Deuteronomy 18

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 17 Jump to: Chapter 19 →

1「利未支族个祭司，就係利未全支族，在以色列中做毋得有自家个土地㧯產業。佢等个生活愛倚靠人民獻給上主个祭物㧯奉獻。

2佢等無像其他支族个人有自家个產業；照上主个應許，上主自家就做佢等个產業。

3「人民獻牛羊做牲儀个時，愛將前腿、下頷㧯腹內分給祭司。

4你等也愛將新出个五榖、新酒、橄欖油，㧯新剪个羊毛交給佢等；

5因為上主 — 你等个上帝對各支族中揀選利未人㧯佢等个子孫，永遠奉上主个名做祭司。

6「利未人若係自願離開佢在以色列中住个城鎮，一心一意到上主所選个所在，

7就做得奉上主 — 佢上帝个名做祭司，㧯該所在其他利未人共下同工事奉上主。

8佢㧯其他个祭司愛接受平多个糧食。佢屋下多送給佢个，佢還做得留等。」

9「你等進入上主 — 你等个上帝所愛賜給你等个土地之後，做毋得跈該地各民族所行得人惱个壞風俗。

10你等做毋得將子女放在祭壇頂燒；也做毋得卜卦、算命、行邪術、

11畫符筊、求問鬼神抑係死人个陰魂。

12上主盡惱做這種壞事个人。所以，上主 — 你等个上帝愛在你等面前除掉該兜民族。

13你等絕對愛對上主 — 你等个上帝完全忠心。」

14接等，摩西講：「你等愛佔領个地，該兜民族聽從卜卦㧯算命个話；總係上主 — 你等个上帝不准你等恁樣做。

15上主 — 你等个上帝愛對你等同胞中間為你等興起一位像𠊎恁樣个先知；你等愛聽從佢。

16「你等聚集在何烈山該日，懇求上主 — 你等个上帝，講：『毋好再俾𠊎等聽到上主 — 𠊎等个上帝講話，也毋好再俾𠊎等看到佢在火焰中出現，免得𠊎等黏時死掉。』

17對恁樣，上主就㧯𠊎講：『佢等个要求盡著。

18𠊎愛對佢等同胞中間為佢等興起一位像你恁樣个先知。𠊎愛將所愛講个話親自㧯佢講；佢愛將𠊎一切个命令㧯人民講。

19佢愛奉𠊎个名講𠊎喊佢講个話；麼人毋聽從，麼人就會受責罰。

20若係有先知無𠊎个命令，總係借𠊎个名講話，抑係有先知用別个神明个名講話，佢一定愛處死刑。』

21「你等可能會想：『愛樣般正會知，該毋係上主所講个話？』

22若係有先知自家認為代上主講話，總係佢所講个話並無實現，恁樣，佢个話就毋係上主所講个。該先知係照自家个意思講話，你等毋使驚佢。」

← Chapter 17 Jump to: Chapter 19 →