Matthew 12

Zande

← Chapter 11 Jump to: Chapter 13 →

1Ni gu rago re Yesu ki nita rago sabiti ku ati vunde yo; gomoro ki nimangi gako abawiriki, i ki nisiri vunde, ki niri ne.

2Ono ho aFarusi abi he ni, i ki ya fu ko, “Mo ngére, gamo abawiriki namanga gu pai aru nga manga ha rago sabiti ya.”

3Ono ko aya fu yo, “Oni ageda nga gu pai Dawidi amangi ni gu rago gomoro amangi ko, na agu yo naadu na ko te?

4wa ko arimi ku rogo ga Mbori bambu yo ki ri ga Mbori kpokuta yugopai, gu aru nga ko ri he na agu aboro naadu na ko ya, ono tipa kina abairamotumo.

5Na oni ageda nga ha rogo rugute, wa abairamotumo awasi rago sabiti yekaru yo te? ono i azanga pai ku ri yo.

6Ono ya mi fu roni, bahe du no susi yekaru.

7Ono ka oni ini ndu gi pai re, ya, ‘mi nakpi nyemu weneringise, motumo te,’ ka oni akita nga ngbanga agu yo ru sa yo ya.

8Bambiko Wiri boro nga gbia sabiti.”

9Yesu Ki guari yo, ki rimi ku rogo gayo bambutiria.

10Oni ngére, kumba adu yo na kurugbo beko. I ki sana ko, ki ya, “Ru husa boro aru rago sabiti?” i kiti ngbanga ko.

11Ko ki ya fu yo, “Da du dagba roni kandoro du be ni sa ka u ti ku due yo rago sabiti, ni azia nga ru ka kusa ru te?

12Geno boro asusa nga kandoro bakere gbe te! Were ru manga wenepai aru rago sabiti.”

13Ko ki ya fu kumba, “Mo tãi bero.” Ko ki tãi he; si ki du teketeke wa kina gu.

14Ono aFarusi ki kuru, ki gumba rondo imo ko.

15Ho Yesu aini he ni, ko ki guari yo. Dungu aboro ki nipeke ko, ko ki husi yo dunduko,

16ko ki rugu yo ya ka i gumba nga pa ko ya,

17gu pai dũ ni digisidigisi he i agumba ha ku ngba Yesaya nga nebi, naya,

18“Oni ngére, gi moyambu gu ko sia mi ko; ko mi akpi nyemu ko, rago nangba ti mbisimore mbiko ko. Mi amáa Torore ri ko, ko nikayugo pa sapangbanga fu aGendiria.

19Ko ati nga kangu na aboro te, ko apáa nga ku ari te; a nga boro sa nikagia fugoko ngba agene bakporo te;

20ko akita nga kamakama nganzi te, gu remu du pidapida ko abísa nga ha te, daho ko ka kusa ruru sarangbanga ni ni diabese;

21maabangirise adú fu aGendiria mbiko rimoko.”

22I ki ye na boro koyo du Yesu ni nadu na daimona, nga gu ko nadu na vurari na kisikisi ngbako. Ko ki nusi ko, boro kisikisi ngba ki ta fura ki ningere.

23Rimbasa aboro dunduko ki nikigi akiga, niya, “A nga wiri Dawidi du te re?”

24Ono ho aFarusi agi he ni, i ki ya, “Gi kumba re nadanda adaimona vurube kina Barazebuba nga gbia adaimona.”

25Ko ki ini gayo berã ki ya fu yo, “Gu ngbi dunduko du ni kparakpara ha ni sa ha si apáya apaya; gu bakporo dunduko na gu bambu du ni kparakpara ha ni sa ha si arú nga te.

26Ka Satana do Satana, ko du ni kparakpara ko; gako ngbi awira pa ru wãi?

27Were ka mi do adaimona vurube Barazebuba, awironi nado ra vurube da? were kina yo ka du ni gaoni abasapungbanga.

28Ono ka mi do adaimona vurube ga Mbori Ziazia Toro, ga Mbori ngbi ima da fu roni.

29Gini boro rengbe na rima ku dimo ku gu kumba nga iraome, ka roga gani ahe, ka ni avo nga iraome mbata ya? fuo gure ni nikaroga ahe bambu yo.

30Gu ni ka du nga na mi ya vurare nga ni; gu ni ka dungura nga ahe wa sa na mi ya, ni nagbandaka ha.

31Si du ya mi ti ni fu roni, i avú aboro avu ti gbegberẽapai na gberãngba yo dunduko; ono i avú nga gu ni nagberã ngbani yo fu Ziazia Toro te.

32Ka boro gumba gbegberẽ pai kuti Wiri boro, i avú ni avu ti gure; ono gu ni ka gberã ngbani yo fu Ziazia Toro, i avú nga ni ti gure te, rogo gi ngbi re, na gu ngbi nikaye sa yo.

33“Watadu sa ngua ni wene he, na zuzuhe ni wene he a; na sa ngua ni gbegberẽ he, na zuzuhe ni gbegberẽ he: oni mángi gu sa, bambiko i aína ngua ti zuzuhe.

34Oni nga awiri awo, wa du oni ni gbegberẽ aboro, oni awira pa gumba wenepai wãi? bambiko ngba boro nagumba gu pai dũ kpotoni yo.

35Gu wene boro du na wene kumuko ni nakusa wene ahe, na gu gbegberẽ boro du na gani gbegberẽ kumuko ni nakusa gbegberẽ ahe.

36Ya mi fu roni wẽ, agu apai dunduko aboro ka gumba ha gbua, i aríngbisa paha aringbisa rago sapangbanga.

37Bambiko i asápa ngbanga foro kuti gamo apai, i ki sapu ngbanga ro kuti gamo apai.”

38Agu yo dagba abakeapai na aFarusi ki ta karaga ha fu ko niya, “Bayugupai, ani nakpi nyemu mo yugu gu pai i aina apai ti ni fu rani.”

39Ono ko ki karaga ha ki ya fu yo, “Gbegberẽ rika airabari nagbata gu pai i aina apai ti ni, ka i fu nga gu pai i aina apai ti ni fu yo ya ono kina gu nga ga Yona nangia nebi.

40Bambiko wa Yona adu vuru batĩo yo uru ki du biata na yuru biata; kina wo Wiri boro ka du ni vuru sende yo uru ki du biata na yuru biata.

41Rago sapangbanga aboro Nineve arú na gi rika aboro re, ki gbarasi ngbanga fu yo; bambiko i asa gayo berã mbiko ga Yona tungusapai fu yo; oni ngére, gu ko du erẽ nga bahe ti Yona.

42Nakindo rago ku sudi yo nikamo ku ari rago sapangbanga kuti gi rika aboro re, ki gbarasi ngbanga fu yo; bambiko ri aye digida sende yo ka gia gu tatamana nga ga Soromo; oni ngere, gu ko du erẽ nga bahe ti Soromo.

43“Ono ho gbigbita toro akuru ni kpotoboro yo, u ki merẽ ku kungba rago yo, ka gbatabaongoda, kauabingahaya.

44Were u ki ya, ‘Mi akáraga tire ku rogo gi bambu ho mi akuru ni.’ Ho u ada ni, u ki Di he gbua, ni wegewege he, ni tata ha.

45Were u ki ndu ki rogo kura atoro fuo ru saba susi u na gberã, ami ki rimi ki sungu yo. Were gu pai nga ga gu boro re si ki gberẽ ti gu naadu mbata. Pai adú kina wo fu gi gbegberẽ rika aboro re.”

46Wa Yesu afura na rimbasa aboro, oni ngére, nako na awirinako ki ru zegi yo, ki nikpi nyemu ka fura na ko.

47Gu ni sa ki ya fu ko, “Mo ngére, namo na awirinamo ru zegi yo, i nakpi nyemu ka fura na mo.”

48Ono ko ki ta karaga ha fu ko niya, “Da nga nina? na da nga awirinami?”

49Ko ki tãi beko fuo gako abawiriki, ki ya, “Oni ngére, nina na awirinami!

50Bambiko gu ni ka manga sangba Buba du ngbangbaturũ yo, ni nga wirinami, ni nga dawire, na nina.”

← Chapter 11 Jump to: Chapter 13 →