2 Kings 23

Waray

← Chapter 22 Jump to: Chapter 24 →

1Ginpatawag ni Hadi Josias an ngatanan nga mga pangulo han Juda ug Jerusalem,

2ngan nagburunyog hira ngadto ha Templo, inupdan han kapadian ngan han mga manaragna, ngan han ngatanan nga mga tawo han Jerusalem, riko ug pobre. Ha atubangan nira ngatanan ginbasa hin dako nga tingog han hadi an bug-os nga Basahan han Ginsaaran nga hin-agian didto ha Templo.

3Tinmindog hiya sapit han harigi ngan nagsaad ha Ginoo nga masugot hiya han Ginoo ngan magtutuman hiya han mga balaod ngan mga sugo ha bug-os niya nga kasingkasing ug kalag, ngan magbubuhat han mga ginkikinahanglan han ginsaaran, sumala han nahisurat ha basahan. Nagsaad an ngatanan nga mga tawo hin pagtuman han ginsaaran.

4Katapos ginsugo ni Josias hi Hilkias nga Labaw nga Padi, an iya kabulig nga kapadian, ngan an mga gwardya ha aragian han Templo, nga igawas han Templo an ngatanan nga mga butang nga ginagamit ha pagsingba kan Baal, han diyosa nga hi Asera, ngan han mga bitoon. Ginsunog han hadi ha gawas han syudad hirani han Kahamub-an Kidron ini ngatanan nga mga butang, ngan gindara ngadto ha Betel an mga agbon.

5Ginhukasan niya an kapadian nga gin-ordinahan han kahadian han Juda hin paghalad hin mga hayop nga tutuboron dida han pagano nga mga altar didto han mga syudad han Juda ngan ha mga dapit nga hirani han Jerusalem—an ngatanan nga kapadian nga naghalad hin mga hayop nga tutuboron kan Baal, han adlaw, han bulan, han mga planeta, ngan han mga bitoon.

6Ginkuha niya ha Templo an ladawan ni Asera, iginggawas ini han syudad ngadto ha Kahamub-an Kidron, ginsunog ini, ginpulbos an mga agbon, ngan ginsaburak didto han lulubngan han mga tawo.

7Ginruba niya an mga urokyan didto ha Templo nga inuokyan han magraot in dungog nga kababayen-an ug kalalaken-an. (Didto paghahablon an mga kababayen-an hin mga panapton nga higlawig nga ginagamit hin pagsingba kan Asera.)

8Gindara niya ngadto ha Jerusalem an kapadian nga nakadto anay ha mga syudad han Juda, ngan ha bug-os nga nasod ginruba niya an mga altar nga ginhalaran nira hin mga hayop nga tutuboron. Ginruba liwat niya an mga altar nga hirani han ganghaan nga gintindog ni Josue nga gobernador han syudad, nga nawawala han dako nga ganghaan ha pagsulod mo han syudad.

9Waray tugoti ini nga kapadian hin pag-alagad ha Templo kundi makakahimo hira hin pagkaon han tinapay nga waray patubo nga gin-andam para han ira igkasi kapadian.

10Ginpukan liwat ni Hadi Josias an Tofet, an pagano nga dapit hin pagsingba didto ha Kahamub-an Hinom, basi waray na han iya anak nga lalake o babaye makaghalad hin hayop nga tutuboron ngadto han diyos nga hi Moloc.

11Kinuha liwat niya an mga kabayo nga iginhalad han mga hadi han Juda hin pagsingba han adlaw, ngan ginsunog an mga karuwahe nga ginggamit han ira pagsingba. (Ginhimos ini ha libong han Templo, hirani han ganghaan ngan diri hirayo han urokyan ni Natanmelec, usa nga dako nga opisyal.)

12Ginruba ni Hadi Josias an mga altar nga gintindog han mga hadi han Juda ha atop han palasyo, igbaw han kwarto ni Hadi Acas, pati an mga altar nga gintindog ni Hadi Manases didto han duha nga libong han Templo; ginrumok niya an mga altar ngan iginlabog ini ngadto ha Kahamub-an Kidron.

13Ginpukan ni Josias an mga altar nga gintindog ni Hadi Solomon ha sinirangan han Jerusalem, ha timogan han Bukid han mga Olibo, para han pagsingba han makapupungot nga mga diyosdiyos—hi Astarot nga diyosa han Sidon, hi Camos nga diyos han Moab, ngan hi Moloc nga diyos han Amon.

14Ginrumok ni Hadi Josias an bato nga mga harigi, ginruba an ladawan han diyosa nga hi Asera, ngan ginluob niya hin mga tul-an hin tawo an tuna nga gintindogan hini mga kadiyosan.

15Ginruba liwat ni Josias an dapit hin pagsingba ha Betel, nga gintindog ni Hadi Jeroboam nga anak ni Nebat, nga nagtutdo hin pakasala han Israel. Ginrumpag ni Josias an altar, ginrumok ngan ginpulbos an mga bato; ginsunog liwat niya an ladawan nga iginhalad ha pagsingba kan Asera.

16Niyan tinman-aw hi Josias palibot ngan hinkit-an niya in mga lubnganan didto han pungtod; ginpakuha niya an mga tul-an ngan ginsungo ha altar. Tungod hini nga iya ginbuhat, ginhugawan niya an altar, ngan natuman niya an igintagna han manaragna hadto pa ha panahon han pagsaurog nira hin pyesta samtang natindog sapit han altar hi Hadi Jeroboam. Sinmiplat hi Hadi Josias ngan hinkit-an an lubnganan han manaragna nga naghatag hini nga panagna.

17“Kanay ito lubnganan?” pinmakiana hiya. Binmaton an mga tawo han Betel, “Lubnganan ito han manaragna nga inmabot tikang ha Juda ngan nanagna hini nga mga butang nga ginbuhat mo hini nga altar.”

18“Pabay-i la ito,” nagsugo hi Josias, “kinahanglan diri pagbantaron an iya mga tul-an.” Sanglit waray paglabti an iya mga tul-an, sugad man adton kanan manaragna nga tikang ha Samaria.

19Ginruba ni Hadi Josias ha kada syudad han Israel an ngatanan nga pagano nga mga dapit hin pagsingba, nga gintindog han mga hadi han Israel, nga tungod hini nakaaghat han kasina han Ginoo. Ginbuhat niya hini ngatanan nga mga altar an ginbuhat niya ha Betel.

20Ginpamatay niya an ngatanan nga pagano nga kapadian dida han mga altar nga ira gin-alagaran ngan ginsunog niya in mga tul-an hin tawo ha tagsa nga altar. Katapos inmoli hiya ha Jerusalem.

21Ginsugo ni Hadi Josias an mga tawo hin pagsaurog han Paglabay ha pagpasidungog han Ginoo nga ira Dyos, sumala han nahisurat dida han Basahan han Ginsaaran.

22Waray pa gud Paglabay nga sugad hini nga ginsaurog han bisan hin-o nga hadi han Israel o han Juda, tikang han panahon nga mga maghurukom pa an nagdudumara han nasod.

23Kundi yana ha ika-18 ka tuig nga pagkahadi ni Josias, ginsaurog ha Jerusalem an Paglabay.

24Basi pagtumanon an mga balaod nga nahisurat ha basahan nga hin-agian ha Templo ni Hilkias nga Labaw nga Padi, ginkuha ni Hadi Josias ha Jerusalem ngan ha bug-os nga Juda an ngatanan nga mga diwatahan ngan mga paratigo, ngan an ngatanan nga kadiyosan ha panimalay, mga diyosdiyos, ngan iba pa nga pagano nga mga garamiton hin pagsingba.

25Waray pa gud hadi nga una o orhe ha iya nga sugad ha iya nga nag-alagad han Ginoo ha bug-os niya nga kasingkasing, hunahuna, ug kusog, nga nagsugot han ngatanan nga Balaod ni Moises.

26Kundi waray gihapon mapapas an mapintas nga kasina han Ginoo kontra han Juda tungod han ginbuhat ni Hadi Manases.

27Nagsiring an Ginoo, “Bubuhaton ko han Juda an ginbuhat ko han Israel: paiiwason ko ha akon atubangan an mga tawo han Juda, ngan isisikway ko an Jerusalem nga ginpili ko nga syudad, ngan an Templo, an dapit nga ginsiring ko nga pagsisingbahan ha akon.”

28Nahisurat dida han Kasaysayan han Kahadian han Juda an iba pa nga nabuhat ni Hadi Josias.

29Samtang hadi pa hi Josias, nagpangulo hin kasondalohan hi Hadi Neco han Ehipto ngan kinmadto hira ha salog han Eufrates hin pagbulig han hadi han Asiria. Gintapo ni Hadi Josias an kasondalohan nga Ehiptohanon didto ha Megido, ngan namatay hi Hadi Josias ha pag-awayan.

30Ginbutang ha karuwahe an iya lawas ngan gindara han iya mga opisyal ngadto ha Jerusalem, diin iginlubong hiya didto han lubnganan han mga hadi. Ginpili han mga tawo han Juda hi Joacas nga anak ni Josias, ngan gindihogan hiya nga hadi.

31Baynte tres na an panuigon ni Joacas han kahimo niya nga hadi han Juda, ngan naghadi hiya ha Jerusalem hin tulo ka bulan. Iroy niya hi Hamutal nga anak ni Jeremias nga taga syudad han Libna.

32Nakasala han Ginoo hi Joacas kay nagsunod hiya han susbaranan han iya kaapoy-apoyan.

33Natapos an iya paghadi han pagbihaga ha iya ni Hadi Neco han Ehipto didto ha Ribla, ha tuna han Hamat, ngan ginpabayad an Juda hin buhis nga 3,400 ka kilo nga salapi ngan 34 ka kilo nga bulawan.

34Ginhimo ni Hadi Neco nga hadi han Juda hi Eliaquim nga anak liwat ni Josias nga liwan kan Josias, ngan Joakim an iya ngaran han paghadi niya. Gindara ha Ehipto ni Hadi Neco hi Joacas, ngan namatay hiya didto.

35Nagsukot hin buhis ha mga tawo hi Hadi Joakim, sumala han angay han ira hiagi, basi makatirok han kantidad nga ginkikinahanglan hin pagbayad han buhis nga gin-aro han hadi han Ehipto.

36Baynte singko na an panuigon ni Joakim han kahimo niya nga hadi han Juda, ngan naghadi hiya ha Jerusalem hin 11 ka tuig. Iroy niya hi Sebida nga anak ni Fadaya nga taga-Ruma.

37Nakasala han Ginoo hi Joakim, nga nagsunod hiya han susbaranan han iya kaapoy-apoyan.

← Chapter 22 Jump to: Chapter 24 →