1 Timothy 6

Zande

← Chapter 5 Jump to:

1Agu yo dunduko du tii be ni akanga i bérẽ pa abaira yo ya i re na irisa dunduko, ka aboro gbérẽ nga ngbayo yo ti rimo Mbori na gako yugopai ya.

2Agu yo du abairayo ni aidipase, ka i páyasi nga yo mbiko wa du yo ni awirina ya; ono i mángi pa yo susi, bambiko agu yo nadia undahe, i nga aidipase du nyemuyo ti Gbia. Agi apai re mo yúgu he ni zungadi he.

3Si ngia boro yugu kura yugopai akia, aida nga pa ziazia apai, nga kina ga gaani Gbia Yesu Kristo apai, na gu yugopai du ku sangba sinombori yo ya.

4Ni naenda, ni aina nga pai wa sa te, ono ni nakaza mbiko asanahe na sakapai, nga gu kpihe nakura be he, na kpata, na gberãngba yo, na gbegberẽ berã,

5na gu ti kangu nga ga agu aboro nigberẽ rogo gayo berã ki zanga rengo, niberẽ he tigayo ya sinombori nga gene mosoro.

6Ono sinombori gb a kuti zereda nga bakere mosoro.

7Bambiko ani arima nga na he ku rogo gi zegino te re ka ani kuru nga na he koyo a te.

8Ono wa du ani na riahe na roko si rengbe fu rani.

9Ono agu yo nakpi nyemu ka kumuko i atiwa ku rogo asada na gbina na dungu mumungo gbegberẽ nyemuahe nga gu narindasi aboro ku rogo gbarasa yo yo na kpio.

10Bambiko nyemu marã nga tarã ngbatunga gbegberẽapai du; agu yo nakpi nyemu he wo i aingi ainga ti idapase, ki nirupu tiyo arupa ni dungu arungo.

11Ono mo, ga Mbori boro, mo óro be agi apai re; ki nipeke fuo rurupai, sinombori, idapase, nyemuse, zadapase, zera.

12Mo só gu wene vura nga ga idapase, mo zádi nyenye unga, nga gu i ayambu ro sa ni, mo ki kusi wene kusapai ku bangiri dungu adezirehe.

13Mi rugu ro ku bangiri Mbori naungasi ahe dú, na ku bangiri Kristo Yesu nga gu ko nakusi gako pai wenengaĩ barangba Pondio Pirato;

14mo ká kuti rugute ki zanga sirõ, ki zanga gu pai ka i rugu ro kuti ni, dati ye gaani Gbia Yesu Kristo.

15Ko nga gu ko i ayúgo pa ko ti ragoko, ko du ni beedi ko ni bangisa Bazogo, Bakindo ri abakindo, Gbia ri agbia.

16Kina ko sa ka akpi nga ya, ninye rogo gu imarago ka boro ambeda nga na ni ya; nga gu ko boro ata bi nga ko ya, ka i abi nga ko a te. Irisa dú fu ko na tandu nye anye kindi. Amina.

17Mo nirúgu agu aboro aruga nakumuko rogo gi zegino re, ka i énde nga ya, ka i moi nga bangiriyo ti ũkumuko wa si nago ni ipo a ya, ono koyo du Mbori ni nafu ahe fu rani u au ani ngi mbiko ho.

18I mángi gu pai ngba angba, i kúmuko na wene mangaapai, i só gima fu he, rago ki ngba angba ti yo sa fuka ha.

19I naiga wene nyanyaki he fu kina yo sa gu rago nikaye yo, i nye anye na gu unga nga ndikidi unga.

20Ako Timoteo, mo bánda gu he i afu foro, ki guari pati gu kungba fura bau na kangu i aya ti ni ni zire, inahe;

21si du agu yo ata ida ha niingi ti gene idapase. Undahe dú na oni. Amina.

← Chapter 5 Jump to: