Job 2

Zande

← Chapter 1 Jump to: Chapter 3 →

1Ni gu uru ho awiri Mbori aye ni berewe ku bara bangiri Yekova, Satana ki ye a tigako ku dagba yo ku bara bangiri Yekova.

2Yekova ki ya fu Satana, “Wari mo aye ni?” Satana ki karaga ha fu Yekova, ki ya, “Mi nata ata koyo na kono auru kpotosende, nindu ku bani na ku bani.”

3Yekova ki ya fu Satana, “Mo berẽ pa gi moyambu nga Eyobo? bambiko a nga boro ho sa du wa ko auru kpotosende yo te, nga ziazia kumba ni ruru ko, nga gu ko nagunde ti Mbori ki nine gbigbitapai. Ono ko ka kuti pa gako du ni irarengo kindi, ka mo vura zingisa re kuti ko, ya mi gbarasi ko zanga nduhe vurũ.”

4Satana ki karaga ha fu Yekova ki ya, “Kpoto tipa kpoto! Agu ahe dunduko du be boro ni afu kina ha tipa ungani.

5Ono awere ka mo taĩ bero ki zadi memeko na pasioko, ko agberã ngbako yo foro kina ku bangiro.”

6Ono Yekova ki ya fu Satana, “Mo ngere, ko kina be ro; ono ka mo ími nga ko ya.”

7Si du Satana ki guari bara bangiri Yekova, ki ukadi Eyobo na abagita si ki tona kpanduko yo ki da ti riko.

8Eyobo ki di kina ngbadi ka kpera kpotoko na ni. Ko ki sungu kina kuke yo.

9Diako ki ya fu ko, “Mo ka kuti pa ga du ni irarengo kindi? mo gberẽ ngbaro yo fu Mbori, ki kpi.”

10Ko ki ya fu ri, “Mo nafura wa kina gu mumungo de ninafura. Ani adía nga wenepai be Mbori na gbigbitapai a te?” Rogo agi apai re dunduko Eyobo ainga nga pai ni ngbako te.

11Ho abadia Eyobo biata agi pa gu gbigbitaapai re ni dunduko naaye kuti ko, i ki niye rogo gayo aringara ni ba sa sa, nangia Erifaza boro Temana, Biridada boro Sua, na Sofara boro Nama. I ki ringbisi gayo pai wa sa ka ye ka rungo na ko na ka ngarãsa ko.

12Ho i abi ko ni tuturũ, ka i aina nga ko ya. I ki poi ku ari, ki nikpari; i ni ba sa sa ki sipi gayo aroko, ki mi nvutu ku ari yo ki uka ha ku riyo yo.

13Si du i ki sungu sande na ko tipa uru saba na yuru a saba, a nga boro sa nape pai fu ko te; mbiko i abi he ya gako rungo adu ni kere he susi.

← Chapter 1 Jump to: Chapter 3 →