Job 31

Zande

← Chapter 30 Jump to: Chapter 32 →

1“Mi azunga he na bangire; Waĩ tie ka mi ngere ka bi ngasu de?

2Gini he nikadu ni gi bete he be Mbori ari yo, na gi he be gu Ko du na tandu apai dũ du ari yo?

3A nga gberãngbi namanga iraira boro, na kere pai fu amangi irairapai, te?

4Ko abi nga gimi apai ki nigedi adagba ndure dunduko, te?

5“Ni rengo, mi ata nga na pa zire te, ndure aipo nga sa nangahe a te.

6I ríngbisi re rogo nzunzu uringbisahe, Mbori íni pa gi du ni irarengo!

7ka ndure aria tihe ti gene, ngbadure ki nindu fuo ngera bangire, ka wiri fuo gbegberẽ he ka kuti bere;

8si du mi ka rũka ahe ti ni, kina kura boro ki ri he; i mófo agu ahe naida fere ati kpure yo.

9“Ka ngbadure agumba soki fu de, ka mi aru ki sungu pa ngbadimo kuare;

10si du ka diare sá ahe tie ti ni fu kura boro, kura aboro nugadi ku ri ri.

11Bambiko gumba soki adú ni kere ingapai; si adu ni gu irairapai ka kina abasapungbanga fu mbusa tipa ha,

12si adu wa we nanyasa da kina ku Bagbarasahe yo, ki zo gimi idiidi ahe dunduko dati taraha.

13“Ka si du wa mi agindiga pa gi moyambu nga kumba watadu gu ri nga de, ho i akpakana he ni fere;

14gini pai tie mi ka manga ho Mbori ka guari ni kuti re? ho ko ka sana he ni, gini pai mi ka karaga ha fu ko?

15A nga gu ko namangi re ku rukumbu yo namangi ni a, te? A nga boro sa namangi rani ku rukumbu yo, te?

16“Ka mi aka na gu he be rurungbura aboro i akpi nyemu he, watadu manga ga adekurugbo maabangirise si nyasi,

17watadu mi ri gi bete riahe ni sa re, ka wirinyaure ari nga ha ya;

18bambiko tona ti rago parangani mi asonosi ni wa kina bani, mi ki du ni babandani tona kina rukumbu nani yo;

19ka mi bi gu ni kpi be zingo roko, watadu irazingohe adu nga na ũdada kpotoni ti ni ya;

20ka ni afu nga maku fere ya, ka ni adu nga uruuru be roko mange gimi akandoro ya;

21ka ngia mi tumba bere kuti awiri nyaure, bambiko mi abi gi undahe ngbadimo bakporo;

22si rengbe ka bazunga pagore zutuka ti gore, bere ki mo ti bazungaha.

23Bambiko gberãngbi be Mbori adu ni ũgunde fere, ka mi arengba nga ka manga pai ku bangiri gako rengba na pai ya.

24“Ka mi aidi he dahabu du ni gi ũkida kuti ni, watadu ya ti wene dahabu, si mi nakida kuti ni;

25ka mi angi mbiko gimi aũkumuko adu ni bakere he, watadu bambiko bere bi badungu ahe;

26ka mi abi uru ho si akĩ ni, watadu diwi nata rogo imaima rago,

27ngbadure ki nigumba soki ni gbuko, ngbare ki nyoro bere;

28gere adu ni gu irairapai ka abasapungbanga fu mbusa tipa ha, bambiko si wa ka mi amangi pa zire fu Mbori du ari yo.

29“Ka mi angi tipa gu gbarasahe namanga gu ni naasoga re, watadu sambua tire ho gbigbitapai agbia ni ni;

30ono mi ambu nga ngbare sa ingapai nisana he tipa ungani ni motiwa te;

31ka aboro gi bamburoko agumba nga ha ya, ‘Da du ho ata mbi nga be gako pasio ya?’

32Ono kungba boro ara nga ti gene bakporo te; mi aza gimi angbadimo fu nungunungu boro;

33ka mi adadi gi samungu wa du pa sino boro, nioko gimi irairaapai ku ngbadure yo,

34bambiko wa mi agunde be bakere rimbasa aboro, gu wasiro nga ga rika ngbatunga aboro agundesi re, si du mi ki ongo aonga kii ka mi akura nga ku zegi yo ya―

35Ako, ka mi adu na boro ka gia pa re! Mo ngére, gi ke rimore du re! gu Ko du na tandu apai dũ káraga nga pai fere! Ako! ka mi adu na gu waraga kitangbangase vurare ake!

36Ni rengo ka mi atínda ha atinda pagore; ka mi avo ho ku rire wa kpakpari bakindo;

37ka mi ataka pande gedigedi gimi apai fu ko dunduko; ka mi andu ka mbeda na ko wa bazogo.

38“Ka gi sende akpari ni zinga kuti re, gaha soposopo adue ki nikpari wa sa;

39ka mi ari gaha zuzu ahe zanga ngbe he, ki mangi aira ha i kpiki;

40kina akiwe kúru yo ku ba nganu, na abafuafu ku ba tunga kura he wa mapunga.” Ga Eyobo fugo digi.

← Chapter 30 Jump to: Chapter 32 →