Proverbs 7

Chinese TTVR (現代台語譯本羅馬字版)

← Chapter 6 Jump to: Chapter 8 →

1Góa ê kiáⁿ ah, tio̍h chun-siú góa ê ōe, sim-lāi khǹg góa ê bēng-lēng.

2Chun-siú góa ê bēng-lēng chiū ōe tit-tio̍h sìⁿ-miā; chun-siú góa ê kà-sī, chhin-chhiūⁿ teh pó-hō͘ ba̍k-chiu-jîn.

3Tio̍h pa̍k tī lí ê chńg-thâu-á, khek tī lí ê sim-lāi.

4Tio̍h tùi tì-hūi kóng “Lí sī góa ê chí-bē”; tio̍h kiò chhong-bêng chòe lí ê chhin-lâng.

5I ōe pó-hō͘ lí siám-pī îm-hū, siám-pī kóng sai-nai-ōe ê ki-lú.

6Góa khiā tī goán tau ê thang-á-piⁿ, tùi thang-á khòaⁿ--chhut-khì;

7góa tī gōng-ti̍t ê siàu-liân-lâng tiong-kan, khòaⁿ-tio̍h chi̍t ê bōe-hiáu siūⁿ ê siàu-liân-ke.

8I keng-kè koe-lō͘, lâi kàu îm-hū in chhù ê hāng-á-kháu, siám ji̍p-khì îm-hū in tau ê lō͘.

9Hông-hun, ji̍t lo̍h, o͘-àm tà-óa;

10hit-sî ū chi̍t ê cha-bó͘-lâng, chhēng-chhah chhin-chhiūⁿ ki-lú, sim hoâi khì-tô͘ chhut-lâi chiap i.

11Chit-ê cha-bó͘-lâng kóng-ōe tōa-sòe-siaⁿ, bô kàu-ióng, chhù tòa bōe tiâu.

12Ū-sî tī koe-lō͘, ū-sî tī chhī-tiûⁿ-kháu; ū-sî tī chia thèng-hāu, ū-sî tī hia tng-tán.

13I kā hit-ê siàu-liân-ke khîⁿ-tiâu-tiâu, kā i chim, m̄ kiaⁿ kiàn-siàu tùi i kóng,

14“Góa kin-á-ji̍t ū hiàn pêng-an-chè, chhù-lāi ū siā-goān ê bah,

15só͘-í góa chhut-lâi chhē lí, chhē chin kú chiah chhē--tio̍h.

16Góa í-keng ēng Ai-ki̍p chhái-sek ê chhn̂g-kun, chhu tī góa ê bîn-chhn̂g;

17koh ēng bu̍t-io̍h, tîm-hiuⁿ, jio̍k-kùi, hiù tī góa ê bîn-chhn̂g.

18Lâi, lán lâi thong-siau hióng-siū chêng-ài kàu boán-chiok, lâi hióng-siū chêng-ài ê khoài-lo̍k.

19In-ūi góa ê tiōng-hu bô tī chhù--ni̍h, chhut-gōa khì chin hn̄g ê só͘-chāi.

20I tòa kui-tē ê chîⁿ, kàu ge̍h îⁿ chiah ōe tò--lâi.”

21Îm-hū ēng chin chōe hoa-giân-kháu-gú kā i ín-iú, ēng sai-nai ê chhùi chhui-pek i chòe-hé ji̍p--khì.

22I sûi-sî tè i ji̍p--khì, chhin-chhiūⁿ gû hō͘ lâng khan-khì thâi, chhin-chhiūⁿ lo̍k-á poa̍h-lo̍h hām-chíⁿ,

23kàu chìⁿ siā-ji̍p i ê koaⁿ; i chhin-chhiūⁿ chiáu-á chông-ji̍p lô-bāng iáu m̄-chai sí-oa̍h.

24Góa ê kiáⁿ-jî ah, tio̍h thiaⁿ-thàn góa, liû-sim thiaⁿ góa só͘ kóng ê ōe.

25Lí ê sim m̄-thang hō͘ i bê--khì, m̄-thang gōng-gōng-á tè i khì.

26In-ūi i hō͘ chin chōe lâng siū-siong tó--lo̍h-khì; chin chōe lâng hō͘ i hāi-sí.

27I ê chhù sī Im-hú ê ji̍p-kháu, ti̍t-chiap thàng kàu Sí-bông.

← Chapter 6 Jump to: Chapter 8 →