Deuteronomy 14

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 13 Jump to: Chapter 15 →

1「你等係上主 — 你等上帝个子女。你等為死人哀傷个時，做毋得像外族人割傷自家个身體，剃光額頭；

2因為你等係聖潔个人，屬上主 — 你等个上帝；佢對天下萬民中揀選你等做佢自家寶貝个子民。」

3「上主宣佈一切得人惱个東西，你等做毋得食。

4你等做得食个動物係：牛、綿羊、山羊、

5野鹿、野綿羊、野山羊、羚羊。

6所有腳蹄分做兩瓣，又會倒草个動物，你等全部做得食；

7總係該兜只有腳蹄分瓣，抑係單淨會倒草个動物，就做毋得食。駱駝、兔仔、獾，係無淨浰个動物，全部做毋得食；因為牠兜雖然會倒草，總係腳蹄無分瓣。

8豬仔係無淨浰个動物，也做毋得食；因為豬仔雖然腳蹄分瓣，總係毋會倒草。這兜無淨浰動物个肉，你等做毋得食，連摸牠兜个屍體也做毋得。

9「所有在水肚，有魚翼有鱗个魚類，你等全部做得食；

10總係無魚翼無鱗个魚類，你等做毋得食；你等愛將牠兜算做無淨浰个。

11「所有算做淨浰个鳥仔，你等全部做得食。

12做毋得食个鳥仔係：鷹鳥、禿鷹、鷂婆、鳶、獵鷹、烏鴉㧯牠共類个、鴕鳥、梟、海鷗、鷹雀㧯牠共類个、鴟鴞、鸕鶿、貓頭鳥、角鴟、鵜鶘、鵰、鸛鳥、白鶴㧯牠共類个、戴鵀、㧯蝠婆。

19「凡係有翼胛个昆蟲，你等愛將牠兜算做無淨浰个，全部做毋得食。

20凡係淨浰个昆蟲，你等全部做得食。

21「凡係自然死掉个動物，你等全部做毋得食；總係做得給你等城肚个外族人食，抑係賣給其他个外族人食；因為你等係神聖个子民，屬上主 — 你等个上帝。「做毋得用羊乸个乳來煮細羊仔。」

22「你等愛對逐年土地个收成中拿十分之一出來，

23到上主 — 你等上帝所選愛設立佢个名个所在，在佢面前食所獻該十分之一个五榖、酒、橄欖油，㧯頭胎个牛羊。你等愛實行這條例，學習常常敬畏上主 — 你等个上帝。

24若係你等个屋離開上主所選愛設立佢个名个所在當遠，毋使將上主 — 你等个上帝使你等豐收个十分之一運到該位，

25你等做得賣土產㧯頭牲，將錢帶到上主 — 你等个上帝所選个所在。

26你等做得照自家个意思在該位用錢買牛、羊、酒、釅酒，抑係你等心肝所想愛个。你等全家愛在上主 — 你等上帝面前食啉快樂。

27「你等做毋得無顧到住在你等城肚个利未人，因為佢等無自家个產業。

28每三年个最後一年，你等愛將該年个十分之一運到城肚囤起來。

29這兜存糧係愛供應無自家產業个利未人，還有你等城肚个外族人、孤兒㧯寡婦。佢等做得來食到飽足。你等恁樣做，上主 — 你等个上帝就會在你等所做个一切事上賜福給你等。」

← Chapter 13 Jump to: Chapter 15 →