1 Timothy 1

Zande

Jump to: Chapter 2 →

1Pauro, ga Kristo Yesu mokedi ku sangba ga Mbori rugute yo nga Batasirani, na Kristo Yesu gaani maabangirise,

2Fu Timoteo, nga wire rogo idapase yo ni rengo: Undahe dú foro, na inapai, na zereda, be Mbori nga Ba na Kristo Yesu gaani Gbia.

3Wa mi azungadi ro mo sungu ku Efesa yo, ho mi andu ni ku Makedonia yo, ya mo rugu agu akumba ya ka i yugu nga kura yugopai akia ya.

4Ka i dége nga tuyo fu kungba gumbagumba apai, na peka pa ngbatunga aboro ya nga gu nakusa kina sakapai, adu nga na pa Mbori rogo idapase yo ya.

5Ono digida pa rugute nga gu nyemuse nakura gigiri ngbaduse yo, na wene sangba kpoto yo, na ndikidi idapase.

6Agu yo akpara tiyo ku bani sa kungba apai ti agi apai re;

7nikpi nyemu ka du ni abayugupai rogo pa rugute; ono i aina nga gu i nape pa ha na gu i nagumba zukazuka te.

8Ono ani ini he ya rugute ngba, nga gu ka boro mangi he nzunzu,

9ki ini gere, ya i afu nga rugute tipa ruru boro te, ono fu abasarugute na airamungu, fu azangasinombori, na aboro ingapai; fu airabiriki na airagberãngba yo, fu ataki abayo na ataki anayo, fu aimiaboro,

10fu airabari, fu agu yo nabirikosi tiyo na akumba, fu abaziaboro, fu airazire, fu airazungahe ni wia, na gu kura ahe ka du ho arengba nga na wene yugopai ya.

11Gere du ku sangba gu wene pangbanga yo nga ga gu taarimo nga ga betedi Mbori, i afu he fere mi banda ha.

12Mi natambua gu ko naunda re, nga kina Kristo Yesu gaani Gbia, mbiko ko aberẽ he ya irarengo nga mi, ki asia pa gako sunge fere.

13Mi avura du mbata ni iragberãngba yo ni irarungosi boro, ni iragbarasapai, ono mi abi inapai, bambiko mi amangi he ni mungo ni zanga idapase.

14Gu undahe nga ga gaani Gbia si amoi pai amaa susi ni idapase na gu nyemuse du rogo Kristo Yesu yo.

15Gi pai re, rengo nga ha, si re aboro dũ na dia ha, ya Kristo Yesu aye ku zegino ka batasa aboro ingapai; mi nga barumbatayo dagba yo.

16Ono mi abi inapai mbiko gi pai re, ya Yesu Kristo yugu gako gbanga hipai rogo re yo dunduko wa du mi ni barumbatayo, ni kpia pai fu agu yo nikaida pa ko ku mbata yo sa nyenye unga.

17Awere irisa dú fu nyenye Bakindo, na taarimo, nga gu ko ka azirã nga ya, ka i abi nga ko a ya, nga bangisa Mbori du na tatamana nye anye kindi. Amina.

18Gi rugute mi nafu he ku be ro re, Timoteo, wire, ku sangba gu gumba pai yo nandu mbata yo foro, ya mo so gu wene vura re mbiko ho;

19nika kuti idapase, na wene sangba kpoto yo, nga gu agu yo aba ha ku sa yo ti yo, nirindasi idapase.

20Umenaio du dagba yo na Aresanduro; nga agu yo mi afu yo fu Satana, i yugu pai fu yo ka i agberã nga ngbayo yo ya.

Jump to: Chapter 2 →