Matthew 15

Zande

← Chapter 14 Jump to: Chapter 16 →

1Abakeapai na aFarusi ki ye Yeru sarema yo fuo Yesu, ki ya,

2“Tipagine gamo abawiriki abasa ga autarani sino ti ni? bambiko i nazunda nga beyo i nikari riahe te.”

3Ono ko ki karaga ha ki ya fu yo, “Tipagine oni ati ga Mbori ndika n ni mbiko sinoroni?

4Bambiko Mbori aya, ‘Mo írisi bamo na namo,’ na, ‘Gu ni ka gberẽ ngbani vo fu bani na nani, ni kpi akpi.’

5Ono oni ki ya, ‘Gu ni ka ya fu bani na nani, Gu he ka mo akumuko na ni be re, si i nifu he fu Mbori;

6ka ni airisa nga bani ya.’ Oni sa ga Mbori rugute ni kungba he mbiko sinoroni.

7Oni nga airabiriki! Yesaya ayugu pa roni ni ruru he, niya,

8‘Agi aboro re i nairisa re kina auru ngbayo; ono kpotoyo yo ti re tuturũ;

9ono i airisa re airisa vurũ niyugu gayo apai nga kina ga aboro ndika.’ ”

10Yesu ki yambu rimbasa fuo ko, ki ya fu yo, “Oni gi he ki rugu tironi na ni:

11gu he rimi ku ngba yo ka si birikosi nga boro te; kina gu kuru ngba yo si birikosi boro.”

12Were gako abawiriki ki ye, ki ya fu ko, “Mo ini si agberẽ ti aFarusi ho i nigi gu pai ni re?”

13Ono ko ki karaga ha ki ya, “Gu rũrũ he dunduko Buba du ngbangbaturũ yo aru nga ya, i amófa ha amofa.

14Oni he yo ahe; i nga angbembatayo fu aboro ni airavurari. Ka iravurari ngbe mbata yo fu kura iravurari, i tiwi atiwa ku due yo ue.”

15Petero ki karaga ha ki ya fu ko, “Mo yúgu gi sanza re fu rani.”

16Ko ki ya, “Oni nazanga rugatise na apai tigaoni a kindi?

17Oni aina nga ha ya gu he dunduko narima ngba yo si nandu ku vuse yo, i ki ba ha aba ku nvuo yo te?

18Ono agu ahe nakura ngba yo, si naenga kpoto yo; ki nibirikosi boro.

19Bambiko kpoto yo gbegberẽ aberã niye ni, nga pa imoboro, na pa bari, na meteka, na dĩ, na gumba zire, na sengahe.

20Agi ahe re na birikosi boro; ono he zunda be ka ri riahe si abirikosi nga boro te.”

21Yesu ki guari yo ki ndu ku rogo ringara Tura na Sidona.

22Oni ngére, de nga boro Kanana ki kuru ngbanda agu arago re ki ta kpara niya, “Mo íni pai fere Gbia, mo nga Wiri Dawidi; daimona namanga wire nga de gbegberẽ.”

23Ono ko akaraga nga pai fu ri wa sa te. Gako abawiriki ki ye ki ta zúngadi ko, niya, “Mo dó ri; bambiko ri nakpara fuo rani.”

24Ono ko ki ta karaga ha niya, “I akedi re tipa kina gu ingiingi akandoro nga ngbatunga aYisaraere.”

25Ono ri ata ye ni irisi ko, niya, “Gbia, mo únda re.”

26Ko ki ta karaga ha niya, “Ngba nga dia ga agude kpokuta ka ba ha fu aango te.”

27Ono ri ki ya, “Ii, Gbia; bambiko aango nari mbusuru kpokuta nga gu nati ku tii ga bairara mbisa yo.”

28Yesu ki karaga ha fu ri, “Ako, na kii ga idapase gbe; I mángi he foro wa mo akpi nyemu he.” Ti kina gu saa re wiriri ki hu.

29Yesu ki guari yo, ki mbedi na gu baime nga Gariraya. Ko ki dakpa ku ri bagangara yo, ki sungu yo.

30Bakere rimbasa aboro ki ye koyo du ko ni, airaterenga ki du na yo, na airavurari, na kisikisi ngba aboro, na gbarĩgbarĩ aboro, na akura yo ni dungu yo, i ki zozogo yo pati nduko; ko ki husi yo.

31Were si ki iriwo airiwo ti rimbasa, ho i abi kisikisi ngba aboro ni i nifura, na gbarĩgbarĩ yo i ki du na ba yo, na airaterenga i nita, na airavurari i ningere. I ki nitaasi rimo ga Yisaraere Mbori.

32Yesu ki ta yamba gako abawiriki fuo ko, niya, “Nunga rimbasa namanga re, bambiko i sungu na mi uru biata awere a nga he be yo ka i ri he te. Mi akpi nga nyemu ka asia yo na gomoro te, he ka maka yo gene.”

33Abawiriki ki ya fu ko, “Wari ani Ka bi dungu udiudi kpokuta ni ngbakungba nore, rengbe na mbisa bakere rimbasa wa gere?”

34Yesu ki ya fu yo, “Udiudi kpokuta be roni wãi?” I ki ya, “Si saba, na rukutu atĩo ni umba ra.”

35Ko ki rugu rimbasa i susungusande.

36Ko ki rogo gu udiudi kpokuta nadu saba na atĩo; ko ki fu tambuahe ki kuadi he, ki fu he fu gako abawiriki; abawiriki ki fuku he afuka fu rimbasa aboro.

37I ki ri he dunduko, ki mbiki. I ki dungura yangara kuadikuadi he nanye, buma ki hiki saba.

38Agu yo nari he i adu wa 4,000 nga akumba, gbia kuti ade na agude.

39Ko ki asia rimbasa aboro, ki rimi ku kurungba yo, ki da ti ngbanda Magadana.

← Chapter 14 Jump to: Chapter 16 →