Deuteronomy 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1本書係記載摩西所講个話。當以色列人在約旦河東片个曠野、疏弗對面个約旦河谷，就在巴蘭城㧯陀弗、拉班、哈洗錄、底撒哈這兜城鎮中間，摩西向眾人講以下个話。

2(對何烈山經過以東山區到加低斯‧巴尼亞需要十一日个路程。)

3在以色列人出埃及後个第四十年十一月初一，摩西將上主命令佢講个話全部㧯佢等講。

4該時，佢已經打贏用希實本做京城个亞摩利王西宏㧯用亞斯他錄、以得來做京城个巴珊王噩。

5摩西在約旦河東片个摩押地向以色列人解釋上主个教示。佢講：

6「𠊎等還在何烈山个時，上主 — 𠊎等个上帝對𠊎等講：『你等已經在這山頂住罅久了。

7這下你等愛徙營，向前行。你等愛進入亞摩利人个山區㧯附近逐所在 — 就係約旦河谷、山地、高原、南區㧯地中海滣，也就係講，你等愛進入迦南、黎巴嫩㧯對該位到幼發拉底河个土地。

8這垤土地就係𠊎 — 上主應許愛給你等祖先亞伯拉罕、以撒、雅各㧯佢等後代个土地。你等愛入去，佔領這垤土地。』」

9摩西對人民講：「𠊎等還在何烈山个時，𠊎㧯你等講過：『𠊎無法度自家一儕擔當帶領你等个責任。

10上主 — 你等个上帝已經使你等人口增加，像天頂个星仔恁多。

11願上主 — 你等祖先个上帝照佢自家个應許使你等个人口再增加千倍，使你等興旺。

12總係𠊎一儕愛樣般擔當你等混雜个事情，㧯為你等排解困難个責任呢？

13你等愛對逐支族選出有智慧、有才調、受尊敬个人來；𠊎愛設立佢等來管理你等。』

14「你等識同意應該恁樣做。

15所以，𠊎設立該兜逐支族選出來个有智慧、受尊敬个人來管理你等：有負責管一千人个，有管一百人个，有管五十人个，有管十人个。𠊎又對逐支族另外設立其他个官員。

16「該時，𠊎指示你等个審判官講：『你等愛處理民間个官司。無論係同胞中間个糾紛，抑係㧯你等當中外族人个糾紛，你等攏總愛公正審判。

17你等愛公正對人無偏心，無論地位高低，全部毋好看人个情面。毋好驚麼人，因為你等係代上帝審判个。若係你等有困難个案件，做得送到𠊎這位來，𠊎會處理。』

18該時，𠊎也將其他應該做个事全部指示你等了。」

19「𠊎等遵照上主 — 𠊎等上帝个命令，離開何烈山，經過你等所看到該當闊、當得人驚个曠野，去亞摩利人个山區。𠊎等到加低斯‧巴尼亞个時，

20𠊎識對你等講：『這下，你等已經到亞摩利人个山區，就係上主 — 𠊎等个上帝賜給𠊎等个土地。

21看啊，上主 — 你等个上帝已經將這垤土地擺在面前。你等愛遵照上主 — 你等祖先个上帝所命令个去佔領；毋好驚，毋好失志。』

22「總係你等全部來見𠊎，向𠊎建議講：『𠊎等想愛先派人去打探該垤土地，喊佢等轉來報告愛行个路線㧯愛攻打个城。』

23「𠊎認為恁樣做無毋著，就對逐支族選一儕，一共選出來十二儕。

24佢等進入山區，一直到以實各山壢去打探。

25佢等帶轉該地个果子，報告講：『上主 — 𠊎等个上帝賜給𠊎等个係當靚个土地。』

26「總係，你等悖逆上主 — 你等上帝个命令，毋肯進入該土地。

27你等在帳篷肚怪怨講：『上主惱𠊎等！佢𢱋𠊎等出埃及，係愛將𠊎等交給亞摩利人，來除滅𠊎等。

28𠊎等樣愛使入去呢？探仔个報告使𠊎等非常驚。佢等講：該地方个人比𠊎等較強壯高大；佢等住在堅固个城肚，城牆高到堵天。𠊎等還在該位看到亞衲族个人！』

29「總係𠊎㧯你等講：『毋好驚佢等！

30上主 — 你等个上帝愛帶領你等，為你等來相㓾，像頭擺恁樣。你等有親目看到佢在埃及㧯曠野為你等所做个一切。

31上主 — 你等个上帝識帶領你等一路平安到這地方，像阿爸揹自家个孻仔恁樣。』

32總係，無論𠊎樣般講，你等還係毋肯信靠上主 — 你等个上帝。

33雖然恁樣，上主從頭到尾行在你等頭前，為你等尋安營个地方。佢暗晡時用火柱，日時頭用雲柱，帶領你等个路程。」

34「上主聽到你等怪怨，非常發譴，發誓講：

35『你等這邪惡个一代，麼人也做毋得看𠊎應許賜給你等祖先該盡靚个土地；

36只有耶孚尼个孻仔迦勒做得看。因為佢一心一意跈等𠊎；𠊎愛將佢行過个土地賜給佢㧯佢个子孫。』

37因為你等个緣故，上主也對𠊎發譴。佢講：『連你也做毋得進入該垤土地。

38總係你个助手、嫩个孻仔約書亞做得入去；你愛鼓勵佢堅強起來，因為佢會帶領以色列人佔領該垤土地。』

39「接等，上主對𠊎等講：『該兜今晡日還毋會分別是非个細人仔，你等恅到會被敵人捉去个，反轉會進入該垤土地。佢等會佔領該垤土地；因為𠊎愛賜給佢等。

40總係你這兜人，你等愛斡轉頭，愛轉到向紅海路上个曠野去。』

41「你等應講：『摩西啊！𠊎等得罪上主！這下𠊎等愛遵行上主 — 𠊎等上帝个命令，去相㓾。』你等逐儕帶等武器，準備相㓾，恅到隨便就做得佔領該山區。

42「總係，上主對𠊎講：『你愛警告佢等，毋好去相㓾，免得被敵人打輸掉，因為𠊎毋㧯佢等同在。』

43𠊎將上主个話㧯你等講，總係你等毋聽。你等悖逆上主个命令，強強向山區前進。

44住在該山區个亞摩利人像歸大陣个蜂仔恁樣出來面對你等。佢等將你等逐到以東山區个何珥瑪，在該位打敗你等。

45該時你等轉來，在上主面前哀求；總係佢毋肯聽你等个哀求，毋插你等。

46你等就在加低斯住一站當久个時間。」

Jump to: Chapter 2 →