Proverbs 9

Chinese TTVR (現代台語譯本羅馬字版)

← Chapter 8 Jump to: Chapter 10 →

1Tì-hūi ū khí-chhù, chhāi chhit ki chio̍h-thiāu;

2ū thâi cheng-siⁿ, tiâu-hô chiú, koh pān-toh.

3I chhe lú-pī chhut--khì, tī siâⁿ-lāi siōng-koân ê só͘-chāi soan-pò͘,

4“Gōng-ti̍t ê lâng lóng oat-lâi chia.” Tì-hūi kā bû-ti ê lâng kóng,

5“Lín lâi, lâi chia̍h góa ê piáⁿ, lim góa tiâu-hô ê chiú.

6Lín pàng-sak bû-ti chiū tit-tio̍h sìⁿ-miā, mā tio̍h kiâⁿ kng-bêng ê lō͘.”

7Kiù-chèng ài biáu-sī lâng--ê, pún-sin ōe siū lêng-jio̍k; khiàn-chek pháiⁿ-lâng, ka-kī chhú kiàn-siàu.

8M̄-thang khiàn-chek ài biáu-sī lâng--ê, in-ūi i ōe oàn-hūn lí; khiàn-chek ū tì-hūi ê lâng, i ōe thiàⁿ lí.

9Kàu-tō ū tì-hūi ê lâng, i ōe jú ū tì-hūi; kà-sī gī-lâng, i ōe ke-thiⁿ ha̍k-būn.

10Kèng-ùi Siōng Chú sī tì-hūi ê kun-pún; bat hit-ūi Chì-sèng ê Siōng-tè chiū-sī chhong-bêng.

11In-ūi khò góa, lí ê ji̍t-chí ōe cheng-ka, lí ê nî-hè mā ōe ke-thiⁿ.

12Lí nā ū tì-hūi, tì-hūi ōe hō͘ lí ū lī-ek; lí nā ài kā lâng biáu-sī, siū-sún--ê sī lí ka-kī.

13Gōng ê cha-bó͘-lâng kóng-ōe tōa-sòe-siaⁿ; i gōng-ti̍t, m̄ bat pòaⁿ-hāng.

14I chē tī ka-kī ê mn̂g-kháu, chē tī siâⁿ-lāi siōng-koân ê só͘-chāi,

15kiò kè-lō͘ ê lâng, kiò kóaⁿ-kín teh keng-kè ê lâng, kóng,

16“Gōng-ti̍t ê lâng lóng oat-lâi chia.” I kā bû-ti ê lâng kóng,

17“Thau iúⁿ ê chúi khah tiⁿ; thau chia̍h ê piáⁿ khah ū chu-bī.”

18M̄-kú gû-gōng ê lâng m̄ chai tī i hia ū im-hûn; i ê lâng-kheh tī Im-hú siōng-chhim ê só͘-chāi.

← Chapter 8 Jump to: Chapter 10 →