Matthew 10

Zande

← Chapter 9 Jump to: Chapter 11 →

1Yesu ki yambu gako abawiriki nanidu bawe na ue fuo ko, ki asia pa kusa gbigbita atoro fu yo i nido ra, ki nihusi ngbatunga akaza dunduko, na ngbatunga awokote du.

2Were agu amokedi nanidu bawe na ue rimoyo nga gere: bambata ko, nga Simona, i aya ti ko Petero, na Andarea nga wirinako; Yakoba wiri Zebedayo, na Yoane nga wirinako;

3Firipo, Barutoromayo; Toma, na Matayo nangia barogo marã ngbeti; Yakoba wiri Arafayo, Tadayo;

4Simona nangia Kanano, na Yuda Keriota, gu ko nakusi Yesu.

5Agi yo bawe na ue re Yesu akedi yo, ki ta ruga yo niya, “Ka oni ndú nga ngba ga aGendiria gene ya, ka oni rimi nga ku rogo bakporo nga ga aSomorono wa sa ya;

6ono oni ndú sa gu ingiingi akandoro nga ngbatunga aYisaraere.

7Wa oni ka ndu, oni ta tungusa pai, niya, ‘Gu ngbi nga ga ngbangbaturũ si mbedi.’

8Oni husi akaza, ki nizingisi kangba aboro, ki nigirisi aboro ngbataka, ki nidandi adaimona. Wa i nafuku ahe fu roni gbe, oni fúku he tigaoni kina wo.

9Ka oni moi nga dahabu, na feda, na tara ku rogo gaoni amangu ya;

10ka oni rogo nga mangu tipa gaoni nunguro ya, baukadi ue a te, rakata te, na ngbondo a te; bambiko bamangisunge re na gani riahe.

11Gu bakporo na gu kporo oni ka rima ku rogo, oni gbáta gu boro du ho rengbe na dia roni ku gume, oni ki sungu yo daho oni ka guari ni.

12Oni ki ta rima ku bambu yo, nipoi kuti aboro.

13Ka gu bambu rengbe tipa roni, gaoni zereda ki ye ku ri he. Ono ka si arengba nga tipa roni ya, gaoni zereda ki karaga tihe fu roni.

14Gu ni ka dia nga roni ku gume ya, ka ni agia nga sangbaroni ya, ho oni ka kura ni rogo gu bambu re na bakporo a, oni ki tadi nvutu ti nduroni.

15Ya mi fu roni ni rengo, rago sapangbanga, gu pai nikadu fu ringara Sodoma na Amora si agberã nga wa ga gu bakporo te re.

16“Oni ngére, mi nakeda roni wa kina akandoro dagba awaru. Oni dú na tatamana wa kina awo, oni ki zere wa kina ambipo.

17Ono oni bánda tironi ti aboro, bambiko i afu roni ku be abororondo, i atáka roni abambutiria yo;

18ii, i andú na oni ku barangba agbia na abakindo mbiko re, si yugu pai fu yo na aGendiria a.

19Ono ho i ka fu roni ni, ka oni báki nga bangironi ya oni ayá wãi na gini pai oni ka gumba ha ya; bambiko i afú agu apai fu roni oni ka gumba ni gu rago re.

20Mbiko si adú nga wa oni nikagumba ha te, ono ga Baroni Ziazia Toro nikagumba ha ku rogo roni yo.

21Boro afú wirinani fu kpio, ba gude ki fu wirini; agude nikazinga kuti avunguyo, ki fu yo fu kpio.

22I asóga roni dunduko tipa rimore. Ono gu ni ka hi pai dati yangara rago kindi, i abátasa gu ni abatasa re.

23Ono ho i ka rungosi roni ni rogo gu bakporo re, oni óro ku rogo kura ha; bambiko ya mi fu roni ni rengo, oni atá nga rogo ga aYisaraere abaakporo dunduko mbata Wiri boro nikaye te.

24“Bawiriki nasusa nga gani bayugupai te, kanga nasusa nga gani gbia a te.

25Si rengbe bawiriki du wa kina gani bayugupai, kanga ki du wa kina gani gbia. Ka i ya ti baira kporo Barazebuba, i ape he kina wo ki susi tipa agu yo du rogo gako kporo!

26“Ka oni gúnde nga be aboro tie ya; mbiko a nga he sa ni dadidadi he, i ka he kusa ha te; a nga he sa du ni okooko ho, i ka he ina pa ha te.

27Gu pai gumba mi fu roni bitimo, oni gúmba ha ku imarago yo. Gu pai oni agia tue yo, oni túngusi he ri bambu yo.

28Ka oni gúnde nga be agu yo naimo kpotoboro ya, ka i rengbe nga ka imo mbisimo te. Ono oni gúnde ti gu ko rengbe ka gbarasa mbisimo na kpotoboro a ku Geyena yo.

29I nabaga abavurukporo ue tipa rukutu marã sa, te? a nga gu ru sa dagba ra ka ti nga ku sande gi bangiri Baroni te.

30Ono mangerironi tigaha ni gedigedi he dunduko.

31Were, ka oni gúnde nga ya; genoroni susi geno dungu abavurukporo.

32“Were, gu ni nikakusa pa re ku bara bangiri aboro, mi akúsa pa ni a tigimi ku bara bangiri Buba du ngbangbaturũ yo.

33Ono gu ni ka oro rimore ku bara bangiri aboro, mi aóra rimoni ku bara bangiri Buba du ngbangbaturũ yo.

34“Ka oni bérẽ nga ha ya mi aye ka maa zereda zegino ya; mi aye nga ka maa zereda te, ono kina baso!

35Bambiko mi aye ka maa kangu dagba ba gude na wirini, na dagba degude na nani, na dagba de na nakumbari;

36avura boro angia kina gani aborokporo.

37Gu ni ka kpi nyemu bani na nani ki susi re, ni are nga na mi te. Gu ni ka kpi nyemu wirini nga kumba na wirini nga de ki susi re ni are nga na mi te.

38Gu ni ka atumba nga gani wagiwagi ngua ki nipeke re ya, ni are nga na mi te.

39Gu ni ka bi ungani ni aingisa ha aingisa; na gu ni ka ingisa ungani tipa re ni abí he.

40“Gu ni ka di roni ku gume ni di re, na gu ni ka di re ku gume ni di gu ko naakedi re.

41Gu ni ka di nebi ku gume ni rimo nebi ni adia mosoro nebi. Gu ni ka di ruru boro ku gume ni rimo ruru boro, ni adia mosoro ruru boro.

42Gu ni ka fu kina inga na zezere ime fu gu ni sa dagba gi rukutu agude re, ni rimo bawiriki, ya mi fu roni ni rengo, ni ahe nga dia gani mosoro wa sa te.”

← Chapter 9 Jump to: Chapter 11 →