Proverbs 16

Chinese TTVR (現代台語譯本羅馬字版)

← Chapter 15 Jump to: Chapter 17 →

1Lâng teh kè-ōe, Siōng Chú teh koat-tēng.

2Lâng khòaⁿ ka-kī ê só͘-chòe chòe tio̍h, m̄-kú Siōng Chú sím-cha lâng ê tōng-ki.

3Chiong lí ê só͘-chòe kau-thok Siōng Chú, lí ê kè-ōe chiū ōe sêng-kong.

4Siōng Chú só͘ chō--ê lóng ū bo̍k-te̍k, liân pháiⁿ-lâng bia̍t-bông ê ji̍t mā-sī I ê kè-ōe.

5Siōng Chú iàm-ò͘ⁿ sim kiau-ngō͘ ê lâng; pháiⁿ-lâng it-tēng siū hêng-hoa̍t.

6In-ūi chû-ài sìn-si̍t, chōe-kò tit-tio̍h jia-khàm; kèng-ùi Siōng Chú, lâng thang lī-khui siâ-ok.

7Lâng ê só͘-chòe nā hō͘ Siōng Chú hoaⁿ-hí, Siōng Chú ōe hō͘ tùi-te̍k kap i hô-hó.

8Thàn-chîⁿ chió, ū kong-tō, khah iâⁿ thàn-chîⁿ chōe bô kong-tō.

9Lâng kè-ōe ka-kī ê tō-lō͘; Siōng Chú ín-chhōa i ê kha-pō͘.

10Ông ê chhùi kóng Siōng-tè chí-sī ê ōe, i ê sím-phòaⁿ chiū bōe chha-chhò.

11Kong-tō ê thian-phêng kap chhìn lóng sio̍k Siōng Chú; tē-á lāi ê chhìn-thûi lóng sī I só͘ chè-tēng.

12Chòe pháiⁿ sī ông só͘ iàm-ò͘ⁿ; ông-ūi khò kong-gī kiàn-li̍p.

13Kong-chèng ê chhùi-tûn sī ông só͘ hoaⁿ-hí; kóng-ōe chèng-ti̍t sī ông só͘ ì-ài.

14Ông ê tōa siū-khì chhin-chhiūⁿ sí-bông ê sù-chiá; tì-hūi ê lâng ōe hō͘ i ê siū-khì soah.

15Ông kong-chhái ê bīn hō͘ lâng ū sìⁿ-miā; ông ê un-hūi chhin-chhiūⁿ chhun-ú ê hûn.

16Tit-tio̍h tì-hūi pí tit-tio̍h kim khah hó; kéng-tio̍h chhong-bêng pí tit-tio̍h gûn koh-khah hó.

17Chèng-ti̍t-lâng ê tōa-lō͘ lī-khui pháiⁿ; kín-sīn ka-kī ê kha-pō͘ ōe pó-choân sìⁿ-miā.

18Ū kiau-ngō͘ chiū ū sit-pāi; ū chū-ko chiū ū poa̍h-tó.

19Sim khiam-pi kap sàn-chhiah-lâng chòe-hé tòa, khah iâⁿ kap kiau-ngō͘ ê lâng pun só͘ chhiúⁿ ê mi̍h.

20Thiaⁿ-thàn tō-lí, ōe tit-tio̍h lī-ek; óa-khò Siōng Chú, chin ū hok-khì.

21Sim ū tì-hūi chheng-chòe thong-ta̍t; kóng-ōe bûn-ngá ōe hō͘ lâng sim ho̍k.

22Chhong-bêng-lâng ê tì-hūi sī i oa̍h-miā ê chúi-chôaⁿ; gōng-lâng ê gōng sī i ê chek-hoa̍t.

23Tì-hūi ê lâng ê sim iok-sok i ê chhùi, hō͘ i ê ōe ke-thiⁿ sòe-ho̍k-le̍k.

24Chhin-chhiat ê ōe chhin-chhiūⁿ bi̍t, hō͘ sim hoaⁿ-hí, hō͘ kut ióng-kiāⁿ.

25Ū chi̍t tiâu lō͘ khòaⁿ--khí-lâi chiàⁿ koh ti̍t, kàu-bé thàng kàu sí-bông.

26Chòe-kang-lâng ūi-tio̍h kò͘ pak-tó͘ chòe kang; pak-tó͘ iau pek in phah-piàⁿ.

27Lô͘-môa kè-bô͘ beh hāi lâng; i ê chhùi-tûn chhin-chhiūⁿ teh to̍h ê hé.

28Oai-khiok sī-hui ê lâng sì-kòe chè-chō hun-cheng; gâu o̍h-ōe ê lâng hō͘ chhin-bi̍t ê pêng-iú pìⁿ-bīn.

29Kiông-pō ê lâng ín-iú chhù-piⁿ, chhōa in kiâⁿ pháiⁿ-lō͘.

30Nih-ba̍k sī-ì sī teh tô͘-bô͘ siâ-ok; chhùi-tûn kā-ân piáu-sī kian-koat chòe pháiⁿ.

31Pe̍h thâu-mn̂g sī êng-iāu ê hoa-koan, si̍t-hêng kong-gī chiah ōe tit--tio̍h.

32Jím-nāi iâⁿ-kè ui-le̍k; gâu khòng-chè ka-kī khah iâⁿ cheng-ho̍k kui-chō siâⁿ.

33Lâng thiu-chhiam koat-tēng tāi-chì; chòe-āu ê koat-tēng chāi-tī Siōng Chú.

← Chapter 15 Jump to: Chapter 17 →