Matthew 22

Zande

← Chapter 21 Jump to: Chapter 23 →

1Yesu ki karaga ha ki gumba pai berewe fu yo ni asanza, niya,

2“I aringbisa gu ngbi nga ga ngbangbaturũ kuti gu bakindo nambakadi pumbo diade tipa wiriko,

3ki kedi gako amoyambu ka yamba agu yo i aringbisi yo sa pumbo diade; ka i akpi nga nyemu ka ye ya.

4Ko ki kedi kura amoyambu fu yo berewe, ki ya, ‘Oni gúmba ha fu agu yo i aringbisi yo, Oni ngére, mi mbakadi gi riahe; i imi gimi ababagara na gimi anya nzeme, i mbakadi ahe dunduko. Oni yé sa pumbo diade.’

5Ono i ki nibasa ha abasa, ki niga aga, gu ni sa ku rogo gani ati, gu ni sa ka bi gani bagibagi ahe.

6Akura yo ki zi amoyambu, ki mangi yo amanga gbegberẽ, ki imi yo.

7Ono bakindo ki zingi azinga; ko ki kedi gako rimbasa avura, ki gbarasi agu abaimiaboro re, ki zokodi gayo bakporo azokoda.

8Ko ki gumba ha fu gako amoyambu ya, ‘I mbakadi pumbo diade, ono agu yo i aringbisi yo, i are nga na ni te.

9Oni ndú tie, ku ngboso bakere agene, oni ki yambu agu yo oni ka bi yo, sa pumbo diade.’

10Agu amoyambu ki kuru re ki ndu ku rogo bakere agene, ki dungura agu yo dunduko i abi yo, gbegberẽ yo na wene yo. Agino ki hiki ba pumbo diade ahika dunduko.

11“Ono ho bakindo aye ni ki bi agino, ko abi kumba naukadi nga roko pumbo diade ya.

12Ko ki ya fu ko, ‘Badia, mo niwiri pa rima wãi wa adu nga roko pumbo diade ti ro ya?’ Ka pai adu nga ngbako ya.

13Bakindo ki ya fu gako amoyambu, ‘Oni vó beko na nduko, ki ba ko ku rogo gu bitimo du zegi yo; yo kpe ka du ni na ri ngba rinde.’

14Bambiko dungu yo du ni yambuyambu yo, ono siasia yo du ni umba yo.”

15AFarusi ki ndu, ki ta bura ya i amanga wãi ka zia ko ni fugo.

16I ki kedi gayo abawiriki koyo du ko ni, na aErode. I ki ya, “Bayugupai, ani ini ya irarengo nga mo, mo nayugo ga Mbori gene ayugo ni rengo, mo agunde nga be aboro te bambiko mo angba nga na aboro kuti pa kindiga yo te.

17Mo gúmba ha fu rani tie, Si bangiro wãi? watadu ngba rú he angba fu Kaisara na ngba nga ha te?”

18Ono Yesu ki ini gayo gbegberẽpai aina, ki ya, “Airabiriki, tipagine oni aasada re ti ni?

19Oni yugu marã rú he fere.” I ki ye na rukutu marã feda fu ko.

20Ko ki ya fu yo, “Kpia da du re, pa da ke yo ba ri he?”

21I ki ya fu ko, “Ga Kaisara du.” Ko ki ya fu yo, “Agu ahe nga ga Kaisara tie, oni nifú kina ha fu Kaisara; agu ahe nga ga Mbori oni nifú kina ha fu Mbori.”

22Ho i agi he ni, si ki niiriwo airiwo ti yo, i ki guari pati ko, ki ga.

23Ni gu rago re aSadoke ki ye koyo du ko ni, nga agu yo naya zingabekpio ho te; i ki sana ko,

24ki ya, “Bayugupai, Mose aya, ‘Ka boro kpi ka awirini adu nga ho ya, wirinani ki di dekurugboni, ka vunga ku ba ni.’

25Were awirina adu na ani saba; bambata yo ki di de, ki kpi, ki he dekurugboko fu wirinako bambiko ko avunga nga te;

26gu kura ko ki du kina wo, ko ki kpi a, na biata yo a, dati saba yo.

27Gu de ki kpi ni yangara yo re.

28Rago zingabekpio tie gini ni nikadia ri dagba yo wa i adu saba? bambiko i amongo rogo ri aroga.”

29Ono Yesu ki karaga ha ki ya fu yo, “Oni nainga wa oni aina nga Ziazia Kekeapai na ga Mbori tandu ya.

30Bambiko rago zingabekpio boro adía nga de te, i afu nga de ni du ni dia kumba te, ono i adu wa kina amaraika ngbangbaturũ yo.

31Ono pa zinga aboro be kpio, oni ageda nga gu pai Mbori agumba ha fu roni, ki ya,

32‘Mi nga ga Abarayama Mbori nga ga Yisaka Mbori, nga ga Yakoba Mbori,’ te? Ga kangba aboro Mbori nga ko te, ga unga aboro Mbori nga ko.”

33Ho rimbasa agi he ni, gako yugopai ki niiriwo airiwo ti yo.

34Ho aFarusi agi he ni ya Yesu azeresi aSadoke, i ki dungura tiyo.

35Gu ni dagba yo nangia bainiparugute ki sana ko, ni asada ko, ki ya,

36“Bayugupai, dagba arugute dunduko gini gu susi?”

37Ko ki ya fu ko, “Mo kpi nyemu Gbia nga ga Mbori kpotoro yo dunduko, na mbisimoro du, na ga berã du.

38Gu rugute nga bakumba ha susi si nga gere.

39Kura ha wa kina ha nga gere, nga, Mo nikpí nyemu kuaro wa mo akpi nyemu tiro.

40Agi arugute ue re nasongoda arugute dunduko, na anebi.”

41Were wa aFarusi adu rogo gu ba sa, Yesu ki sana yo,

42ki ya, “Gini pai oni aberã tipa Kristo? wiri da nga ko?” I ki ya fu ko, “Wiri Dawidi.”

43Ko ki ya fu yo, “Dawidi awiri pa ya wãi tipa ko tie sangba Ziazia Toro yo Gbia, niya,

44‘Gbia aya fu gi Gbia, Mo súngu pati kumbabere Daho mi ka maa avuraro ni ku tii nduro yo’?

45Ka Dawidi aya ti ko Gbia, wiri ko pa du wãi ni wiriko?”

46A nga boro sa narengba na karaga pai fuo gure ku ngbako te, fuo gu pai re ka boro angarã nga ka sana ko tipa kura apai wa sa ya.

← Chapter 21 Jump to: Chapter 23 →