1 Timothy 5

Zande

← Chapter 4 Jump to: Chapter 6 →

1Ka mo zá nga sosono boro ya, ono mo zúngadi ni wa bamo. Aparanga ki du bangiro wa awirinamo,

2gbinza ade wa anamo, paranga ade wa adawiro rogo wene sino.

3Mo írisi gu ndikidi adekurugbo.

4Ono ka dekurugbo du na awiriri, watadu atitari, i ki wiriki pa yugo inapai fu agumeyo tigayo mbata, na ka unda avunguyo, bambiko gi ngba re bangiri Mbori.

5Were gu ri nga ndikidi dekurugbo, nazanga ahe, ri namaa bangiriri ti Mbori, nika kuti zungaditise na akpe yuru na uru.

6Ono gu ri napeka kina sangba borose wa vura du ri ni ungari ri ima kpi.

7Agi apai re mo rúgu he fu aboro a, i zanga pai ti rimoyo.

8Ono gu ni ka aberã nga pa agumeni, na gani aboro kporo a ya, ni basa pa idapase, ki gberẽ susi gu ni aida nga pai ya.

9Gu dekurugbo garãri ata du nga wa 60 ya ka i ké nga rimori ya, nga gu ri nadu ni de fu kumba sa,

10i ataka pande pa ri mbiko gari wene mangapai. Si ngia ri ambu ti agude, ki nidi kura aboro ku gume, nizundu kpendu ga Mbori aboro; niunda agu yo adu ngba pai, ki peke wene mangapai sisiri dunduko.

11Ono mo ká ha fu agu adekurugbo adu nga garãyo wo ya, bambiko ho nyemu gayo apai ka nanga yo ni ti Kristo, i ki nikpi nyemu roga akumba,

12ki du na pai ri yo, bambiko i aba gayo oambata idapase ku sa yo.

13I nawirika pa nyomoro a, niyara ayara ti dungu abambu, ni kina nyomoro sa te, ono ni aboro menemene a ni adingbitipai, nigumba agu apai ka i agumba nga ha ya.

14Mi nakpi nyemu paranga ade i rogo akumba, ki batika agude, ki nirugu pa aúkporo, ka bakitingbanga asoa nga pai mbiko yo wa sa ya,

15mbiko agu yo aima sa tiyo ku bani fu Satana.

16Ka gu de idipase du na adekurugbo be ri, ri mbú ti yo; ka i fúdi nga kanisa ya; kanisa mbu ti agu yo nga ndikidi adekurugbo.

17Agu abaakumba nazoga rago wenengaĩ, i re na irisa susi, fu agu yo gbe namanga sunge rogo tungusapai na yugopai.

18Ya Ziazia Kekeapai wẽ, “Ka mo vó nga ngba babagara ho u nasimba zendehe ni ya,” na, “Bamangisunge re na gani marã sunge.”

19Ka mo ídi nga pai kuti bakumba ya, kina ku ngba adezire watadu ue na biata.

20Agu yo nainga pai, mo zá yo ku bangiri aboro du, akura yo ki du na gunde.

21Mi naruga ro ku bangiri Mbori na Kristo Yesu na siasia amaraika, mo ká kuti agi apai re ni soki te, ka mo mángi nga pai ni kpara aboro wa sa ya.

22Ka mo moi nga bero ri boro nisia ni tipa sunge ni ipo ya, ka mo kódi nga tiro na ga kura aboro ingapai a ya; mo bánda tiro rogo wene sino.

23Ka mo dú nga ni mbiriime sa ya, ono mo mbiri bete imekakue mbiko vuro yo wa mo awoka dedede.

24Ga agu aboro ingaapai du gbayaga nandu sa sapangbanga; ga agu aboro akura kusa a.

25Kina wo du gu wene mangaapai a gbayaga; na gu adu nga wo ya, i aoka nga ha kindi te.

← Chapter 4 Jump to: Chapter 6 →