Ecclesiastes 8

Zande

← Chapter 7 Jump to: Chapter 9 →

1Da du ho wa iratatamana? Da ini pa kusa gbugbu apai? Ga boro tatamana nasa kpakpuni si nikĩ akĩ, gu kere kpakpuni ki sa tihe a.

2Mi rugu ro, mo ká kuti sangba bakindo, bambiko wa mo azunga he fu Mbori;

3mo gúari bara bangiri bakindo, ka mo rú nga ho rago gbigbitapai ya, bambiko ko namanga kina gu pai ngba ti ko.

4Bambiko ga bakindo pai dũ na tandu, da ka ya fu ko, “Gini pai mo amanga?”

5Gu ni naka kuti rugute abi nga gbegberẽpai te, ono kpoto iratatamana yo nawisiga pa arago na pa sarangbanga.

6Bambiko apai ni ba sa sa du na rago ho na rago sarangbanga, ono gu gbigbitapai nga ga boro si kina ku ri ni ni bakere he.

7Bambiko ni aina nga gu pai nikadu te, bambiko da rengbe ka ya fu ni waĩ si ka du?

8A nga boro sa rengbe gani tandu ka za toro te, tandu ti ni ti uru kpio a te. Mbu boro ti rago sovura adu nga te, ka gbegberẽpai batasi nga gu boro fu tini tipa ha te.

9Agi apai dunduko re wisigi mi, ho mi afu gi berã ni tipa ina pa agu apai du ni mangimangi he tii uru no, ho boro nidu ni ni gbia ku ri kura ni ka imisa ni.

10Mi abi gbegberẽ aboro i nikpisidi yo. I anita rima ku kparakpara rago yo nikuru, i ki nitambua yo bakporo yo, yo i amangi ngbatunga apai ni. Gere a nga kina kungba pai.

11Bambiko wa i afu nga mbusa ni ipo fu bamangi gbigbitapai i nisari ngbanga ni ya, si du wiri aboro afu kpotoyo yo ti ni sa manga kina gbigbitapai.

12Ka boro ingapai vura manga gbigbitapai wa bara kama ki rasi gani arame vurũ, mi ini he tigimi ya agu yo nagunde ti Mbori pai angbá fu yo ni rengo, nga agu yo nagunde ti ko;

13ono pai angbá nga fu gbegberẽ boro te, ni arása nga gani arame a wa kirima he te, bambiko ni agunde nga ti Mbori te.

14Kungba pai dũ ho namanga auru kpotosende no, nga ruru aboro kina no pai amanga fu yo wa kina gu mangapai nga ga gbegberẽ aboro; gbegberẽ aboro kina ho a, pai amanga fu yo wa kina gu mangapai nga ga ruru aboro. Mi aya tipa gere, si nga kina kungba pai a.

15Mi sambua ngbarago, bambiko he be boro tii uru no ngba ki susi ri riahe, na mbira he, na du na ngbarago te, bambiko gure nikanye na ni rago gani sunge dunduko ti agu arame nga ga ungani nga gu fu Mbori fu ni tii uru no.

16Ho mi afu gi berã ni ka ina pa tatamana, ka bi agu apai namanga ri kpotosende no, na waĩ bangiri boro abi nga rame uru watadu yuru a ya;

17mi ki bi gu mangapai dunduko nga ga Mbori, ya boro arengba nga ka ina pa gu mangaapai namangi tii uru no te. Ka boro vura ka asada ka ina pa gu sunge re, nigbata pa ha, ni abi nga ha te; zavura iratatamana naya ni ini pa ha, ni arengba nga ka ina ha a te.

← Chapter 7 Jump to: Chapter 9 →