1 Timothy 3

Zande

← Chapter 2 Jump to: Chapter 4 →

1Gi pai re rengo nga ha, Ka kumba gbata sunge babipai ni nakpi nyemu wene sunge.

2Were babipai ka du ni zanga pai ti rimoni, ni kumba ku de sa, nizogo tini na zera, ni bayee ni, nike na ina pai fu boro, rengbe na yugo pai.

3Ka ni akpika nga pai mbiko buda ya, adu nga ni bataboro ya; ono ni wene ringini, ka ni adu nga ni irasakapai, ni iranyemumarã ya;

4nga gu ni nazoga kpuni tigani wenengaĩ, nizogo awirini ni zera.

5Ka kumba aina nga pa zoga kpuko ya, ko awira pa banda ga Mbori kanisa wãi?

6Ko ka du ni paranga te, enda ka kiisa ko ko ti rogo ga bakitingbanga ngbanga.

7Dezireko ki du ni wene he bangiri agu yo du zegi yo a; ko ka ti rogo ga bakitingbanga gbarasa rimo na gbina.

8Kina wo adiakona ka du a tigayo na zera, ni kparakakparaka fugoyo te, na mbira imekakue gbe te, na kpi nyemu marã te.

9I nika kuti gu gasigasi pai nadu ni gbugbu he nga ga idapase rogo gigiri sangba kpotoyo yo.

10Agi yo re i asadi yo mbata a; fuo ho i ki mangi sunge adiakona; nga gu ka i abi nga pai ti yo ya.

11Kina wo ade ka sunga na zera, ni aboro totoroto te, ni zogatise, ki nimangi apai dunduko nzunzu.

12Adiakona ka du ni kumba ku de sa, nizogo awiriyo na gayo kporo wenengaĩ.

13Bambiko agu yo namanga sunge adiakona wenengaĩ i kiisi payo bangiri aboro, ki du na bakere nyaka rogo gu idapase du rogo Kristo Yesu yo.

14Agi apai ke mi paha foro re, nimoi bangire ti ye koyo du mo ni mbembedi.

15Ono ka mi ima gbe, mo ki ini gu pai aboro ka manga rogo ga Mbori bambu, i nga gu kanisa nga ga unga Mbori, nga songodi rengo na nduhe.

16Na kii gu gbugbu pai nga sinombori, ka i ti nga kangu he te; Gu ko i ayugu ko rogo borose yo, Ziazia Toro ayugu pa ko ni ruru ko; amaraika abi ko, aboro atungusi pa ko dagba arikaaboro, i ki idi pako zegino, i ki di ko ku ari yo na taarimo.

← Chapter 2 Jump to: Chapter 4 →