiwata.”

16Ginbuhat ni Urias an iginsugo han hadi.

17Pinanangtang ni Hadi Acas an bronse nga mga karomata nga ginagamit ha Templo ngan ginkuha an mga sangga nga nakada han karomata; ginkuha liwat niya an bronse nga tangke ha mga bungkog han dose nga bronse nga mga todo nga baka, ngan iginbutang an tangke dida hin bato nga patukoranan.

18Ngan ha paglipay han Asiriahanon nga emperador, ginkuha liwat ni Acas ha Templo an burutangan han hadianon nga trono, ngan ginsadhan an kalugaringon nga aragian han hadi ngadto ha Templo.

19Nahisurat dida han Kasaysayan han Kahadian han Juda an iba pa nga nabuhat ni Hadi Acas.

20Namatay hi Acas ngan iginlubong hiya didto han hadianon nga mga lubnganan ha Syudad ni David, ngan sinmaliwan ha iya hin pagkahadi hi Ezequias nga iya anak.

← Chapter 15 Jump to: Chapter 17 →