Deuteronomy 16

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 15 Jump to: Chapter 17 →

1「你等一定愛在亞筆月守𨃟過節，對上主 — 你等个上帝表示尊敬，因為佢識在這隻月个一個暗晡救你等出埃及。

2你等愛到上主 — 你等上帝所選愛設立佢个名个所在，在該位㓾牛羊，做𨃟過節个牲儀獻給佢。

3𨃟過節个食物做毋得有發酵个。你等一定愛食無酵餅七日，就像該年你等緊緊促促離開埃及。這種餅又安到苦難餅；你等愛食，使你等一生人紀念出埃及、離開苦難該日。

4這七日，你等境內个逐家全部不准有發酵；第一暗晡所㓾頭牲个肉愛在該暗晡食掉，做毋得留到第二朝晨。

5「你等愛在上主 — 你等个上帝所選愛設立佢个名个所在㓾𨃟過節个頭牲，做毋得在佢愛賜給你等个其他城肚來㓾。愛等日頭落山以後正㓾，因為出埃及當時係在日頭落山个時。

7愛在上主 — 你等个上帝所選个所在煮祭肉，食祭肉，第二朝晨就轉屋下去。

8你等愛繼續食無酵餅六日；第七日愛聚集敬拜上主 — 你等个上帝，做毋得工作。」

9「你等愛對開始收割該日，算七禮拜，

10然後守七七收割節，對上主 — 你等个上帝表示尊敬。你等愛照佢所賞賜个收成，帶等甘心祭來獻給佢。

11你等㧯你等个子女、奴僕、奴婢、住在你等城肚个利未人、並在你等中間个外族人、孤兒㧯寡婦，愛在上主 — 你等个上帝所選愛設立佢个名个所在共下歡喜慶祝。

12你等一定愛確實遵守這兜條例；毋好毋記得你等識在埃及做過奴才。」

13「你等囤好五榖㧯新酒以後，愛守搭寮仔節七日。

14你等㧯你等个子女、奴僕、奴婢、並住在你等城肚个利未人、外族人、孤兒、寡婦，愛共下歡喜慶祝。

15你等愛在上主 — 你等个上帝所選个所在守搭寮仔節七日，表示尊敬。大家愛歡喜快樂；因為上主 — 你等个上帝會使你等豐收，使你等所做个全部順利。

16「全國所有个男人愛一年三擺，就係在𨃟過節、七七收割節、搭寮仔節，到上主 — 你等个上帝所選个所在敬拜佢。毋好空手去。

17逐儕愛照上主 — 你等个上帝所賜个福份，盡自家个能力，帶禮物獻給佢。」

18「你等愛對各支族中，為上主 — 你等个上帝所賜給你等个城鎮設立審判官㧯其他官員。這兜人一定愛用公平審判人民，

19愛公正無偏心，毋好亂用職權；也做毋得被人收買，因為被人收買會使明理个人青盲，使公正个人顛倒是非。

20你等執行法律愛追求公平正直。恁樣，你等正會有好承接上主 — 你等个上帝所愛賜給你等个土地，長久住在該位。

21「你等為上主 — 你等个上帝起祭壇个時，做毋得在堘頭設立亞舍拉女神个樹𣎴仔，

22也做毋得設立石𣎴仔來拜，因為該係上主 — 你等个上帝所惱个。」

← Chapter 15 Jump to: Chapter 17 →