Proverbs 3

Chinese TTVR (現代台語譯本羅馬字版)

← Chapter 2 Jump to: Chapter 4 →

1Góa ê kiáⁿ ah, m̄-thang bōe-kì-tit góa ê kà-sī; lí ê sim tio̍h chhî-siú góa ê bēng-lēng;

2án-ni, lí ōe tn̂g-hè-siū hó kè-ji̍t, hióng-siū pêng-an hoân-êng.

3M̄-thang hō͘ chû-ài kap chin-si̍t lī-khui lí; tio̍h pa̍k tī lí ê ām-kún, khek-tiâu tī lí ê sim-lāi.

4Án-ni tī Siōng-tè kap lâng ê bīn-chêng, lí ōe tit-tio̍h un-tián kap hó miâ-siaⁿ.

5Tio̍h choan-sim óa-khò Siōng Chú; m̄-thang óa-khò ka-kī ê chhong-bêng.

6Tī lí it-chhè ê só͘-chòe lóng tio̍h chun-tiōng I, I ōe chí-tiám lí ê lō͘.

7M̄-thang khòaⁿ ka-kī chòe ū tì-hūi; tio̍h kèng-ùi Siōng Chú, lī-khui pháiⁿ-sū.

8Án-ni, lí ê sin-thé ōe ióng-kiāⁿ, lí ê kun-kut ōe ióng-chòng.

9Tio̍h ēng lí ê châi-bu̍t kap it-chhè thâu-chúi ê thó͘-sán hiàn hō͘ Siōng Chú.

10Lí ê chhek-chhng chiū ōe móa-móa, chiú-khut ū sin-chiú móa--chhut-lâi.

11Góa ê kiáⁿ ah, m̄-thang khòaⁿ-khin Siōng Chú ê koán-kàu, mā m̄-thang iàm-ò͘ⁿ I ê chek-pī.

12In-ūi Siōng Chú chek-pī I só͘ thiàⁿ ê lâng, chhin-chhiūⁿ lāu-pē chek-pī i só͘ ì-ài ê kiáⁿ.

13Tit-tio̍h tì-hūi ê lâng chin ū hok-khì, i ū tit-tio̍h chhong-bêng.

14Tit-tio̍h tì-hūi pí tit-tio̍h gûn khah ū lī-ek, pí tùi kim tit--tio̍h ê lī-sûn khah koân.

15Tì-hūi pí âng-pó-chio̍h khah kùi-khì; lâng só͘ ì-ài--ê bô chi̍t hāng ōe-tàng kap i pí.

16I ê chiàⁿ-chhiú ū tn̂g-hè-siū; i ê tò-chhiú ū hó-gia̍h kap chun-kùi.

17I ê lō͘ ū hí-lo̍k; i ê tō-lō͘ hō͘ lâng pêng-an hoân-êng.

18Chhî-siú tì-hūi ê lâng tùi i tit-tio̍h sìⁿ-miā; kian-siú ê lâng lóng chin ū hok-khì.

19Siōng Chú ēng tì-hūi kiàn-li̍p tōe, ēng chhong-bêng an-tì thiⁿ.

20I ēng tì-sek hō͘ chhim-ian li̍h--khui, hō͘ kiong-chhong tih lō͘-chúi.

21Góa ê kiáⁿ ah, tio̍h chhî-siú chin ê tì-hūi, sīn-tiōng kè-ōe; tio̍h put-sî chù-ì, m̄-thang hut-lio̍k;

22án-ni chiah ōe hō͘ lí tit-tio̍h sìⁿ-miā, chiâⁿ-chòe lí ām-kún súi ê chng-thāⁿ.

23Lí chiū ōe an-ún kiâⁿ lí ê lō͘; lí ê kha bōe tak--tio̍h poa̍h-tó.

24Lí tó--teh, it-tēng bōe kiaⁿ, tó--lo̍h-khì, ōe chin hó-khùn.

25Hut-jiân hoat-seng thang-kiaⁿ ê tāi-chì, lí m̄-bián kiaⁿ; pháiⁿ-lâng beh kā lí húi-bia̍t, lí mā m̄-bián kiaⁿ.

26In-ūi Siōng Chú ōe chòe lí ê óa-khò; I ōe pó-siú lí ê kha bô hām-lo̍h lô-bāng.

27Lí nā ū khùi-la̍t chòe hó, m̄-thang kū-choa̍t; tio̍h pang-chān su-iàu pang-chān ê lâng.

28Lí nā chòe ōe kàu, m̄-thang tùi lí ê chhù-piⁿ kóng, “Lí tńg--khì, bîn-á-chài koh lâi, góa chiah hō͘ lí.”

29Chhù-piⁿ kap lí hô-bo̍k khiā-khí, lí m̄-thang siat-kè hāi i.

30Lâng m̄-bat hām-hāi lí, lí m̄-thang bô-iân-bô-kò͘ kap i oan-ke.

31M̄-thang him-siān kiông-pō ê lâng, mā m̄-thang kéng i só͘ kiâⁿ ê lō͘.

32Oai-khiok sī-hui ê lâng Siōng Chú iàm-ò͘ⁿ; chèng-ti̍t ê lâng Siōng Chú kap i chhin-bi̍t.

33Siōng Chú chiù-chó͘ pháiⁿ-lâng ê ke; gī-lâng ê chhù siū I chiok-hok.

34Biáu-sī lâng--ê, Siōng Chú biáu-sī i; khiam-pi ê lâng, Siōng Chú si-un hō͘ i.

35Tì-hūi ê lâng ōe tit-tio̍h chun-êng; gû-gōng ê lâng só͘ tit--tio̍h-ê sī kiàn-siàu.

← Chapter 2 Jump to: Chapter 4 →