Job 33

Zande

← Chapter 32 Jump to: Chapter 34 →

1“Ako Eyobo, mi nakpara foro, mo gí fugore, ki dege turo sa gimi apai dunduko.

2Mo ngére awere, mi za ngbare, mirãre vuru ngbare yo nafura.

3Gimi apai nikagumba pa ga kpotore yo rurupai, agu apai ini ngbare si mi agumba ha ni rengo.

4Ga Mbori toro mangi re, gu Ko du na tandu apai dũ, gako onga nafu unga fere.

5Mo káraga pai fere, ka mo rengbe na ni; mo tángara gamo apai ni rugurugu he bara bangire; mo rú nga tipa ha.

6Mo ngere, mi koyo du Mbori ni wa du mo koyo du Mbori ni a; i amangi re a kina rogo pere.

7Mo ngere, gunde re amanga nga ro mo gunde ti re te; gi sosodapai adu nga ri ro rõrõi a te.

8“Ni rengo mo nifura mi nigi he, mi ima gia woro pa gamo apai.

9Ya mo, ‘Mi du gigiri, zanga samungu; mi nga boro wenesa, irairapai rogo re yo wa sa te.

10Mo ngére, ko nagbata pai kuti re, ko gedi re wa vurako;

11ko namaa ndure ku rogo angboro yo, ki nikparia pa gimi agene dunduko.’

12“Mo ngére, mi akáraga pai foro, bambiko rogo gi pai re mo adu nga ni ruru ro te. Mbori kii pako susi ga boro.

13Tipagine mo apaa ti ni na ko, niya, ‘Ko akáraga nga wiri pai fu boro wa sa te’?

14Bambiko Mbori nafura rogo ngba tunga pai sa, ii, na ue a, ono boro aina nga pa ha te.

15Rogo musumo yo, rogo yugu yuguhe yuru, ho bakere rame nizi aboro ni, i nira rame ri gayo ba,

16ko ki za tu aboro, ki niiriwosi yo na pa fugapai fu yb,

17ya ko aria boro ti ngba fuo gani pai, ki oko pa ruka be boro;

18kina ko nabanda mbisimoni be Due, na ungani be kpio basape.

19“Boro du ni mbusimbusi ni na ima ku auru gani ba, na nyenye ima rogo amemeni yo;

20si du ni nasoga riahe ti ni, mbisimoni ki nisogobawene riahe a.

21Kpotoni ugudi dũ, ka i arengba nga ka bi he ya; amemeni i nabi nga ha ya, si kuru gbazagara.

22Mbisimoni nambeda mbembedi na Due, na ungani koyo du agu yo ni naye na kpio.

23Ka maraika du ho tipa ni, ni azarõ, boro sa dagba kutu yo, ka yugo gu pai fu boro ru tipa ni;

24ki niini pai fu ni, ki ya, ‘Mo bátasi ni be ti ku Due yo, bambiko mi bi motumo;

25kpotoni zámbua berewe wa ga parangani; si du wa ga agu arame nga ga parangani’;

26si du boro akpára fu Mbori, ko ki idi pa ni; ni narima ku bara bangiriko na ngbarago. Ko ki karaga gani rurupai fu aboro,

27ni nabi bia ku bangiri aboro, niya ‘Mi ingi pai, ki irasi pa gu naadu ni ruru he, ka si au nga fere ya.

28Ko atumo mbisimore ti ndu ku Due yo, ungare abí imarago.’

29“Mo ngére, agi apai dunduko re Mbori namanga ha, bara ue, ii, bara biata, fu boro,

30ka kusa mbisimoni Due yo, rago há fu ni be gu imarago nga ga unga.

31Ako Eyobo, mo gi nga ha wenengaĩ, mo dége turo fere; mo óngo kii, mi afúra.

32Ka mo du na pai ngbaro ka gumba ha, mo káraga pai fere; mo fúra bambiko mi nakpi nyemu ka dia pai ri ro.

33Ka si adu nga wo ya, mo dége turo kono du mi ni; mo óngo kii, mi ayugo pa tatamana foro.”

← Chapter 32 Jump to: Chapter 34 →