Proverbs 10

Chinese TTVR (現代台語譯本羅馬字版)

← Chapter 9 Jump to: Chapter 11 →

1Só͘-lô-bûn ê chim-giân: Tì-hūi ê kiáⁿ hō͘ lāu-pē hoaⁿ-hí; gû-gōng ê kiáⁿ hō͘ lāu-bú iu-būn.

2Put-gī ê chîⁿ-châi lóng bô lī-ek; chí-ū kong-gī ōe kiù lâng thoat-lī sí-bông.

3Siōng Chú bōe hō͘ gī-lâng iau-gō; I ōe phò-hoāi pháiⁿ-lâng ê khì-tô͘.

4Pîn-tōaⁿ hō͘ lâng sàn-chhiah; kut-la̍t hō͘ lâng hù-chiok.

5Chiàu-sî siu-sêng--ê sī chhong-bêng-lâng; siu-koah ê sî ài-khùn--ê sī pāi-ka-chú.

6Gī-lâng ê thâu-khak téng ū chiok-hok; pháiⁿ-lâng ê chhùi chhàng kiông-pō.

7Gī-lâng ê miâ-siaⁿ siū chheng-chàn; pháiⁿ-lâng it-tēng lâu chhàu-miâ.

8Sim-lāi chhong-bêng, ōe thiaⁿ-siū bēng-lēng; chhùi kóng gōng-ōe, it-tēng sit-pāi.

9Kiâⁿ-lō͘ chèng-ti̍t, kha-pō͘ chiū an-ún; hêng-ûi put-chèng, kàu-bé ōe lō͘-hiān.

10Ok-ì sái-ba̍k-bé, chè-chō kiù-hun; thán-pe̍k khó͘-khǹg lâng, chhiok-chìn hô-pêng.

11Gī-lâng ê chhùi sī oa̍h-miā ê chúi-chôaⁿ; pháiⁿ-lâng ê chhùi chhàng kiông-pō.

12Oàn-hūn jiá-khí hun-cheng; jîn-ài jia-khàm lóng-chóng ê kè-sit.

13Bêng-lí ê lâng chhùi-lāi ū tì-hūi; bû-ti ê lâng ê ka-chiah ū chhê-á piān-piān teh tán.

14Tì-hūi ê lâng chek-chū tì-sek; gōng-lâng ê chhùi chin khoài tì-kàu sit-pāi.

15Châi-hù sī hó-gia̍h-lâng ê pó-chiong; pîn-khùn sī sàn-chhiah-lâng ê chai-lān.

16Gī-lâng ê pò-siúⁿ sī sìⁿ-miā; pháiⁿ-lâng ê kang-chîⁿ sī hêng-hoa̍t.

17Thiaⁿ-siū khoàn-kài, kiâⁿ oa̍h-lō͘; khì-sak chek-pī, kiâⁿ bê-lō͘.

18Am-khàm oàn-hūn ê lâng, chhùi kóng pe̍h-chha̍t; sì-kòe chō-iâu--ê sī gōng-lâng.

19Kāu-ōe lân-bián ū kè-sit; iok-sok chhùi-chi̍h chiah sī chhong-bêng.

20Gī-lâng ê chi̍h chhin-chhiūⁿ sûn ê gûn; pháiⁿ-lâng ê sim bô kè-ta̍t.

21Gī-lâng ê chhùi pôe-iúⁿ chin chōe lâng; gōng-lâng in-ūi bû-ti sí-bông.

22Siōng Chú sù ê hok-khì hō͘ lâng hù-chiok, lāi-bīn bô chham iu-khó͘.

23Gû-gōng ê lâng khòaⁿ choh-ok chòe khoài-lo̍k; bêng-lí ê lâng khòaⁿ tì-hūi chòe hoaⁿ-hí.

24Pháiⁿ-lâng só͘ kiaⁿ--ê, ōe lîm-kàu i; gī-lâng só͘ ì-ài--ê, ōe tit--tio̍h.

25Kông-hong chhe--kè, pháiⁿ-lâng chiū siau-sit; gī-lâng ōe éng-oán an-ún khiā-chāi.

26Chhe pîn-tōaⁿ-lâng chòe tāi-chì, chhin-chhiūⁿ chhùi-khí hō͘ chhò͘ sng--tio̍h, ba̍k-chiu hō͘ ian hun--tio̍h.

27Kèng-ùi Siōng Chú ōe ke-thiⁿ ji̍t-chí; pháiⁿ-lâng ê nî-hè ōe kiám-chió.

28Gī-lâng ê ǹg-bāng tòa-lâi hoaⁿ-hí; pháiⁿ-lâng ê kî-thāi kàu-bé lo̍k-khong.

29Siōng Chú ê tō-lō͘ tùi chèng-ti̍t ê lâng sī pó-chiong, tùi chòe pháiⁿ ê lâng sī húi-bia̍t.

30Gī-lâng éng-oán bōe tōng-iâu; pháiⁿ-lâng bōe-tàng khiā-khí tī èng-ún ê tōe.

31Gī-lâng ê chhùi hoat-chhut tì-hūi; oai-khiok sī-hui ê chi̍h ōe siū koah-tn̄g.

32Gī-lâng kóng-ōe ha̍p-gî; pháiⁿ-lâng chhut-chhùi oai-khiok sī-hui.

← Chapter 9 Jump to: Chapter 11 →