Matthew 16

Zande

← Chapter 15 Jump to: Chapter 17 →

1AFarusi ki ta ye na aSadoke, nisana ko ni asada ko ko yugu gu pai i aina pai ti ni ngbangbaturũ yo fu yo.

2Ono ko ki karaga ha fu yo ki ya, “Ho nyemu nida ni, oni ki ya, ‘Ngba rago angba: bambiko ari yo gu du ni zamba ha.’

3Wiso oni ki ya ‘Mai ana areme; bambiko ari yo gu du ni zamba ha ni rungbutarungbuta ha.’ Oni rengbe na ina pa vura ngbangbaturũ; ono ka oni arengba nga na ina agu apai i aina pai ti ni tipa arago ya.

4Gbegberẽ rika airabari nagbata gu pai i aina pai ti ni; ka i fu nga gu pai i aina pai ti ni fu yo ya, kina gu nga ga Yona.” Ko ki guari pati yo ki merẽ.

5Abawiriki ki si ku mbiti yo i ki atadi kpokuta.

6Yesu ki ya fu yo, “Oni rúgu tironi na ni ki banda tironi ti agu agbooro nga ga aFarusi na aSadoke.”

7I ki ta saka pai dagba yo, niya, “Si wo bambiko kpokuta be rani te.”

8Yesu ki ta gia ha niya, “Ako oni na toni idapase, tipagine saki oni he ti ni dagba roni niya, bambiko kpokuta be roni te?

9Oni ata gia nga ha te, oni atingida nga ha a tipa gu kpokuta naadu bisue fu agu yo naadu 5,000 te, na agu abaga oni ahisi he ni gu nanye?

10Na pa gu kpokuta naadu saba fu agu yo naadu 4,000, na agu abuma oni ahisi he ni gu nanye?

11Tipagine oni aruga nga tironi na ni ti ni ya, ya mi agumba nga pai fu roni tipa kpokuta te? Ono oni bánda tironi ti agu agbooro nga ga aFarusi na aSadoke.”

12Were i ki rugu tiyo na ni ya ko aruga nga yo i banda tiyo ti agu agbooro nga ga kpokuta te, ono ti gu yugopai nga ga aFarusi na aSadoke.

13Were ho Yesu ada ni rogo gu ringara nga Kaisaria Firipo, ko ki ta sana gako abawiriki, niya, “Aboro niya da nga Wiri boro?”

14I ki ya, “Agu yo niya Yoane Babapatiza; agu yo ki ya Eriya; akura yo ki ya Yeremaya, si ngia gu ni sa dagba anebi.”

15Ko ki ya fu yo, “Ono ya oni tigaoni da nga mi?”

16Simona Petero ki ta karaga ha niya, “Kristo nga mo, nga Wiri gu Mbori du ni ungako.”

17Yesu ki ta karaga ha niya fu ko, “Maku foro, Simona wiri Yona. Bambiko boro pasio na kure akusa nga gi foro te re, ono kina Buba du ngbangbaturũ yo.

18Ya mi foro a wẽ, mo nga Petero. Mi adúa gi kanisa ti gi mbia re. Agu akpuguru nga ga Kpio adia nga be he te.

19Mi afú arifungura gu ngbi nga ga ngbangbaturũ foro; gu he mo ka voda ha zegino i avóda ha ngbangbaturũ yo; gu he mo ka zaka ha zegino i azáka ha ngbangbaturũ yo.”

20Were ko ki rugu abawiriki ka i gumba nga ha fu boro ya Kristo nga ko wa sa ya.

21Ti gu rago re Yesu ki tona yugo pai fu gako abawiriki, ya ko andú andu ku Yerusarema yo, ka hi dungu apai be ga aYudo abaakumba na abairamotumo, na abakeapai, i aimo ko, uru adu biata Mbori azingisa ko berewe.

22Petero ki di ko ki tona za ko ki ya, “Si turú atura ti ro, Goia; gi pai ayé nga sa ro wa sa te re.”

23Ono Yesu ki sa tiko, ki ya fu Petero, “Mo ké ku gii re yo, Satana! Asada nga mo fere; bambiko ga Mbori pai bangiro te, kina ga aboro apai du bangiro.”

24Yesu ki ya fu gako abawiriki, “Gu ni ka akpi nyemu peka re, ni mbú gani apai, ki di gani wagiwagi ngua, ki nipeke re.

25Gu ni nakpi nyemu batasa ungani ni aíngisa ha aingisa; gu ni ka ingisa ungani tipa re ni abí he abi.

26Bambiko gini u du ti kumuko bo ro na gi zegino dunduko re, ki ingisi ungani? na gine ka boro unaa nga na ungani?

27Bambiko Wiri boro ayé na ga Bako taarimo na gako amaraika; ni gu rago re ko aríngbisa ahe fu aboro dunduko ni ba sa sa rengbe na gayo mangaapai.

28Mi nagumba ha fu roni ni rengo, agu yo dagba agu yo ru erẽ nikaakpi nga ya daho i ka bi Wiri boro ni ko niye rogo gako ngbi.”

← Chapter 15 Jump to: Chapter 17 →