Deuteronomy 2

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 1 Jump to: Chapter 3 →

1「後來，𠊎等遵照上主个命令轉方向，順等紅海滣个路去曠野。𠊎等在以東山區捩一站當久个時間。

2「後來，上主㧯𠊎講，𠊎等已經在這山野地區𫟧來𫟧去𫟧罅了，應該轉向北片行。

4佢愛𠊎將以下个話吩咐你等講：『你等會經過以東山區，就係你等个遠親以掃後代个地區。雖然佢等會驚你等，總係你等愛注意，

5做毋得㧯佢等相㓾；因為𠊎毋將這垤土地賜給你等，連踏腳个地方也無給你等。𠊎已經將以東山區賜給以掃个後代做產業。

6你等做得用錢向佢等買食个㧯啉个東西。』

7「愛知，上主 — 你等个上帝樣般在你等所做个事賜福給你等。你等在該當闊个曠野流浪个時，佢照顧你等。四十年來，佢㧯你等共下，你等並無欠麼介。

8「恁樣，𠊎等𫟧過以東，就係𠊎等遠親以掃後代个地區，對以拉他㧯以旬‧迦別到死海个路，向東北摩押曠野个路去。

9上主對𠊎講：『你等毋好惹摩押人，也做毋得㧯佢等相㓾。𠊎已經將亞珥城賜給羅得个後代做產業；𠊎毋將佢等个土地給你等。』」

10(以前有一個當勇壯高大个種族住在亞珥城；佢等人盡多，身材㧯亞衲族个人共樣恁高大。

11佢等㧯亞衲人共樣，也算做利乏音人，總係摩押人喊佢等以米人。

12何利人識住在以東；以掃个後代將佢等逐走，消滅佢等，住在該位，就像以色列人對上主賜給佢等个土地將敵人逐走共樣。)

13「後來，𠊎等遵照上主个命令過撒烈山壢。

14𠊎等對離開加低斯‧巴尼亞到過去撒烈山壢，共有三十八年久。照上主所發个誓，該世代个戰士全部死淨淨了。

15上主親自攻擊佢等，直到將佢等對營中全部消滅掉。

16「該兜戰士對人民中全部死掉以後，

17上主對𠊎講：

18『今晡日，你等愛對亞珥城經過摩押个地區。

19然後你等會來到羅得後代亞捫人个地區；總係你等毋好惹亞捫人，也做毋得㧯佢等相㓾。𠊎已經將這垤土地賜給羅得个後代做產業；𠊎毋將佢等个土地給你等。』」

20(這垤土地也算做利乏音地，因為原來个人民係利乏音人。亞捫人喊佢等散組明人。

21佢等个身材㧯亞衲族个人共樣恁高大，人口盡多，係當勇壯个種族。總係上主消滅佢等；亞捫人就佔領該垤土地，住在該位。

22上主識為以掃个後代 — 以東人完成共樣个事。佢消滅住在以東山區个何利人；以東人就佔領該片土地，住在該位，一直到今晡日。

23該兜對克里特島來个人識住在地中海滣頭；佢等消滅原住民亞衛人，佔領佢等个土地，住在該位，直到南部个迦薩城。)

24「𠊎等經過摩押後，上主㧯𠊎等講：『這下你等愛出發，過亞嫩山壢。𠊎將該用希實本做京城个亞摩利王西宏㧯佢个土地全部交在你等手中。你等愛㧯佢相㓾，佔領佢个土地。

25對今晡日開始，𠊎愛使天下萬民全部驚你等。佢等一聽到你等个名就會驚到愊愊掣。』」

26「後來，𠊎對基底莫曠野派使者到希實本去見西宏王，用和睦个話對佢講：

27『請俾𠊎等經過你个土地。𠊎等單淨行大路，無偏左右，一直行大路。

28𠊎等願意出錢向你等買食个㧯啉个東西。𠊎等單淨愛經過你个土地，

29過約旦河，進入上主 — 𠊎等上帝愛賜給𠊎等个土地。住在以東个以掃後代㧯住在亞珥城个摩押人全部俾𠊎等經過佢等个土地。』

30「總係，希實本王西宏毋肯俾𠊎等經過佢个土地。上主 — 𠊎等个上帝使佢硬頸又硬殼，好俾𠊎等打贏佢，佔領佢个土地；到今晡日𠊎等還係佔領這垤土地。

31「後來，上主對𠊎講：『看哪，𠊎已經將西宏王㧯佢个土地交給你等了。你等這下入去佔領。』

32西宏帶領全軍出來，在雅雜城㧯𠊎等相㓾。

33總係上主 — 𠊎等个上帝將佢等全部交給𠊎等。𠊎等㓾死佢、佢該兜孻仔，㧯所有个戰士。

34「𠊎等又佔領、打壞逐個城市，將城肚个人，無分男女老幼，全部㓾淨淨，一個也無留。

35𠊎等將頭牲㧯城肚个財物攏總搶淨淨。

36上主 — 𠊎等个上帝使𠊎等佔領所有个城鎮，對亞嫩山壢堘頭个亞羅珥，到山壢中央个城鎮，一直到基列，全部佔領下來。

37總係照上主 — 𠊎等上帝个禁令，𠊎等無接近亞捫人个土地抑係雅博山壢兩片个地方，也無行過山區所有个城鎮。」

← Chapter 1 Jump to: Chapter 3 →